Kpohọ eme nọ e riẹ eva

ERIA EBAIBOL NỌ A RU VẸ

Ọnyano 20:12—“Rọ Ọghọ kẹ Ọsẹ Ra avọ Oni Ra”

 “Rọ ọghọ kẹ ọsẹ ra avọ oni ra, re whọ ruẹse rria oke krẹkri evaọ ẹkwotọ nọ Jihova Ọghẹnẹ ra ọ be kẹ owhẹ na.”—Ọnyano 20:12, Efafa Akpọ Ọkpokpọ.

 “Rehọ adhẹ kẹ ọsẹ avọ oni ra, re whọ ruẹse ria otọ nọ ỌNOWO na Ọghẹnẹ ra ọ kẹ owhẹ kri.”—Ọnyano 20:12, Ebaibol Ẹri Na.

Otofa Eme nọ E Rrọ Ọnyano 20:12

 Ọghẹnẹ o jie uzi kẹ ahwo Izrẹl nọ a rọ ọghọ kẹ ọsẹgboni rai. Eyaa nọ Jihova ọ ya lele uzi na yọ ẹjiroro ọfa nọ ohwo o re ro koko uzi na. A re se izi nọ Jihova ọ kẹ ahwo Izrẹl na Uzi Mosis. Yọ o gba Ileleikristi họ nọ a re koko Uzi Mosis na nẹnẹ hẹ. Rekọ oyena u dhesẹ nọ izi Ọghẹnẹ i nwene no ho, keme oware nọ o rri nọ oware uwoma hayo uyoma evaọ oke yena, o gbe bi rri rie epọvo na nẹnẹ. Fikiere, u fo nọ Ileleikristi a rẹ hai roro kpahe ẹjiroro nọ Ọghẹnẹ o ro fi izi yena họ jẹ daoma ru oware nọ o rẹ were iẹe ẹsikpobi.—Ahwo Kọlọsi 3:20.

 Nọ emọ kpobi, te emaha te ekpako, a tẹ be hai yoẹme kẹ esẹgbini rai, a rẹ rọ ere dhesẹ nọ a be rọ ọghọ kẹ ae. (Iruo-Izerẹ 19:3; Itẹ 1:8) Nọ emọ e tẹ make kpako no je tube yẹ emọ obọrai no dede, a rẹ gbẹ daezọ ọsẹgboni rai ghele je fiobọhọ kẹ ae. Wọhọ oriruo, u fo nọ a rẹ rẹrote ai ziezi nọ a tẹ kpako no, jẹ hai vi ugho se ai nọ o tẹ gwọlọ ere.—Matiu 15:4-6; 1 Timoti 5:4, 8.

 Muẹrohọ nọ a vuẹ emọ Izrẹl na nọ a rọ ọghọ kẹ ọsẹ rai avọ oni rai, onọ u dhesẹ epanọ oni o wuzou te evaọ uviuwou. (Itẹ 6:20; 19:26) Yọ ere u fo nọ emọ a re ru nẹnẹ re.

 Rekọ orọnọ evaọ oware kpobi emọ e rẹ jọ yoẹme kẹ esẹgbini rai hi. Wọhọ oriruo, u fo nọ emọ Izrẹl a re yoẹme kẹ ọsẹgboni rai hayo omọfa jọ họ nọ a tẹ gwọlọ nọ a ru oware nọ o rẹ dha Ọghẹnẹ eva. (Iziewariẹ 13:6-8) Ere ọvona o rrọ nẹnẹ re, o gwọlọ nọ Ọghẹnẹ ọye Ileleikristi a “re yoẹme kẹ orọnikọ ahwo ho.”—Iruẹru Ikọ 5:29.

 Evaọ uzi nọ Ọghẹnẹ ọ kẹ emọ Izrẹl na, ọ ya eyaa nọ emọ nọ e be kẹ ọsẹgboni rai adhẹẹ a te ‘rria oke krẹkri yọ eware i ti woma kẹ ae evaọ ẹkwotọ’ nọ Ọghẹnẹ ọ kẹ rae na. (Iziewariẹ 5:16) Uye nọ u re te emọ nọ e kpako no nọ i bi yoẹme kẹ Ọghẹnẹ hẹ jẹ be wọso ọsẹgboni rai u re te emọ itieye na ha. (Iziewariẹ 21:18-21) Epọvo na o rrọ nẹnẹ re. (Ahwo Ẹfisọs 6:1-3) O gwọlọ nọ mai kpobi, te ọmaha te ọkpako, ma re koko izi Ọghẹnẹ nọ ọ ma omai na. Yọ emọ nọ i bi yoẹme kẹ Ọghẹnẹ gbe esẹgbini rai a rẹ ginẹ rria tọ wọhọ epanọ Ọghẹnẹ ọ ya eyaa na. Yọ a te tubẹ rria bẹdẹ bẹdẹ evaọ obaro dede.—1 Timoti 4:8; 6:18, 19.

Eme nọ E Wariẹ Ọnyano 20:12 Họ

 Ma te rri oria nọ uzi nọ Ọghẹnẹ o jie evaọ Ọnyano 20:12 na o jọ romavia evaọ usu Izi Ikpe na, u re wuhrẹ omai oware jọ. (Ọnyano 20:1-17) Oware vẹ oye? Izi nọ a re no no re a te ti te uzi yena i dhesẹ oware nọ u fo nọ ahwo Izrẹl na a re ru kẹ Ọghẹnẹ. Wọhọ oriruo, o gwọlọ nọ ọye ọvo a rẹ gọ. Izi nọ i lele i rie e tẹ ta kpahe oware nọ ma re ru kẹ ahwo-akpọ ibe mai, wọhọ onọ o jọ gwọlọ nọ ohwo ọ rẹ talamu ọzae hayo aye riẹ na, gbe onọ o ta nọ ohwo o tho uji hi na. Fikiere, nọ ohwo o te bi koko uzi nọ o ta nọ, “rọ ọghọ kẹ ọsẹ ra avọ oni ra” na, o rẹ wọhọ ẹsenọ ọ be rọ ukpokpo ovo ro kpe evra ivẹ. Keme oware nọ u fo nọ o re ru kẹ Jihova avọ onọ u fo nọ o re ru kẹ ahwo-akpọ ibe riẹ, eye ọ be jọ uzi nana ru kugbe ẹsiẹvo na.

Se obe Ọnyano izou 20, re who je rri eme-obotọ nọ a ro ru eme jọ vẹ, gbe eria Ebaibol efa nọ a fodẹ evaọ etẹe.