Kpohọ eme nọ e riẹ eva

Fikieme Ọsẹgboni Mẹ A Gbẹ be Jọ Omẹ Kpohọ Oria Omaweromẹ Ovo Ho?

Fikieme Ọsẹgboni Mẹ A Gbẹ be Jọ Omẹ Kpohọ Oria Omaweromẹ Ovo Ho?

Dae rehọ iẹe nọ:

Whọ gwọlọ kpohọ epati, rekọ whọ riẹ sọ ọsẹgboni ra a te rọwo nọ whọ nya ha. Salọ oware nọ who ti ru evaọ usu esa nọ e rrọ obotọ na?

  1.  WHỌ VUẸ AE HE—LẸLẸ NYA

  2.  WHỌ VUẸ AE HE—WHỌ NYA HA

  3.  VUẸ AE—RE WHỌ RIẸ UYO NỌ A TE KẸ OWHẸ

 1. WHỌ VUẸ AE HE—LẸLẸ NYA

 Oware nọ whọ te rọ gwọlọ ru onana: Whọ gwọlọ dhesẹ kẹ egbẹnyusu ra nọ who wo udu nọ who re ro ru oware kpobi nọ u je owhẹ. Who roro nọ whọ riẹ vi ọsẹgboni ra, hayo inọ a rẹ sae vuẹ owhẹ oware nọ who re ru hu.—Itẹ 14:18.

 Oware nọ u re noi ze: Egbẹnyusu ra a sae ta nọ who gine wo udu, rekọ a te jẹ riẹ nọ whẹ yọ ohwo eviẹhọ. Otẹrọnọ whọ rẹ sae viẹ ọsẹgboni ra họ, kiyọ whọ rẹ sae viẹ egbẹnyusu ra họ re. Nọ ọsẹgboni ra a tẹ riẹ nọ whọ lẹlẹ nya, eva e te dhae, a ti gbe fievahọ owhẹ hẹ, yọ u ti ru nọ a te rọ kẹ owhẹ uvẹ kpohọ oria ovo ho evaọ omoke jọ.—Itẹ 12:15.

 2. WHỌ VUẸ AE HE—WHỌ NYA HA

 Oware nọ whọ te rọ gwọlọ ru onana: Nọ who roro kpahe uzizie na, whọ tẹ jiroro nọ whọ be nya ha keme oware nọ a ti ru evaọ epati na u kiehọ owhẹ oma ha hayo ahwo jọ nọ a zizie na yọ ahwo nọ whọ sai mu usu kugbe he. (1 Ahwo Kọrint 15:33; Ahwo Filipai 4:8) Hayo o sai jọnọ whọ gwọlọ nya rekọ ozọ o be jọ owhẹ vuẹ ọsẹgboni ra ha.

 Oware nọ u re noi ze: Otẹrọnọ whọ nya ha fiki eghẹrẹ eware gbe ahwo nọ e te jọ etẹe, whọ te riẹ ẹme nọ whọ rẹ kpahe kẹ egbẹnyusu ra nọ a tẹ nọ owhẹ. Rekọ otẹrọnọ whọ nya ha fikinọ ozọ o jọ owhẹ ta kẹ ọsẹgboni ra ha, u ti ru nọ who ti ro mu unu họ evaọ uwou, bi roro nọ egbẹnyusu ra a be reakpọ siọ owhẹ ba.

 3. VUẸ AE—RE WHỌ RIẸ UYO NỌ A TE KẸ OWHẸ

 Oware nọ whọ te rọ gwọlọ ru onana: Whọ riẹ nọ u fo re who yoẹme kẹ ọsẹgboni ra, whọ tẹ jẹ riẹ nọ a ti fi obọ họ kẹ owhẹ ru oware uwoma. (Ahwo Kọlọsi 3:20) Who you ọsẹgboni ra, yọ whọ gwọlọ lẹlẹ kpohọ oria ovo ho keme whọ riẹ nọ o te lẹliẹ eva dha ae. (Itẹ 10:1) Onana u ti rovie uvẹ fihọ nọ whọ sae rọ ta kẹ ae oware nọ whọ rọ gwọlọ nya.

 Oware nọ u re noi ze: Ọsẹgboni ra a te riẹ nọ who you rai jẹ be kẹ ae adhẹẹ. Nọ a te rri nọ ayare ra na o thọ họ, a sae kẹ owhẹ uvẹ nya.

Oware nọ O rẹ Sae Lẹliẹ Ọsẹgboni Se

Ọsẹgboni ra a wọhọ ahwo nọ a rẹ dhogbo evaọ oria ame-ọya, ae a rẹ kake ruẹ eware nọ e rẹ sae wha omonwa se owhẹ

 Joma kẹ oriruo jọ ro dhesẹ onana: Otẹrọnọ whọ gwọlọ ya ame, u muẹro nọ whọ te gwọlọ ya evaọ oria nọ ahwo nọ a rẹ dhogbo a rrọ nọ a rẹ sai si owhẹ no uye. Fikieme? Keme nọ whọ rrọ eva ame na, whọ be ruẹ thabọ họ. Rekọ otu nọ a rẹ dhogbo na a rrọ oria nọ a sae jọ ruẹ eware nọ e rẹ sae wha omonwa se owhẹ. Epọvo na re, ọsẹgboni ra a wo eriariẹ vi owhẹ, fikiere a rẹ ruẹ eware nọ e rẹ sae wha uye se owhẹ nọ whọ rẹ ruẹ hẹ. Wọhọ otu nọ e rẹ dhogbo evaọ oria ame-ọya na, ọsẹgboni ra a gwọlọ whaha owhẹ omawere he, rekọ a gwọlọ fi obọ họ kẹ owhẹ whaha eware nọ e rẹ sae wha uye se owhẹ evaọ uzuazọ.

