Kpohọ eme nọ e riẹ eva

Eme U Dhesẹ re Whọ ‘Rọ Ọghọ kẹ Ọsẹ avọ Oni Ra’?

Uyo nọ Ebaibol na ọ kẹ

Ujaje na “rọ ọghọ kẹ ọsẹ ra avọ oni ra” o romavia unuẹse buobu evaọ Ebaibol na. (Ọnyano 20:12; Iziewariẹ 5:16; Matiu 15:4; Ahwo Ẹfisọs 6:2, 3) U wo ugogo eware ene jọ nọ ohwo o re ru.

  1. Who re yere ae. Nọ whọ tẹ be hai yere ọsẹ avọ oni ra kẹ eware kpobi nọ a ru kẹ owhẹ no yọ whọ be kẹ ae ọghọ. Who re rri ehrẹ nọ a kẹ owhẹ ghaghae. (Itẹ 7:1, 2; 23:26) Ebaibol ọ ta nọ who re rri ọsẹgboni ra inọ ae họ “oruaro” ra, koyehọ, a rẹ were owhẹ oma.—Itẹ 17:6.

  2. Who re yoẹme kẹ ae: Nọ who te bi dhesẹ nọ who vuhu udu nọ Ọghẹnẹ ọ kẹ rai, yọ whọ be rọ ọghọ kẹ ọsẹ avọ oni ra, maero nọ whọ tẹ gbẹ rrọ ọmaha. Ahwo Kọlọsi 3:20 ọ ta kẹ emaha nọ: “Wha yoẹme kẹ esẹgbini rai evaọ oware kpobi, keme onana o rẹ were Olori na.” Makọ Jesu dede ọ rọ unevaze yoẹme kẹ ọsẹgboni riẹ.—Luk 2:51.

  3. Kẹ ae adhẹẹ: (Iruo-Izerẹ 19:3; Ahwo Hibru 12:9) Ẹme nọ whọ be ta gbe oghẹrẹ nọ whọ rọ tae o rẹ mai dhesẹ onana via. Uzẹme o rrọ inọ esẹgbini jọ a re ru eware nọ u re ru ei jọ bẹbẹ re a kẹ ae adhẹẹ. Ghele na, nọ emọ na a gbẹ be ta ẹme orivo hayo dhesẹ uruemu aghẹmeeyo ho yọ a be rọ ọghọ kẹ ọsẹgboni rai. (Itẹ 30:17) Ebaibol na ọ ta inọ, nọ ohwo ọ tẹ ta ẹme oyoma kpahe ọsẹ hayo oni riẹ yọ uzioraha ulogbo.—Matiu 15:4.

  4. Fiobọhọ kẹ ae: Nọ ọsẹgboni ra a tẹ kpako no, a sae gwọlọ obufihọ ra. Whọ sae dawo utho ẹgba ra kpobi re who ru oware nọ a gwọlọ rọ kẹ ae. (1 Timoti 5:4, 8) Wọhọ oriruo, taure Jesu o te ti whu, o ru ọruẹrẹfihotọ epanọ a rẹ rọ rẹrote oni riẹ.—Jọn 19:25-27.

Iroro ethọthọ kpahe ọghọ nọ ohwo ọ rẹ kẹ ọsẹ avọ oni riẹ

Iroro ethọthọ: Re whọ kẹ ọsẹ avọ oni ra ọghọ, whọ rẹ kẹ ae uvẹ re a kpọ orọo ra.

Oware nọ o gba: Ebaibol o wuhrẹ nọ usu imava nọ e rrọ orọo o rẹ kpekpe vi onọ a re wo kugbe amọfa nọ a rrọ ahwo uviuwou rai. Emuhọ 2:24 o ta nọ: “Ọzae ọ rẹ se ọsẹ gbe oni riẹ ba, ọ vẹ gbalọ aye riẹ.” (Matiu 19:4, 5) Ma riẹ inọ enọ e rọo no a sai wo erere no ohrẹ ọsẹgboni hayo egọ avọ inieyae rai ze. (Itẹ 23:22) Ghele na, a sai fi umuo nọ a rẹ nyaba họ evaọ oghẹrẹ nọ imoni rai a re ro dhunu họ ẹme orọo rai.—Matiu 19:6.

Iroro ethọthọ: Ọsẹ avọ oni ra a wo udu oware kpobi.

Oware nọ o gba: Dede nọ Ọghẹnẹ ọ kẹ esẹgbini udu-esuo evaọ uviuwou na, udu nọ a kẹ ohwo-akpọ jọ kpobi u wo umuo, u kpehru vi orọ Ọghẹnẹ hẹ. Wọhọ oriruo, nọ okọto ukpehru jọ o ta kẹ ilele Jesu nọ a ghẹmeeyo kẹ Ọghẹnẹ, ilele na e ta nọ: “Ọghẹnẹ họ osu nọ ma re yoẹme kẹ orọnikọ ahwo ho.” (Iruẹru Ikọ 5:27-29) Epọvo na re, emọ a re yoẹme kẹ esẹgbini “evaọ oghẹrẹ nọ o rẹ were Olori na,” koyehọ, evaọ eware kpobi nọ e wọso izi Ọghẹnẹ hẹ.—Ahwo Ẹfisọs 6:1.

Iroro ethọthọ: Re whọ kẹ ọsẹ avọ oni ra ọghọ o gwọlọ nọ who re lele eware nọ a rọwo evaọ egagọ rai.

Oware nọ o gba: Ebaibol na ọ tuduhọ omai awọ nọ ma dawo oware nọ a bi wuhrẹ omai re ma ruẹ sọ uzẹme o rrọ. (Iruẹru Ikọ 17:11; 1 Jọn 4:1) Ohwo nọ o ru ere, ọ sae ruẹ nọ u ti woma re ọ salọ egagọ efa nọ i wo ohẹriẹ no erọ ọsẹgboni riẹ. A jọ Ebaibol na fodẹ idibo Ọghẹnẹ sa-sa nọ i lele egagọ esẹgbini rai hi, ahwo wọhọ Abraham, Rut, gbe Pọl ukọ na.—Joshua 24:2, 14, 15; Rut 1:15, 16; Ahwo Galesha 1:14-16, 22-24.

Iroro ethọthọ: Re whọ kẹ ọsẹ avọ oni ra ọghọ, o gba owhẹ họ nọ who re wobọ evaọ eware nọ a re ru rọ gọ esemọ.

Oware nọ o gba: Ebaibol ọ ta nọ: “Jihova Ọghẹnẹ ra whọ rẹ gọ, yọ ọye ọvo whọ rẹ rehọ egagọ kpobi kẹ.” (Luk 4:8) Ohwo nọ ọ rẹ gọ esemọ ọ rẹ dha Ọghẹnẹ eva. U te no ere no, Ebaibol na o wuhrẹ nọ “iwhuowhu e riẹ oware ovo ho.”—Ọtausiuwoma Na 9:5, 10; Aizaya 8:19.