Kpohọ eme nọ e riẹ eva

ERIA EBAIBOL NỌ A RU VẸ

Jọn 1:1—“Ẹme na Ọ Jọ Evaọ Emuhọ”

Jọn 1:1—“Ẹme na Ọ Jọ Evaọ Emuhọ”

 “Ẹme na ọ jọ evaọ emuhọ, Ẹme na ọ jọ kugbe Ọghẹnẹ, yọ Ẹme na ọ jọ ọghẹnẹ.”—Jọn 1:1, Efafa Akpọ Ọkpokpọ.

 “Ẹme na ọ jọ evaọ emuhọ, yọ Ẹme na ọ jọ kugbe Ọghẹnẹ, yọ Ẹme na họ ọnọ ọ jọ Ọghẹnẹ.”—Jọn 1:1, Ebaibol New International Version. *

Otofa Jọn 1:1

 Oria ikere nana o dhesẹ igogo eware jọ kpahe uzuazọ Jesu taure ọ tẹ te jọ ohwo evaọ otọakpọ. (Jọn 1:14-17) Evaọ owọ avọ 14, “Ẹme na” (hayo “Logos na,” evaọ Griki, ho loʹgos) yọ odẹ-ova. O wọhọ nọ a rọ odẹ-ova na “Ẹme na” ro se Jesu fiki ọkwa nọ o wo nọ ọ rẹ rọ vuẹ amọfa izi gbe ehrẹ nọ i no obọ Ọghẹnẹ ze. Evaọ okenọ Jesu ọ jẹ ta usi uwoma evaọ otọakpọ, ọ gbẹ jẹ vuẹ ahwo ẹme Ọghẹnẹ; yọ nọ ọ maki zihe kpobọ odhiwu no na, ọ gbẹ be vuẹ ahwo ẹme Ọghẹnẹ.—Jọn 7:16; Eviavia 1:1.

 “Emuhọ” nọ a ta kpahe na u dhesẹ okenọ Ọghẹnẹ o ro mu eware họ ẹma nọ ọ rọ ma Ẹme na. No umuo oke yena vrẹ, Ọghẹnẹ ọ tẹ rọ Ẹme na ma eware efa kpobi. (Jọn 1:2, 3) Ebaibol na ọ ta nọ Jesu họ “ọmọ ọsosuọ evaọ emama kpobi” yọ “ẹkwoma riẹ a rọ ma eware efa kpobi.”—Ahwo Kọlọsi 1:15, 16.

 Nọ oria ikere na o ta nọ “Ẹme na ọ jọ ọghẹnẹ” na, u dhesẹ nọ Jesu ọ jọ wọhọ Ọghẹnẹ taure ọ tẹ te ziọ otọakpọ. A dhesẹ Jesu enẹ keme ọtota Ọghẹnẹ ọ rrọ, ọ tẹ jẹ rrọ Ọmọ ọsosuọ Ọghẹnẹ nọ Ọghẹnẹ ọ rọ ma eware efa kpobi.

Eme nọ E Wariẹ Jọn 1:1 Họ

 A jọ obe Jọn nọ ọ rrọ Ebaibol na gbiku uzuazọ Jesu evaọ otọakpọ gbe iruo odibọgba riẹ. Eme nọ e rrọ obọ emuhọ uzou ọsosuọ obe Jọn na i dhesẹ uzuazọ nọ o yeri taure o te ti zihe ruọ ohwo, obọdẹ usu nọ o wo kugbe Ọghẹnẹ, gbe obọ nọ o wo evaọ eware nọ Ọghẹnẹ o ru kugbe ahwo-akpọ. (Jọn 1:1-18) Iku obe Jọn na i fiobọhọ kẹ omai riẹ eme nọ Jesu ọ ta gbe eware nọ o ru evaọ okenọ ọ jẹ ta usi uwoma evaọ otọakpọ.—Jọn 3:16; 6:38; 12:49, 50; 14:28; 17:5

Eriwo Ọthọthọ Kpahe Jọn 1:1

 Eriwo Ọthọthọ: Oria Ebaibol na u dhesẹ nọ Ẹme na họ Ọghẹnẹ Erumeru.

 Uzẹme ẹme na: Nọ orọnọ oria Ebaibol na o ta nọ “Ẹme na ọ jọ kugbe Ọghẹnẹ” na, u dhesẹ nọ imava oria na o be ta kpahe. Ẹme na ọ rẹ sae jọ “kugbe Ọghẹnẹ,” ọ vẹ jẹ jọ Ọghẹnẹ Erumeru na evaọ oke ovona ha. Eme efa nọ e rrọ uzou yena i te je dhesẹ nọ orọnikọ Ẹme na họ Ọghẹnẹ Erumeru hu. Jọn 1:18 o ta nọ “ohwo ọvo ọ re ruẹ Ọghẹnẹ evaọ oke ovo ho.” Rekọ ahwo a ruẹ Ẹme na, koyehọ Jesu, keme Jọn 1:14 o ta nọ “Ẹme na o zihe ruọ ohwo jẹ rria evaọ udevie mai, yọ ma ruẹ oruaro riẹ.”

