Kpohọ eme nọ e riẹ eva

Kọ Uvie Ọghẹnẹ Yọ Oware nọ O Rrọ Udu Ohwo?

Kọ Uvie Ọghẹnẹ Yọ Oware nọ O Rrọ Udu Ohwo?

Uyo nọ Ebaibol na ọ kẹ

 Ijo, Uvie Ọghẹnẹ yọ oware jọ nọ o rrọ udu Ileleikristi hi. a Uvie Ọghẹnẹ yọ egọmeti nọ a ro mu evaọ obọ odhiwu, fikiere Ebaibol na o se rie “Uvie odhiwu.” (Matiu 4:17) Joma ta kpahe eware jọ evaọ Ebaibol na nọ i dhesẹ nọ Uvie Ọghẹnẹ yọ egọmeti dẹẹ nọ u bi su no obọ odhiwu ze.

  •   Uvie Ọghẹnẹ u wo isu, ahwo nọ u ti su, izi, yọ u ti ru nọ a ti ro ru oreva Ọghẹnẹ evaọ obọ odhiwu gbe otọakpọ.​—Matiu 6:10; Eviavia 5:10.

  •   Egọmeti Ọghẹnẹ, koyehọ Uvie riẹ u ti su “ahwo, erẹwho, gbe itu evẹrẹ sa-sa” evaọ akpọ na. (Daniẹl 7:13, 14) Obọ Ọghẹnẹ udu esuo Uvie na u ti no ze, orọnikọ obọ ahwo-akpọ nọ Uvie na u ti su hu.​—Olezi 2:4-6; Aizaya 9:7.

  •   Jesu ọ ta kẹ ikọ riẹ inọ a ti kuomagbei su evaọ Uvie odhiwu na yọ a te “keria egbara-uvie.”​—Luk 22:28, 30.

  •   Uvie na o te raha ewegrẹ riẹ kpobi no.​—Olezi 2:1, 2, 8, 9; 110:1, 2; 1 Ahwo Kọrint 15:25, 26.

 Ebaibol na o wuhrẹ vievie he inọ Uvie Ọghẹnẹ o rrọ udu ahwo, koyehọ udu ahwo u ti jo su. Ukpoye, Ebaibol na o dhesẹ nọ “ovuẹ Uvie na” hayo “usi uwoma Uvie na” o sai duobọte ohwo udu jẹ lẹliẹ ohwo nwene.​—Matiu 13:19; 24:14.

Eme họ otofa ẹme na “Uvie Ọghẹnẹ o rrọ udevie rai”?

 Fiki oghẹrẹ nọ a jọ efafa Ebaibol jọ fa obe Luk 17:21, u ru nọ ahwo jọ a ro reghe no, fikiere a gbẹ riẹ uzedhe oria nọ Uvie na u bi su no ze he. Wọhọ oriruo, Ebaibol King James Version ọ ta nọ “Uvie Ọghẹnẹ o rrọ owhai oma.” Re ma sai wo otoriẹ oria Ebaibol nana ziezi, o gwọlọ nọ ma rẹ romatotọ se eme nọ e wariẹ e riẹ họ.

Uvie Ọghẹnẹ o jọ udu ahwo Farisi na nọ a jẹ wọso Jesu jẹ gbẹgwae uwhu riẹ uwhremu na ha

 Jesu ọ jẹ ta ẹme nana kẹ isu ahwo Farisi nọ e jẹ wọso iẹe, yọ a jọ usu ahwo nọ a gbẹgwae epanọ a ro kpei uwhremu na. (Matiu 12:14; Luk 17:20) Kọ u gine fo re ohwo o roro nọ Uvie na yọ oware jọ nọ o rrọ udu isu nana nọ e geva thesiwa na? Jesu ọ ta kẹ ae nọ: “Evaọ obeva, wha vọ avọ eviẹhọ gbe emuemu.”​—Matiu 23:27, 28.

 Efafa Ebaibol efa i ru eme Jesu nọ e rrọ obe Luk 17:21 na vẹ inọ: “Uvie Ọghẹnẹ o rrọ kugbe owhai.” (Mai ma kere ibiẹme na mu gbalọ; Contemporary English Version) “Uvie Ọghẹnẹ o rrọ udevie rai.” (Efafa Akpọ Ọkpokpọ) Uvie odhiwu na ọ jọ “kugbe” hayo ọ jọ “udevie” ahwo Farisi na, keme Jesu nọ Ọghẹnẹ ọ salọ re ọ jọ Ovie Uvie na ọye ọ jẹ ta ẹme kẹ ae na.​—Luk 1:32, 33.

a Egagọ buobu a re wuhrẹ nọ Uvie Ọghẹnẹ yọ oware jọ nọ o rrọ ohwo udu hayo nọ o rrọ eva oma na. Wọhọ oriruo, evaọ obọ United State, ichọche jọ nọ a re se Southern Baptist Convention o whowho nọ, Uvie Ọghẹnẹ yọ abọjọ “isuẹsu Ọghẹnẹ evaọ udu gbe uzuazọ ohwo.” Ofariẹ, evaọ obe jọ nọ a re se Jesus of Nazareth nọ Pope Benedict XVI o kere, ọ ta nọ “Uvie Ọghẹnẹ họ, nọ ohwo o te rovie udu riẹ fihọ be gaviezọ” kẹ ẹme Ọghẹnẹ.