Kpohọ eme nọ e riẹ eva

ERIA EBAIBOL NỌ A RU VẸ

Ahwo Rom 10:13​—“Se Odẹ Jihova”

 “Ohwo kpobi nọ o bi se odẹ Jihova a ti siwi ei.”—Ahwo Rom 10:13, Efafa Akpọ Ọkpokpọ.

 “Kohwo kohwo nọ ọ be fa odẹ Ọnowo a re ti siwi ei.”—Ahwo Rom 10:13, Ebaibol Ẹri Na.

Otofa Eme nọ E Rrọ Ahwo Rom 10:13

 Ọghẹnẹ o re ru ọriẹwẹ hẹ. Ọ kẹ ohwo kpobi uvẹ nọ o re ro wo uzuazọ ebẹdẹ bẹdẹ ghelọ orẹwho nọ o no ze kẹhẹ, te oghẹrẹ ovioma nọ o wo, te ọ rrọ ọdafe hayo oyogbe. Rekọ re ma sai wo uzuazọ utioye na, o gwọlọ nọ ma re se odẹ Ọghẹnẹ Erumeru na, Jihova. *Olezi 83:18.

 Eme u dhesẹ re a ta nọ ohwo o bi “se odẹ Jihova”? O gwọlọ nọ ohwo ọ rẹ riẹ odẹ na jẹ hai sei. (Olezi 116:12-14) Rekọ u te no ere no, o gwọlọ nọ ohwo o re fievahọ Ọghẹnẹ jẹ rẹroso ẹe ẹsikpobi.—Olezi 20:7; 99:6.

 Jesu Kristi o rri odẹ Ọghẹnẹ ghaghae gaga. Wọhọ oriruo, ẹme ọsosuọ nọ ọ ta evaọ olẹ nọ ọ rọ kẹ oriruo na họ: “Ọsẹ mai nọ ọ rrọ obọ idhiwu na, jọ odẹ ra o jọ fuafo,” hayo a ru ei ọrẹri. (Matiu 6:9) Jesu ọ tẹ jẹ ta nọ o gwọlọ nọ ma rẹ riẹ Jihova, yoẹme kẹe, je you rie re ma sai wo uzuazọ ebẹdẹ bẹdẹ.—Jọn 17:3, 6, 26.

 Ẹvẹ ma sae rọ ta nọ Jihova a jọ Ebaibol Ẹri Na se “Ọnowo” evaọ obe Ahwo Rom 10:13 na? Ma rẹ sae ta ere keme ẹme nọ ọ rrọ Joẹl 2:32 a wariẹ evaọ etẹe na, yọ evaọ ẹvẹrẹ Hibru ọsosuọ nọ a ro kere Ebaibol na, odẹ Ọghẹnẹ oye o rrọ oria yena orọnikọ “Ọnowo” ho. *

Eme nọ E Wariẹ Ahwo Rom 10:13 Họ

 Evaọ obe Ahwo Rom izou 10, Ebaibol na o dhesẹ vevẹ nọ re ohwo ọ sai wo emamọ usu kugbe Ọghẹnẹ, o gwọlọ nọ o re fi ẹrọwọ họ Jesu Kristi. (Ahwo Rom 10:9) Yọ eme sa-sa nọ a wariẹ no Ọvọ Anwae na ze e ginẹ rọwokugbe ẹme nana. Re ohwo o dhesẹ nọ o wo ẹrọwọ, ọ rẹ ‘rọ unu riẹ ro whowho ei via kẹ amọfa,’ koyehọ ọ rẹ ta usi uwoma na kẹ ahwo kpahe epanọ a sai ro wo esiwo. Amọfa a vẹ rọ enẹ riẹ epanọ a re ro ru oware nọ u fo re a sai wo uzuazọ ebẹdẹ bẹdẹ.—Ahwo Rom 10:10, 14, 15, 17.

Se obe Ahwo Rom izou 10, re who je rri eme-obotọ nọ a ro ru eme jọ vẹ, gbe eria Ebaibol efa nọ a fodẹ evaọ etẹe.

^ edhe-ẹme 3 Unuẹse nọ odẹ Ọghẹnẹ o romavia evaọ ikulu-ebe Ebaibol anwae u bu te oware wọhọ asia idu ihrẹ (7,000). Evaọ ẹvẹrẹ Hibru, ibieme ene nọ a re se Tetragrammaton, eye a ro kere odẹ Ọghẹnẹ. Evaọ Oyibo, a re se odẹ na “Jehovah,” rekọ egba-ewuhrẹ jọ a re sei “Yahweh.”

^ edhe-ẹme 6 O wọhọ nọ idibo Ọghẹnẹ nọ i kere Ikereakere Griki Ileleikristi na a tẹ be wariẹ eme “Ọvọ Anwae” na nọ odẹ Ọghẹnẹ o rrọ, a re fi odẹ na họ oria kpobi nọ o jọ romavia. Obe na, The Anchor Bible Dictionary o ta nọ: “Eware jọ e riẹ nọ e kẹ imuẹro nọ eme jọ hayo eme kpobi nọ a rehọ no Ọvọ Anwae na ze nọ ibieme Hibru ene nọ i dikihẹ kẹ odẹ Ọghẹnẹ na hayo Yahweh e rrọ, a fi rai họ eria yena re evaọ Ọvọ Ọkpokpọ na.” (Uko avọ 6, ẹwẹ-obe avọ 392) Whọ tẹ gwọlọ riẹ eware efa kpahe ẹme nana, jọ Ebaibol Efafa Akpọ Ọkpokpọ ọrọ Ikereakere Efuafo Na rri uzoẹme na, “Odẹ Ọghẹnẹ Evaọ Ikereakere Griki Ileleikristi Na” evaọ oria Ẹme-Ofiba A5. Yọ evaọ Ebaibol Oyibo Efafa Akpọ Ọkpokpọ ọrọ Ikereakere Efuafo na ọrọ ewuhrẹ na, whọ rẹ jọ oria Appendix C2 ruẹ Ebaibol sa-sa nọ odẹ Ọghẹnẹ o rrọ evaọ obe Ahwo Rom 10:13.