Kpohọ eme nọ e riẹ eva

Kọ Ọghẹnẹ O Wo Odẹ?

Uyo nọ Ebaibol na ọ kẹ

Ohwo-akpọ kpobi o wo odẹ. Kọ u gbe fo nọ Ọghẹnẹ o re wo odẹ re? Imava nọ e rrọ egbẹnyusu a rẹ riẹ odẹ ohwohwo je se odẹ ohwohwo. Kọ ahwo nọ a rrọ egbẹnyusu Ọghẹnẹ a gbẹ riẹ odẹ riẹ re?

Ọghẹnẹ ọ jọ Ebaibol na ta nọ: “Mẹ họ Jihova. Oye họ odẹ mẹ.” (Aizaya 42:8, NW) Jihova o wo edẹ-ovao buobu. Ejọ rai họ, “Ọghẹnẹ Erumeru,” “Ọnowahwo,” gbe ‘Ọmemama.’ Ghele na ọ gwọlọ nọ ma riẹ jẹ hai se odẹ riẹ.—Emuhọ 17:1; Iruẹru 4:24; 1 Pita 4:19.

Evaọ efafa Ebaibol na buobu, a rẹ ruẹ odẹ Ọghẹnẹ evaọ obe Ọnyano 6:3. Etẹe na ọ ta nọ: “Mẹ rehọ oma via kẹ Abraham, gbe Aiziki gbe Jekọp, wọhọ Ọghẹnẹ Erumeru, rekọ YAWE na [koyehọ Jihova], odẹ mẹ na, me ru riei vẹ kẹ ae he.”

Lele epanọ a fa riẹ no Oyibo ze, evaọ ẹvẹrẹ Isoko, a be hai se odẹ na “Jihova.” Dede nọ ahwo buobu a re kere odẹ na “Yawe,” Jihova họ ọnọ ahwo a mae riẹ. Orọnikọ Oyibo a ro kere abọ ọsosuọ Ebaibol na ha, rekọ ẹvẹrẹ Hibru, onọ a re se no obọze kpohọ ẹkpẹlobọ. Evaọ ẹvẹrẹ Hibru, ibieme nana i dikihẹ kẹ odẹ Ọghẹnẹ, יהוה. Ibieme ene Hibru yena họ YHWH.