ENỌ IZOGE NA

Fikieme Wha Jẹ Be Hae Kpohọ Iwuhrẹ Evaọ Obọ Ọgwa Uvie?

KPORO

Isiava ẹkpoka, Isẹri Jihova a re ru iwuhrẹ evaọ oria egagọ rai nọ a re se Ọgwa Uvie. Eme a be hae jọ obei ru, kọ erere vẹ o re te owhẹ nọ who tẹ be hae lele ae?

Eme a be hae jọ Ọgwa Uvie na ru?

Ọgwa Uvie yọ oria nọ a rẹ jọ wuhrẹ epanọ Ebaibol e sai ro fiobọhọ kẹ ohwo evaọ uzuazọ. Iwuhrẹ nọ a rẹ jọ etẹe ru e sai fiobọhọ kẹ owhẹ:

Riẹ oghẹrẹ ohwo nọ Ọghẹnẹ ọ rrọ.
Riẹ oware nọ uyerakpọ u je bi dhe eyeyoma.
Jọ emamọ ohwo.
Wo emamọ egbẹnyusu.

Kọ Whọ Riẹ? Oware nọ a je bi se oria nọ Isẹri Jihova a re kokohọ Ọgwa Uvie họ, fikinọ a rẹ jọ etẹe wuhrẹ kpahe Uvie Ọghẹnẹ gaga.—Matiu 6:9, 10; 24:14; Luk 4:43.

Fikieme u je wuzou re whọ hae lele ae?

Oware nọ a be jọ etẹe wuhrẹ u ti fiobọhọ kẹ owhẹ. Ehri-izi Ebaibol a be hae jọ iwuhrẹ Isẹri Jihova ta ẹme kpahe, yọ e sai fiobọhọ kẹ owhẹ “wo areghẹ.” (Itẹ 4:5) Koyehọ, Ebaibol na ọ sai fiobọhọ kẹ owhẹ jẹ emamọ iroro evaọ uzuazọ. Whọ sae jẹ jọ evaọ Ebaibol na ruẹ iyo enọ ilogbo jọ wọhọ:

Jọ obotọ ruẹ izoẹme evuẹ nọ a rẹ kẹ evaọ ẹdoka, joma dhunu te ai kakao:

Fikieme U Je Fo Re Ebaibol Na E Kpọ Owhẹ?
Diẹse Whọ Jẹ Sai Wo Obufihọ Evaọ Oke Uye?
Oware Nọ Uvie Ọghẹnẹ U Bi Ru Kẹ Omai Enẹna.

“Me zizie ọmọ eklase mẹ jọ ziọ iwuhrẹ mai ẹdẹjọ. Ọ keria kugbe uviuwou mai, ma tẹ jẹ kẹe ebe nọ a je ro ru iwuhrẹ na re o rri lele omai. Ọ tẹ vuẹ omẹ uwhremu na nọ, evaọ abọ ewuhrẹ enọ gbe iyo nọ ahwo a rẹ jọ kpare abọ a vẹ kuyo na, iyo nọ ahwo a jẹ za na e were riẹ umuo ho. Ọ tẹ jẹ ta nọ ichọche rai i wo ebe nọ a re ro wuhrẹ Ebaibol na wọhọ omai hi.”—Brenda.

Kọ Whọ Riẹ? Whọ rẹ hwa ugho whọ tẹ te rueva Ọgwa Uvie na ha, yọ a re ghoro umudo gbe he.

Ahwo nọ whọ te jọ etẹe ruẹ a te were owhẹ oma. Usu eware jọ nọ Ebaibol ọ ta nọ o rẹ hae lẹliẹ Ileleikristi kuomagbe ẹsikpobi họ re a hae “tuduhọ ohwohwo awọ.” (Ahwo Hibru 10:24, 25) Evaọ akpọ nana nọ ohwo kpobi ọ be jọ si họ otọ awọ riẹ na, oma o rẹ were ohwo nọ o te bi kuomagbe ahwo nọ e rẹ gwọlọ ewoma amọfa, enọ i se Ọghẹnẹ ọgọ gboja.

