Jọn ukọ na ọ ta kpahe ikuigbe Jesu nọ o kere na inọ: “Ọnọ ọ ruẹ o se isẹi, isẹi riẹ uzẹme, ọ riẹ nọ o ta uzẹme, re wha rọwo re.”—Jọn 19:35.

 Oware jọ nọ o rẹ lẹliẹ omai fievahọ ikuigbe Matiu, Mak, Luk, gbe Jọn na họ, okenọ a ro kere ai yọ ahwo buobu nọ eware na e jọ iraro rai via a gbẹ rrọ uzuazọ. Ahwo jọ a ta nọ, nọ Jesu o whu no, ikpe eree ọvo e vrẹ taure Matiu o te ti kere ikuigbe Jesu na, koyehọ oware wọhọ ukpe ọ 41 C.E.Egba-eriariẹ Ebaibol jọ a ta nọ o vrẹ ikpe yena, rekọ aikpobi a rọwo nọ a kere Ikereakere Griki na kpobi evaọ ikpe-udhusoi ọsosuọ.

 Ahwo nọ a rọ ẹro ruẹ Jesu, jẹ jariẹ evaọ etoke uwhu gbe ekparomatha riẹ a gbẹ jọ uzuazọ evaọ oke nọ a ro kere ebe Usiuwoma na; a sai se isẹri kpahe ikuigbe na. O hae jọnọ ikuigbe erue e jọ ikere Usiuwoma na, a hae te fere ae via. Ọgba-eriariẹ Ebaibol jọ nọ a re se F. F. Bruce ọ ta nọ: “Oware jọ nọ o lẹliẹ usiuwoma ikọ ọsosuọ na muẹro gaga họ, a jẹ hae ta kpahe eware nọ enọ e be gaviezọ kẹ ae na a riẹ vevẹ; a jẹ hae ta nọ, ‘Mai yọ isẹi eware enana,’ a ve fibae nọ, ‘Wọhọ epanọ whai omarai wha riẹ re na’ (Iruẹru 2:22).”