Eware ivẹ jọ nọ ahwo buobu a riẹ hẹ

 Ọrọ ọsosuọ: Who te ru oware kẹ ahwo, a re ru kẹ owhẹ re!

 Whọ tẹ be hai ru ọghọ, ahwo a re muẹrohọ iẹe. Onana u ti ru nọ a ti ro ru ọghọ kẹ owhẹ re. Ebaibol ọ ta nọ:

•  “Wha hae kẹ okẹ, ahwo a te kẹ owhai. . . . Epaọ owawọ nọ wha be rọ wawọ kẹ amọfa a te rọ wawọ kẹ owhai re.”—Luk 6:38.

•  ‘Oghẹrẹ nọ who bi ru ahwo ere a ti ru owhẹ re.’—Luk 6:38, Contemporary English Version.

 Ọrọ avọ ivẹ: Who te fiobọhọ kẹ ahwo, yọ omobọ ra who bi fiobọhọ kẹ!

 Who te bi ru ewoma kẹ ahwo, yọ who bi bru ọghọ họ omara, yọ eva e rẹ were owhẹ. Ebaibol ọ ta nọ:

•  “Ẹkẹ evawere e mae rrọ vi emio.”—Iruẹru Ikọ 20:35.

•  “Who te bi se ehaa, zizie iyogbe, enọ e ko, emo, gbe enọ i tuaro; who ti wo evawere keme a wo oware ovo nọ a te rọ hwa zihe kẹ owhẹ hẹ.”—Luk 14:13, 14.

 Izoge nọ i re fiobọhọ kẹ amọfa

 Izoge nọ i re fiobọhọ kẹ amọfa a rrọ oria kpobi! Joma ta kpahe ejọ.

 “Ẹsejọ mẹ rẹ gwọlọ keria agbara ọvo re me rri TV. Rekọ mẹ vẹ kareghẹhọ epanọ ọsẹgboni mẹ a bi ru iruo ga te, gbe epanọ oma o te lọhọ ai te nọ a te kpozi. Kẹsena mẹ vẹ kpahe nyae wozẹ imidhe, hwere uwou, je ririe ovu no uwou mai. Me ve je gbe ekọfi buobu fihọ keme ekọfi ọ rẹ were ọsẹgboni mẹ gaga. Nọ oni mẹ o te te uwou ọ vẹ ta nọ, ‘Rri epanọ oria kpobi u bi lo! Ekọfi na o te je bi gbo emamọ ore. Whọ kobiruo, oyibo mẹ na!’ Eva e rẹ were omẹ ẹsikpobi nọ me te ru emamọ oware otiọye kẹ ọsẹgboni mẹ.”—Casey.

 “Ọsẹgboni mẹ ae a be rẹrote omẹ, a be kẹ omẹ eware kpobi nọ mẹ gwọlọ. Fikiere, ukpe nukpo nọ oware ulogbo jọ o raha evaọ omoto rai, mẹ tẹ jọ ugho nọ me bi kokohọ anwẹdẹ rehọ ugho nọ a rẹ ruẹrẹ omoto na ze dede nọ o jọ buobu. A jẹ rọ rọwo ho, rekọ mẹ sobọhọ nọ mẹ rẹ hwae ghele. Ugho yena u te oware ovo ho nọ me te rri eware nọ ọsẹgboni mẹ a ru kẹ omẹ no. Yọ eva e were omẹ gaga nọ mẹ sai fi omobọ jọ họ kẹ ae.”—Holly.

 Kọ whọ riẹ? Edhere jọ nọ izoge buobu nọ e rrọ Isẹri Jihova a bi ro fiobọhọ kẹ amọfa họ, a bi wuhrẹ ahwo Ebaibol na, yọ onana o be lẹliẹ eva were ae. Ejọ e tubẹ kwa kpohọ orẹwho ofa nọ a jọ gwọlọ etausiuwoma dede.

 “Mẹ kwa no obọ United States kpobọ Mexico re mẹ nyai wuhrẹ ahwo Ebaibol. Ẹsejọ o rẹ jọ bẹbẹ re mẹ rọ ugho hayo eware efa ru ahwo ọghọ keme me wo tere he. Rekọ mẹ ruẹ nọ mẹ tẹ be rọ oke gbe ẹgba mẹ ta usi uwoma na, oyena u tube woma vi oware nọ mẹ kẹ rai.”—Evan.

 Eme me re ru ro fiobọhọ kẹ amọfa?

 Kọ whọ gwọlọ fiobọhọ kẹ ahwo re eva e hae were owhẹ? Joma ta kpahe eware jọ nọ whọ rẹ sai ru.

 Eware nọ whọ rẹ sai ru ro fiobọhọ kẹ ahwo uviuwou ra:

•  Hwere uwou, wozẹ imidhe, je ru iruo uwou efa ababọ ẹtakẹ nọ a rẹ ta kẹ owhẹ

•  There emu

•  Kere eware fihọ ekade ro yere ọsẹgboni ra

•  Fiobọhọ kẹ oniọvo ra ru ihomwhọko riẹ

 Eware nọ whọ rẹ sai ru ro fiobọhọ kẹ enọ e rrọ ahwo uviuwou ra ha:

•  Kere eware fihọ ekade ro se ohwo jọ nọ ọ be mọ

•  Hwere hayo gbẹ ighẹ ohwo jọ nọ ọ be rria kẹle owhẹ nọ ọ kpako no

•  Weze bru ohwo jọ nọ o bi no uwou hu fiki ẹyao

•  Dẹ oware ro ru ohwo jọ nọ eware e rrọ gaga kẹ ọghọ

 Oware jọ nọ u re fiobọhọ: Roro kpahe eware jọ nọ whọ rẹ sai ru kẹ amọfa. Kẹsena who ve ru eware na kẹ ohwo jọ oka nana. Whọ te ruẹ nọ eva e te were owhẹ gaga!

 “Eva e rẹ were owhẹ nọ who te fiobọhọ kẹ amọfa. Whọ rẹ ruẹ nọ emamọ oware who ru na, yọ eva e rẹ were ohwo nọ who ru rie kẹ. Ẹsejọhọ oma o jẹ were owhẹ oke nọ who je ru ei na, dede nọ who roro nọ ere o te jọ oke ọsosuọ họ. Ukuhọ riẹ irere buobu i ti noi ze te owhẹ, who gbe ti rri rie nọ who ru okpoware jọ họ.”—Alana.