Ijo. Ebaibol na ọ ta vevẹ nọ Ọghẹnẹ ọ ma ahwo-akpọ gbe “oghoghẹrẹ” erao avọ ekakọ sa-sa. (Emuhọ 1:12, 21, 25, 27; Eviavia 4:11) O ta nọ oma Adamu avọ Ivi, ọsẹgboni ọsosuọ mai, ahwo-akpọ kpobi a no ze. (Emuhọ 3:20; 4:1) Ebaibol na ọ rọwokugbe uwuhrẹ eghrorotha ha, onọ o ta nọ Ọghẹnẹ ọ ma eware jọ nọ i wo uzuazọ no efa i te hrerẹ no ai ze. O make rrọ ere na, Ebaibol na ọ wọso ẹme nọ egba-eriariẹ e ta ha, inọ eware nọ i wo uzuazọ na ọvuọvo e rrọ oghoghẹrẹ sa.

•  Kọ Ọghẹnẹ ọ ma eware jọ no efa i te hrerẹ no ai ze?

•  Kọ uwuhrẹ eghrorotha o rọwokugbe Ebaibol na?

•  Kọ oghẹrẹ nọ erao gbe ekakọ e sae rọ zọ evaọ oria ọfa na yọ eghrorotha?

 Ahwo nọ a rọwo uwuhrẹ eghrorotha inọ Ọghẹnẹ ọ ma eware jọ no efa i te hrerẹ no ai ze, a wo ọvuọ eriwo riẹ kpahe oghẹrẹ nọ Ọghẹnẹ o ro ru onana. Wọhọ epanọ obe na Encyclopædia Britannica o ta, ahwo jọ a rọwo nọ “edhere jọ nọ Ọghẹnẹ ọ be rọ kpọ eware nọ e rrọ akpọ na họ, otẹrọnọ oria nọ oware na o rrọ na u wou rie oma, ọ rẹ zọ je yẹ.”

 Ahwo nọ a rọwo uwuhrẹ eghrorotha a rẹ jẹ ta nọ:

•   Eware kpobi nọ i wo uzuazọ i hrerẹ no oma esẹ-ode anwae ze.

•   Oware nọ o wo uzuazọ o sai hrerẹ fihọ oghẹrẹ oware ofa nọ o wo uzuazọ.

•   Ọghẹnẹ họ ọnọ o bi ru ei nọ eware na i bi ro hrerẹ fihọ eware efa.

 Uwuhrẹ eghrorotha u bi dhesẹ nọ oghẹrẹ nọ a rọ ma eware nọ Ebaibol ọ ta kpahe evaọ obe Emuhọ na o gba tere he. Rekọ, Jesu ọ ta nọ eme nọ obe Emuhọ o ta kpahe emama na yọ uzẹme. (Emuhọ 1:26, 27; 2:18-24; Matiu 19:4-6) Ebaibol na ọ ta nọ taure Jesu ọ tẹ te ziọ otọakpọ, ọ jẹ rria obọ odhiwu kugbe Ọghẹnẹ, o te je lele Ọghẹnẹ ma “eware kpobi” nọ e rrọ uzuazọ. (Jọn 1:3) Fikiere, eme nọ ahwo a ta inọ Ọghẹnẹ ọ ma eware jọ no efa i te hrerẹ no ai ze na, o rọwokugbe oware nọ Ebaibol na o wuhrẹ hẹ.

 Ebaibol na ọ ta kpahe epanọ eware nọ a ma na i ti wo ọvuọ oghoghẹrẹ riẹ bu te he. Oghoghẹrẹ erao nọ Ọghẹnẹ ọ ma na e sai wo ọvuọ oghẹrẹ rai nọ a tẹ be hai yẹ hayo nọ a tẹ rrọ oria ọfa, epọvo na oghoghẹrẹ ekakọ na e rẹ sai wo ọvuọ oghẹrẹ rai nọ a tẹ kọ ai fihọ oghẹrẹ oria ọfa, yọ Ebaibol na ọ wọso onana vievie he. Onana yọ eghrorotha ha dede nọ ahwo jọ a rẹ ta ere, keme orọnikọ oghẹrẹ uzuazọ ọfa jọ u bi noi ze he.