Kpohọ eme nọ e riẹ eva

ERIA EBAIBOL NỌ A RU VẸ

Mak 1:15​—“Uvie Ọghẹnẹ O Kẹle No”

“Oke nọ a fihọ na u te no, yọ Uvie Ọghẹnẹ o kẹle no. Wha kurẹriẹ, je fi ẹrọwọ họ usi uwoma na.”—Mak 1:15, Efafa Akpọ Ọkpokpọ.

“Oke u te [no], uvie Ọghẹnẹ o kẹle ino: Wha kuevarẹriẹ, wha rọwo usiuwoma na.”—Mak 1:15, Ebaibol Ẹri Na.

Otofa Eme nọ E Rrọ Mak 1:15

Jesu ọ jọ oria ikere yena ta nọ Uvie Ọghẹnẹ * “o kẹle no,” keme ọyomariẹ nọ ọ te jọ Ovie Uvie yena ọ jọ kugbe ahwo na evaọ oke yena.

Nọ Jesu ọ ta nọ Uvie Ọghẹnẹ o kẹle no na, orọnikọ u dhesẹ nọ Uvie na u muhọ esuo no evaọ oke yena ha. Ẹme ọfa jọ nọ Jesu ọ ta kẹ ilele riẹ u dhesẹ nọ okenọ Uvie na u ti ro muhọ esuo o gbẹ jọ obaro. (Iruẹru Ikọ 1:6, 7) Rekọ otọ ẹme riẹ na họ, ọyomariẹ nọ ọ te jọ Ovie * Uvie yena ọ ginẹ romavia no evaọ uzedhe ukpe nọ Ebaibol ọ ruẹaro nọ ọ te rọ romavia. Oyejabọ nọ Jesu ọ rọ ta nọ: “Oke nọ a fihọ na u te no,” koyehọ okenọ ọyomariẹ o ti ro mu usi uwoma Uvie na họ ẹta.—Luk 4:16-21, 43.

Re ahwo a sai wo erere no usi uwoma Uvie na ze, o gwọlọ nọ a re kurẹriẹ, koyehọ a rẹ siọ ikpehre eware nọ a je ru ba a ve koko izi Ọghẹnẹ evaọ uzuazọ rai. Yọ ahwo nọ a gine kurẹriẹ a rọ ere dhesẹ nọ a wo ẹrọwọ inọ Uvie na u ti ru eware nọ Ọghẹnẹ ọ ya eyaa rai na.

Eme nọ E Wariẹ Mak 1:15 Họ

Jesu ọ ta eme yena evaọ okenọ o je mu iruo odibọgba riẹ họ evaọ Galili. Ma rẹ jọ obe Matiu 4:17 ruẹ ọkpọ eme yena. Oria ikere yena o ta nọ “no umuo oke yena vrẹ,” Jesu o te mu usi uwoma Uvie Ọghẹnẹ họ ewhowho. Uvie Ọghẹnẹ họ uzedhe uzoẹme nọ Jesu Kristi ọ jẹ rọ ta usi uwoma. Evaọ ebe Usi Uwoma ene * na, unuẹse nọ a fodẹ Uvie na u bu vi asia udhusoi (100), yọ eme nọ Jesu ọ ta a jọ mae fodẹ iẹe. Uvie Ọghẹnẹ họ oware nọ Jesu ọ mae ta ẹme kpahe.

Se obe Mak uzou 1, re who je rri eme-obotọ nọ a ro ru eme jọ vẹ, gbe eria Ebaibol efa nọ a fodẹ evaọ etẹe.

^ edhe-ẹme 3 Uvie Ọghẹnẹ yọ egọmeti nọ Ọghẹnẹ o ro mu evaọ obọ odhiwu re u ru oreva riẹ gba evaọ otọakpọ na. (Daniẹl 2:44; Matiu 6:10) Whọ tẹ gwọlọ riẹ eware efa kpahe ẹme nana, rri uzoẹme na, “Eme Họ Uvie Ọghẹnẹ?

^ edhe-ẹme 4 O gwọlọ nọ a rẹ rehọ Jesu mu ovie re ọ tẹ te sai ru oware nọ Ebaibol na ọ ruẹaro riẹ nọ ọyomariẹ nọ ọ rrọ Mesaya na o ti ru. Whọ sai rri uzoẹme na, “Kọ Eruẹaruẹ nọ I Kiekpahe Mesaya na I Dhesẹ nọ Jesu Họ Mesaya Na?” re whọ ruẹ eruẹaruẹ Ebaibol nọ i dhesẹ nọ Jesu Kristi họ Mesaya na.

^ edhe-ẹme 6 Ebe Usi Uwoma ene na họ ebe ọsosuọ evaọ abọ Ikereakere Griki Ileleikristi na, onọ a re je se Ọvọ Ọkpokpọ na. Yọ whọ rẹ jọ eva rai ruẹ iku uzuazọ Jesu gbe oghẹrẹ nọ o je ro ru iruo odibọgba riẹ.