“Nọ me te no iruo te uwou, oma o rẹ whọlọ omẹ fihotọ, rekọ ahwo nọ a rrọ obọ Ọgwa Uvie a re ru omẹ oma sasa. Oma mẹ o rẹ jọ sasasa nọ me te no iwuhrẹ te uwou, eva e rẹ were omẹ jẹ sae kpama okioke riẹ sasasa.”—Elisa.

Kọ Whọ Riẹ? Ikoko nọ Isẹri Jihova e rẹ jọ kpohọ iwuhrẹ evaọ akpọ na i bu vi 120,000, yọ eria nọ a re kokohọ jọ ru iwuhrẹ na evaọ akpọ na i bu vi 60,000. Nọ a tẹ ghale iẹe, kukpe kukpe, a be bọ Egwa Uvie nọ i bu te 1,500 keme ahwo nọ e be ziọ iwuhrẹ na a bi dhe ebuebu. a

Ẹme nọ ehwa ra a ta

“Okenọ mẹ jọ isukulu ikpehru, ọmọtẹ jọ nọ ma gbẹ jọ eklase o lele omẹ kpohọ iwuhrẹ unuẹse jọ, yọ eva e were riẹ gaga nọ ọ ruẹ ahwo buobu nọ e keria bi wuhrẹ Ebaibol na. Yọ kẹle na ọga iruo mẹ ọ ziọ iwuhrẹ re, yọ u gbe rie unu gaga nọ ọ ruẹ epanọ a bi se oria Ebaibol fihọ ẹme kpobi nọ a be ta. Nọ mẹ ruẹ epanọ iwuhrẹ na e were riẹ te, o tẹ lẹliẹ iwuhrẹ na ghare omẹ ẹro viere!”—Jessica.

“Me muẹrohọ nọ iwuhrẹ na e be lẹliẹ omẹ siọ awaọruọ uzuazọ ba. Keme ma rẹ jọ obei wuhrẹ epanọ ma sae ro yeri uzuazọ nọ o rẹ kẹ evawere, epanọ ma sae rọ jọ emamọ ahwo, gbe eware itieye na efa buobu. Oma o rẹ sasa omẹ nọ me te no iwuhrẹ te uwou.”—Timothy.

“Ozae jọ nọ me zizie kpohọ iwuhrẹ ọ ta uwhremu na nọ: ‘Oware nọ o lẹliẹ omẹ kpohọ iwuhrẹ na họ re me gine dhesẹ kẹ owhẹ nọ iwuhrẹ rai e thọ. Rekọ me te muẹrohọ nọ kpakọ egagọ mẹ họ enọ e thọ!’ Oghẹrẹ nọ Isẹri Jihova a re dede ohwo nọ o kpohọ iwuhrẹ rai o were riẹ umuo ho. Ọ ta nọ: ‘Dede nọ ẹdẹ ọsosuọ nọ me ro kpohọ iwuhrẹ ọna, wha dede omẹ wọhọ ẹsenọ ma riẹ oma kri no!’”—Jacob.

“Ẹsejọ oma o rẹ hae jọ omẹ nọ ewuhrẹ na ọ tẹ nwane fa no, ‘mẹ te tọlọ ẹkpa mẹ, mẹ vẹ ruọ edhere.’ Rekọ ewuhrẹ na o re ru omẹ nọ mẹ gbẹ tubẹ kareghẹhọ iroro yena ha. Keme nọ ewuhrẹ ọ tẹ fa no, me re lele ahwo ta ẹme te epanọ mẹ gbẹ tubẹ kareghẹhọ oware nọ o jẹ lẹliẹ omẹ roro ere he. O gbẹ rrọ iwuhrẹ na ha, me roro nọ mẹ hae ti wo egbẹnyusu ezi nana nọ me wo na ha.”—Madison.