 Eriwo Ọthọthọ: Ẹme na o wo emuhọ họ.

 Uzẹme ẹme na: Orọnikọ “emuhọ” nọ oria Ebaibol yena o ta kpahe na yọ “emuhọ” Ọghẹnẹ hẹ, keme Ọghẹnẹ o wo “emuhọ” họ. Jihova * Ọghẹnẹ ọ rrọ “no ebẹdẹ bẹdẹ rite ebẹdẹ bẹdẹ.” (Olezi 90:1, 2) Rekọ Jesu Kristi o wo emuhọ. Ọye họ “emuhọ emama Ọghẹnẹ.”—Eviavia 3:14.

 Eriwo Ọthọthọ: Re a se Ẹme na “ọghẹnẹ” u bi wuhrẹ ahwo re a gọ eghẹnẹ buobu.

 Uzẹme ẹme na: Ẹme Griki nọ a re se the·osʹ nọ otofa riẹ o rrọ “Ọghẹnẹ” hayo “ọghẹnẹ,” avọ ẹme Hibru nọ a re se ʼel gbe ʼelo·himʹ nọ o romavia gaga evaọ Ọvo Anwae na i wo otofa ovona. Otofa eme Hibru yena họ “Ohwo Ologbo; Ọgba; Ọnọ Ọ Rrọ Ruaro; Ọgaga,” yọ a rehọ e rai ta ẹme kpahe Ọghẹnẹ erumeru na, eghẹnẹ efa, hayo ahwo-akpọ dede. (Olezi 82:6; Jọn 10:34) Ẹme na họ ọnọ Ọghẹnẹ ọ rọ ma eware efa kpobi, fikiere a rẹ sai dhesẹ iẹe nọ ohwo ologbo hayo ọgba ọ rrọ. (Jọn 1:3) Re a se Ẹme na “ọghẹnẹ” o rọwokugbe eruẹaruẹ nọ e rrọ Aizaya 9:6, nọ o ta nọ a ti se ọnọ Ọghẹnẹ ọ salọ na, koyehọ Mesaya hayo Kristi na “Ọghẹnẹ Ologbo” (Hibru, ʼEl Gib·bohrʹ), rekọ orọnọ “Ọghẹnẹ Erumeru” hu (ʼEl Shad·daiʹ, wọhọ epanọ o rrọ Emuhọ 17:1; 35:11; Ọnyano 6:3; gbe Izikiẹl 10:5).

 Ebaibol na o wuhrẹ vievie he inọ ma gọ eghẹnẹ buobu. Jesu Kristi ọ ta nọ: “Jihova Ọghẹnẹ ra o gba owhẹ họ nọ whọ rẹ gọ, yọ ọye ọvo o gba owhẹ họ nọ who re ru iruo ọrẹri kẹ.” (Matiu 4:10) Ebaibol na ọ tẹ jẹ ta nọ: “Keme dede nọ ejọ e riẹ nọ a bi se eghẹnẹ, makọ evaọ obọ odhiwu hayo evaọ otọakpọ, wọhọ epanọ ‘eghẹnẹ’ buobu gbe ‘ilori’ buobu e riẹ na,  rọkẹ omai, Ọghẹnẹ ọvo ọ rrọ, Ọsẹ na, ọnọ eware kpobi i no obọ riẹ ze, yọ ọye ma rrọ kẹ; yọ Olori ọvo ọ rrọ, Jesu Kristi, ọnọ eware kpobi e rọ ẹkwoma riẹ rrọ, yọ ẹkwoma riẹ ma rọ rrọ re.”—1 Ahwo Kọrint 8:5, 6.

Epanọ A Jọ Ebaibol Efa Fa Jọn 1:1

 “Evaọ emuhọ, Ẹme na ọ jọ. Ẹme na ọ jọ kugbe Ọghẹnẹ, yọ Ẹme na ọ jọ wọhọ Ọghẹnẹ.”—The Bible—An American Translation, 1935, onọ J.M.P. Smith avọ E. J. Goodspeed a fa.

 “Logos na ọ jọ evaọ oke emuhọ kpobi, Logos na ọ jọ kugbe Ọghẹnẹ, Logos na ọ jọ wọhọ Ọghẹnẹ.”—The Bible—Containing the Old and New Testaments, 1950, onọ James Moffatt ọ fa.

 “Ẹme na ọ jọ evaọ emuhọ, ẹme na ọ jọ kugbe Ọghẹnẹ, yọ ẹme na ọ jọ ọghẹnẹ.”—The New Testament in an Improved Version, 1808, onọ Thomas Belsham o kere no efafa New Testament nọ William Newcome ọ fa ze.

 “Ẹme na jọ evaọ emuhọ. Yọ Ẹme na ọ jọ kugbe Ọghẹnẹ. Fikiere Ẹme na ọ jọ wọhọ Ọghẹnẹ.”—The Authentic New Testament, 1958, onọ Hugh H. Schonfield ọ fa.

^ edhe-ẹme 2 Eme nana evona e rrọ Ebaibol King James Version.

^ edhe-ẹme 10 Jihova họ odẹ-oma Ọghẹnẹ.—Olezi 83:18.