 Oware ofa nọ o rẹ sae lẹliẹ ae se ona: Ọsẹgboni ra a gwọlọ thọ owhẹ. Fiki uyoyou nọ a wo kẹ owhẹ, a rẹ kẹ owhẹ uvẹ kpohọ oria nọ u kiehọ, a vẹ jẹ daoma whaha owhẹ oria nọ u kiehọ kẹ owhẹ hẹ. Nọ whọ tẹ ta kẹ ae nọ whọ gwọlọ ru oware jọ, a re roro sọ a sae kẹ owhẹ uvẹ ru oware nọ whọ gwọlọ ru na keme oware jọ u te noi ze, ae o rrọ uzou. Nọ a tẹ ruẹ nọ oware enwoma ovo u ti te owhẹ hẹ ẹsiẹe a sae rọ kẹ owhẹ uvẹ nọ who ru oware nọ whọ gwọlọ ru na.

Epanọ A Sae rọ Rọwo kẹ Owhẹ

Oware nọ whọ rẹ sai ru

 Ta uzẹme kẹ ae: Nọ omara nọ: ‘Fikieme mẹ rọ ginẹ gwọlọ kpohọ oria nana? Kọ oware nọ a ti ru oye o be wọ omẹ nya manikọ mẹ gwọlọ nya fikinọ ewha mẹ a be nya? Kọ fikinọ ohwo jọ nọ ọ rrọ omẹ ẹro ọ be nya mẹ rọ gwọlọ nya?’ Kẹsena whọ vẹ ta oware nọ o be wọ owhẹ nya na kẹ ọsẹgboni ra. A jọ emaha ẹdẹjọ, yọ a riẹ owhẹ lafi. Fikiere, whọ gbẹ make ta uzẹme na kẹ ae he, a te riẹ ghele. Rekọ nọ whọ tẹ ta eva kẹ ae, a ti fievahọ owhẹ, yọ ohrẹ nọ a te kẹ owhẹ u ti fi obọ họ kẹ owhẹ. (Itẹ 7:1, 2) Rekọ nọ whọ gbẹ ta uzẹme kẹ ae he, u ti ru nọ a ti gbe ro fievahọ owhẹ hẹ, yọ a te rọwo kẹ owhẹ nọ whọ nya ha.

 Oke nọ whọ rẹ rọ vuẹ ae: Who mi ọsẹgboni ra uvẹ hẹ nọ a tẹ nwani no iruo te uwou obọ, hayo nọ a te bi ru oware nọ o jọ gwọlọ nọ a re muẹrohọ otọ. Ta kẹ ae evaọ okenọ a bi serihọ. Rekọ whọ hẹrẹ bẹsenọ oke nọ whọ gwọlọ ro kpohọ oria na u re te no taure whọ tẹ te vuẹ ae he. O te were ọsẹgboni ra re a kẹ owhẹ uyo ovovẹrẹ hẹ. Kake ta kẹ ae, re a sai roro kpahe ẹme na.

 Ẹme nọ whọ te ta kẹ ae: Ta ẹme nọ u re vẹ ae ẹro. Ta oware nọ whọ ginẹ gwọlọ ru kẹ ae. Ma rehọ iẹe nọ ọsẹgboni ra a nọ owhẹ nọ: “Amono a te jọ etẹe?” “Kọ ohwo jọ nọ ọ rẹ sae rẹrote eware ọ te jariẹ?” hayo “Oke vẹ who ti ro zihe ze?” Nọ who te yo kẹ ae nọ “Mẹ riẹ hẹ,” u ti kiehọ ae oma ha.

 Uruemu nọ who re dhesẹ: Who rri ọsẹgboni ra wọhọ ewegrẹ hẹ. Rri rai wọhọ egbẹnyusu ra, keme evaọ oghẹrẹ kpobi kẹhẹ, a gwọlọ ewoma ra. Who te rri ọsẹgboni ra ere, u ti ru nọ whọ te gbẹ rọ wọso ai hi, je ru nọ a te rọ rọwo kẹ owhẹ.

 Dhesẹ kẹ ọsẹgboni ra inọ who wo areghẹ te epanọ whọ te rọ rọwo uyo kpobi nọ a kẹ owhẹ je ru lele iei. Who te ru ere, a ti rri owhẹ nọ who gine wo areghẹ. Onana u ti ru nọ a te sae rọ rọwo kẹ owhẹ evaọ oke ọfa nọ who te mi ai uvẹ.