Kpohọ eme nọ e riẹ eva

ERIA EBAIBOL NỌ A RU VẸ

Jọn 3:16​—“Keme Ọghẹnẹ O You Akpọ na Hrọ”

Jọn 3:16​—“Keme Ọghẹnẹ O You Akpọ na Hrọ”

 “Keme Ọghẹnẹ o you akpọ na gaga te epanọ o ro siobọno Ọmọ ọvo riẹ, re ohwo kpobi nọ o fi ẹrọwọ họ iẹe o gbe whu hu rekọ o ve wo uzuazọ ebẹdẹ bẹdẹ.”—Jọn 3:16, Efafa Akpọ Ọkpokpọ.

 “Keme Ọghẹnẹ o you akpọ na hrọ, ọ jẹ rehọ Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.”—Jọn 3:16, Ebaibol Ẹri Na.

Otofa Eme nọ E Rrọ Jọn 3:16

 Ọghẹnẹ o you omai gaga, yọ ọ gwọlọ nọ ma rria bẹdẹ bẹdẹ. Oye u ru nọ o ro vi Ọmọ riẹ, Jesu Kristi ziọ otọakpọ na. Okenọ Jesu Kristi ọ jọ otọakpọ na, o ru eware buobu. Wọhọ oriruo, o wuhrẹ ilele riẹ kpahe Ọghẹnẹ, ọnọ ọ rrọ Ọsẹ obọ odhiwu riẹ. (1 Pita 1:3) U te no ere no, Jesu ọ rehọ uzuazọ riẹ ro dheidhe kẹ ahwo-akpọ. Fikiere o gwọlọ nọ ma re fi ẹrọwọ họ Jesu re ma sai wo uzuazọ ebẹdẹ bẹdẹ.

 Ẹme nọ Jesu ọ ta inọ Ọghẹnẹ o “siobọno Ọmọ ọvo riẹ” * na u re ru omai riẹ epanọ Ọghẹnẹ o gine you akpọ na te. Jesu yọ Ọmọ oghẹrẹsa kẹ Ọghẹnẹ. Ẹvẹ o rọ rrọ ere? Keme evaọ usu eware kpobi nọ Ọghẹnẹ ọ ma na, Jesu ọvo ọ rehọ obọ riẹ ma dẹẹ. (Ahwo Kọlọsi 1:17) Ọye họ “ọmọ ọsosuọ evaọ emama kpobi.” (Ahwo Kọlọsi 1:15) Ọye Ọghẹnẹ ọ rọ ma eware efa kpobi, makọ ikọ-odhiwu na dede. Ghele na, Jihova * Ọghẹnẹ ọ rehọ unevaze siobọno Ọmọ ọghaghae riẹ na ze “re ọ gbodibo je siobọno uzuazọ riẹ rọkẹ ẹtanigbo ahwo buobu.” (Matiu 20:28) Jesu ọ ruẹ uye je whu re ọ sai si omai no igbo uzioraha gbe uwhu, onọ ma reuku riẹ mi Adamu, ọzae ọsosuọ na.​—Ahwo Rom 5:8, 12.

 Re a ta nọ ma fi ẹrọwọ họ Jesu, orọnikọ ma rẹ rọwo nọ o whu kẹ omai ọvo ho. O gwọlọ nọ ma re yoẹme kẹe jẹ rọ aro kele emamọ iruemu riẹ. (Matiu 7:24-27; 1 Pita 2:21) Ebaibol na ọ ta nọ: “Ọnọ o fi ẹrọwọ họ Ọmọ na o re wo uzuazọ ebẹdẹ bẹdẹ; ọnọ ọ ghẹmeeyo kẹ Ọmọ na o ti wo uzuazọ họ.”—Jọn 3:36.

Eme nọ E Wariẹ Jọn 3:16 Họ

 Jesu ọ ta eme nana evaọ okenọ o je lele osu egagọ ahwo Ju nọ a re se Nikodimọs ta ẹme. (Jọn 3:1, 2) Jesu ọ vuẹ riẹ eware buobu kpahe Uvie Ọghẹnẹ * gbe oghẹrẹ nọ a rẹ rọ “wariẹ ohwo yẹ.” (Jọn 3:3) Jesu ọ tẹ jẹ ta kpahe oghẹrẹ nọ ọyomariẹ o ti ro whu. Ọ ta nọ: “A te kpare Ọmọ ohwo kpehru [kare Ọmọ ohwo fihọ ure] hrọ, re ohwo kpobi nọ ọ rọwo e riẹ ọ ruẹsi wo uzuazọ ebẹdẹ bẹdẹ.” (Jọn 3:14, 15) Ọ tẹ jẹ vuẹe nọ uyoyou ulogbo nọ Ọghẹnẹ o wo kẹ ahwo-akpọ, oye u ru nọ o ro rovie uvẹ nana kẹ ae na. Okenọ Jesu o je ku ẹme riẹ na họ, ọ tẹ vuẹe nọ re ohwo ọ sai wo uzuazọ, o gwọlọ nọ o re wo ẹrọwọ, o ve je ru eware nọ e rẹ were Ọghẹnẹ.—Jọn 3:17-21.

^ edhe-ẹme 4 Ẹme Griki nọ a fa “ọvo” na họ monogenes, onọ obe jọ o fa otọ riẹ nọ, “ọvo kọ ọvo, . . . ọrọ oghẹrẹsa, ọnọ a rẹ ruẹ obọ riẹ hẹ.”—Obe na, A Greek-English Lexicon of the New Testament and Other Early Christian Literature, ẹwẹ. 658.

^ edhe-ẹme 4 Jihova họ odẹ Ọghẹnẹ.—Olezi 83:18.

^ edhe-ẹme 6 Uvie Ọghẹnẹ, onọ a re je se “Uvie odhiwu” na, yọ egọmeti nọ ọ rrọ obọ odhiwu. (Matiu 10:7; Eviavia 11:15) Ọghẹnẹ ọ rehọ Jesu Kristi mu re ọ jọ Ovie Uvie yena. Yọ Uvie yena Ọghẹnẹ o ti ro ru ẹjiroro riẹ kpahe otọakpọ na gba. (Daniẹl 2:44; Matiu 6:10) Re whọ sae riẹ eware efa kpahe ẹme nana, rri uzoẹme na, “Eme họ Uvie Ọghẹnẹ?