Obe “Ruẹ Otọ Uwoma Na” yọ emapo Ebaibol na. Obe na o sai fiobọhọ kẹ owhẹ kiẹ kodo evaọ okenọ who bi se hayo wuhrẹ Ebaibol na kẹ omara. A jọ Ebaibol na fodẹ eria, ewho, gbe ekwotọ sa-sa. Whọ tẹ be hai rri emapo na, u ti ru Ebaibol nọ who bi se hayo wuhrẹ were ziezi. Obe “Ruẹ Otọ Uwoma Na” u ti fiobọhọ kẹ owhẹ ruẹ eria gbe ekwotọ sa-sa nọ iku Ebaibol na e jọ via. Yọ oghẹrẹ nọ ekwotọ oke yena e jọ u ti fiobọhọ kẹ owhẹ riẹ oware nọ o soriẹ nọ oghẹrẹ eware jọ e rọ via evaọ Ebaibol na.

Emapo gbe echate buobu nọ a rehọ ekọlọ drọ via gbalọ nọ i dhesẹ eria sa-sa evaọ oke Ebaibol e rrọ obe “Ruẹ Otọ Uwoma Na.” Obe nana u te je wo iwoho, te enọ a rehọ ekọmputa drọ, gbe emamọ eware efa nọ e te lẹliẹ uwuhrẹ omobọ ra were owhẹ ziezi.

Emapo Ebaibol na u ti fiobọhọ kẹ owhẹ

• wo otoriẹ eria nọ Abraham, Aiziki, gbe Jekọp a nyate

• ruẹ idhere nọ ahwo Izrẹl a nya evaọ okenọ a je no igbo Ijipti kpobọ Ẹkwotọ Eyaa na

• ruẹ oria nọ ẹkwotọ Izrẹl ọ jọ gbe eria nọ erẹwho ewegrẹ rai e jọ

• ruẹ eria nọ Jesu ọ nyate evaọ okenọ ọ jẹ ta usi uwoma na

• riẹ epanọ ekwotọ esuo ivie nọ a fodẹ evaọ Ebaibol na e rro te, wọhọ Babilọn, Grisi, gbe Rom

Whọ sae ruẹ emapo Ebaibol nana ọvọvẹ evaọ Watchtower ONLINE LIBRARY.