Kpohọ eme nọ e riẹ eva

ENỌ IZOGE NA

Ẹvẹ Ebaibol na Ọ Sae ro Fiobọhọ Kẹ Omẹ?—Abọ 1: Riẹ Oware nọ O Rrọ Eva Ebaibol Ra

Ẹvẹ Ebaibol na Ọ Sae ro Fiobọhọ Kẹ Omẹ?—Abọ 1: Riẹ Oware nọ O Rrọ Eva Ebaibol Ra

 “Mẹ rẹ gwọlọ daoma se Ebaibol na, rekọ u re fo omẹ eho fiki epanọ o re ruaro!”—Briana, 15.

 Kọ ere ọvona o rrọ owhẹ oma re? Uzoẹme nana u ti fiobọhọ kẹ owhẹ!

 Fikieme u ro fo nọ who se Ebaibol na?

 Hae daoma se Ebaibol na, o do oghẹrẹ jọ evaọ ezọ ra? Otẹrọnọ ee họ uyo ra, u re gbunu hrọ họ. Keme ẹsejọhọ ubiẹro obe ulogbo nọ o rrọ kokoli nọ u wo ifoto ho, yọ orọnọ o rẹ were wọhọ ifimu hayo etẹlẹvisiọno ho who bi ro rri Ebaibol na!

 Ma dae rọ oriruo nana dhesẹ iẹe: Dae rehọ iẹe nọ whọ ruẹ etehe anwae jọ, kọ whọ gbẹ te gwọlọ riẹ oware nọ o riẹe eva?

 Ebaibol na ọ wọhọ etehe anwae na. Eme areghẹ e vọ riẹ eva, enọ e rẹ sai fiobọhọ kẹ owhẹ

  •   Jẹ emamọ iroro

  •   Lele ọsẹgboni ra rria dhedhẹ

  •   Wo emamọ egbẹnyusu

  •   Riẹ epanọ whọ sae ro thihakọ idhọvẹ akpọ

 Ẹvẹ obe anwae jọ nọ u kri akpọ no o sae ro fiobọhọ kẹ omai oke nana? O sae fiobọhọ kẹ omai keme “ẹkwoma ẹzi Ọghẹnẹ a ro kere Ikereakere na kpobi.” (2 Timoti 3:16) Oyena u dhesẹ nọ, obọ ohwo nọ ọ mai wo areghẹ kpaobọ ehrẹ nọ e rrọ Ebaibol na i no ze.

Ebaibol na yọ etehe ọghaghae nọ obọdẹ eme areghẹ e vọ eva

 Ẹvẹ mẹ sai ro se Ebaibol na?

 Edhere jọ họ who re sei no oka duoka. Oyena o sae fiobọhọ kẹ owhẹ riẹ oware nọ Ebaibol na o be ginẹ ta kpahe. Idhere sa-sa e riẹ nọ whọ sai ro se Ebaibol na. Joma ta kpahe idhere ivẹ:

  •    Whọ sae salọ nọ who bi se ebe 66 Ebaibol na unọjọ utọjọ, koyehọ no Emuhọ rite Eviavia.

  •    Whọ sae rọ iku sa-sa nọ e rrọ Ebaibol na muhọ—koyehọ, who re se iku na othotha epanọ i ro muhọ.

 Dao Onana: Whọ rẹ jọ Ẹme-Ofiba A7 evaọ Ebaibol New World Translation na ruẹ ikuigbe uzuazọ Jesu nọ a ruẹrẹ họ othotha evaọ okenọ ọ jọ otọakpọ.

 Edhere ọfa nọ whọ sai ro se Ebaibol na họ whọ rẹ salọ iku nọ i kiekpahe idhọvẹ nọ e rrọ owhẹ oma obọnana. Wọhọ oriruo:

  •   Kọ whọ gwọlọ wo ogbẹnyusu nọ whọ rẹ sae fievahọ? Se iku Jonatan avọ Devidi. (1 Samuẹle, izou 18-20) Kẹsena whọ vẹ gwọlọ uzoẹme nana “How to Find Loyal Friends” evaọ jw.org, re whọ ruẹ iruemu nọ Devidi o wo nọ o lẹliẹ riẹ were Jonatan gaga gbe epanọ whọ sae rọ raro kele ei.

  •   Whọ gwọlọ gbẹ riẹ epanọ whọ sae rọ za edawọ dhe vrẹ ere? Se iku epanọ Josẹf o ro fi odawọ jọ kparobọ. (Emuhọ, uzou 39) Kẹsena whọ vẹ gwọlọ izoẹme nana, “How to Resist Temptation . . . Joseph—Part 1” gbe “Falsely Accused! Joseph—Part 2” evaọ jw.org, re whọ riẹ oware nọ o kẹ Josẹf ẹgba fi edawọ na kparobọ gbe epanọ whọ sae ro fi oware nọ se na họ iruo evaọ uzuazọ ra.

  •   Whọ gwọlọ riẹ epanọ olẹ o sae ro fiobọhọ kẹ owhẹ? Se iku Nehemaya. (Nehemaya, uzou 2) Kẹsena whọ vẹ gwọlọ uzoẹme nana “God Answered His Prayer” evaọ jw.org, re whọ ruẹ imuẹro nọ i dhesẹ nọ olẹ u wuzou gaga.

 Dao Onana: Ẹsikpobi nọ whọ tẹ gwọlọ se Ebaibol na, jọ oria nọ edo ọ rrọ họ re iroro ra i gbe reghe kpohọ eware efa ha.

 Edhere avesa nọ whọ sae ro se Ebaibol na họ salọ iku jọ hayo uzou jọ evaọ olezi, sei JE roro kpahe epanọ u ro kiekpahe owhẹ. Nọ who te sei no, nọ omara enọ nana:

  •    Fikieme Jihova o ro ku oria nana gbe Ebaibol na?

  •    Didi oghẹrẹ ohwo u dhesẹ nọ Jihova ọ rrọ hayo ẹvẹ Jihova o re ru eware?

  •    Ẹvẹ mẹ sae ro ru oware nọ me se na evaọ uzuazọ mẹ?

 Dao Onana: Fi utee họ! Kere ẹdẹ nọ whọ gwọlọ ro mu isase Ebaibol kẹdẹ kẹdẹ ra họ otọ.