Kpohọ eme nọ e riẹ eva

Eme Me re Ru Otẹrọnọ Isukulu E Were Omẹ Hẹ?

Eme Me re Ru Otẹrọnọ Isukulu E Were Omẹ Hẹ?

Oware nọ whọ gwọlọ ona

 Wo emamọ eriwo kpahe isukulu. Roro kpahe epanọ eware nọ who bi wuhrẹ na i ti fihọ obọ họ kẹ owhẹ te evaọ obaro. Orọnikọ eware kpobi nọ who bi wuhrẹ obọnana e te nwani wo iruo kẹ owhẹ ẹsiẹsiẹ hẹ. Ghele na, izoẹme sa-sa nọ who bi wuhrẹ na i ti fi obọ họ kẹ owhẹ riẹ kpahe eware buobu evaọ akpọ na. U ti ru nọ whọ te rọ jọ “oghẹrẹ eware kẹ ahwo kpobi,” je ru owhẹ wo onaa nọ whọ sai ro lele oghẹrẹ ahwo sa-sa ta ẹme. (1 Ahwo Kọrint 9:22) Oghẹrẹ kpobi nọ o rrọ kẹhẹ, isukulu i ti fiba ẹgba iroro ra, onọ u ti fi obọ họ kẹ owhẹ nọ whọ be kpako ze na.

Re whọ sai no isukulu nwrotọ o wọhọ ohwo nọ o bi ko ire no re ọ ruẹ edhere nya evaọ igbrẹwọ—re whọ sai ru eware ivẹ yena, who re wo ekwakwa na gba

 Rọ emamọ ẹro rri iticha ra. Otẹrọnọ oghẹrẹ nọ iticha ra o re wuhrẹ o rẹ were owhẹ hẹ, tẹrovi oware nọ o bi wuhrẹ na, orọnikọ iticha na ha. Kareghẹhọ nọ iticha ra o wuhrẹ eklase efa oware ovona unuẹse buobu no. Fikiere ajọwha nọ ọ jẹ hai ro wuhrẹ uzoẹme na vẹre o sai kie kpotọ no.

 Dawo onana: Nọ iticha o te bi wuhrẹ, hai kere eware fihọ otọ, jẹ nọe enọ avọ adhẹẹ, re who je wo isiuru kpahe oware nọ o bi wuhrẹ na. Onana u ti ru nọ oware nọ o bi wuhrẹ na o te rọ were owhẹ.

 Tẹrovi abọ nọ whọ be jọ daoma. Isukulu e rẹ sai fi obọ họ kẹ owhẹ riẹ onaa nọ who roro nọ who wo vẹre he. Pọl o kere se Timoti inọ: “Wariẹ tua okẹ Ọghẹnẹ nọ o rọ owhẹ eva.” (2 Timoti 1:6) U muẹro nọ Timoti o wo okẹ ẹzi ọfuafo na. Rekọ o gwọlọ nọ o re fi okẹ nana họ iruo, o gbẹ jọ uvrẹvru hu. Uzẹme, orọnikọ Ọghẹnẹ ọ nwane ma owhẹ avọ obe-oriẹ hẹ. Rekọ ọ kẹ owhẹ obọdẹ onaa jọ nọ u wo ohẹriẹ no orọ amọfa. Isukulu e te lẹliẹ owhẹ riẹ onaa nọ who wo jẹ daoma rehọ iẹe ruiruo.