Kpohọ eme nọ e riẹ eva

Eme Ebaibol na Ọ ta Kpahe Ohwo nọ Ọ Mọ te Uwhu no nọ A re Keke Aro Fihọ Kpe No?

Eme Ebaibol na Ọ ta Kpahe Ohwo nọ Ọ Mọ te Uwhu no nọ A re Keke Aro Fihọ Kpe No?

Uyo nọ Ebaibol na ọ kẹ

 Ebaibol na ọ nwane ta kpahe ohwo nọ ọ mọ te uwhu no nọ a re keke aro fihọ kpe no dẹe he. a Rekọ, ẹme nọ Ebaibol na ọ ta kpahe uzuazọ gbe uwhu u re fiobọhọ kẹ omai wo eriwo nọ u fo kpahe ẹme nana. O thọ re a kpe ohwo, rekọ nọ ohwo o te te uwhu no, u wo oware ọvuọvo nọ ma re ru re ma siwi uzuazọ riẹ hẹ.

 Ebaibol na ọ ta nọ obọ Ọghẹnẹ “uzuazọ u no ze.” (Olezi 36:9; Iruẹru Ikọ 17:28) Ọghẹnẹ o rri uzuazọ ghaghae. Fikiere, Ọghẹnẹ o mukpahe ohwo okpe gbe ohwo nọ o re keke aro fihọ kpe omobọ riẹ no. (Ọnyano 20:13; 1 Jọn 3:15) U te no ere no, Ebaibol na ọ ta kpahe oware nọ ma re ru re ma siọ uzuazọ mai gbe orọ amọfa ba efihọ ọza. (Iziewariẹ 22:8) Onana u dhesẹ nọ Ọghẹnẹ ọ gwọlọ nọ ma rri uzuazọ ghaghae.

Kọ otẹrọnọ ohwo ọ mọ te uwhu no?

 O tẹ make rọnọ ohwo ọ rẹriẹ ovao dhe uwhu yọ u wo oware ọvo nọ a re ru re a whaha iẹe he, Ebaibol na ọ kuvẹ riẹ hẹ re a kpe ohwo otiọye na no. Oware nọ o via kẹ Sọl, ovie Izrẹl u ru onana vẹ. Okenọ a nwa Sọl oma gaga evaọ ẹmo, ọ tẹ ta kẹ odibo riẹ nọ ọ duwu iei kpe. (1 Samuẹle 31:3, 4) Odibo riẹ na ọ rọwo ho. Rekọ, ọzae ọfa jọ ọ te gu ọrue nọ ọye o kpe Sọl. Devidi nọ o wo ozodhẹ Ọghẹnẹ o brukpe ọzae nana inọ ọ reabe azẹ.​—2 Samuẹle 1:6-16.

Kọ u fo re a ru oware kpobi re a sai siwi uzuazọ ohwo?

 Nọ a tẹ ruẹ nọ ohwo o bi ti whu no, Ebaibol na ọ ta oware ọvo nọ u dhesẹ nọ a ru oware kpobi ro siwi uzuazọ ohwo na ha. Ukpoye, Ebaibol na ọ ta oware nọ o rẹ sai fiobọhọ kẹ omai evaọ ẹme nana. Ma bi whu fikinọ mai yọ erahaizi. Fikiere uwhu yọ ọwegrẹ ologbo. (Ahwo Rom 5:12; 1 Ahwo Kọrint 15:26) Dede nọ ohwo ọvo ọ gwọlọ whu hu, u fo re ma dhozọ uwhu hu, keme Ọghẹnẹ ọ ta nọ ọ te kpare enọ i whu no ze. (Jọn 6:39, 40) Ohwo nọ ọ be mọ nọ o rri uzuazọ ghaghae, ọ rẹ rehọ edhere nọ u fo ro siwi ẹyao riẹ. Ghele na, ọ te gwọlọ usiwo nọ o rẹ lẹliẹ uzuazọ riẹ siotọ họ nọ ọ tẹ ruẹ nọ o te uwhu no.

Kọ ethuwhu yọ uzioraha nọ u wo erọvrẹ hẹ?

 Ijo, Ebaibol na ọ fodẹ ethuwhu wọhọ uzioraha nọ u wo erọvrẹ hẹ hẹ. Dede nọ re ohwo o keke aro fihọ kpe omobọ riẹ no yọ uzioraha ulogbo, b Ọghẹnẹ ọvo ọ riẹ oware nọ o lẹliẹ ohwo na ru oware utioye na, eware wọhọ ẹyao oruẹ, awaọruọ ọgaga, hayo oghẹrẹ ẹyao jọ nọ a reuku riẹ. (Olezi 103:13, 14) Ọghẹnẹ ọ be rọ ẹkwoma Ebaibol na kẹ ahwo nọ a be ruawa omosasọ. Ofariẹ, Ebaibol na ọ ta nọ “ẹkparomatha enọ i kiẹrẹe gbe enọ i kiẹrẹe he ọ te jọ.” (Iruẹru Ikọ 24:15) Onana u dhesẹ nọ ẹruore ẹkparomatha ọ riẹ kẹ ahwo nọ a thuzi ulogbo, makọ ahwo nọ a thuru whu dede.

a Ma te jọ uzoẹme nana ta kpahe ohwo nọ ọ mọ te uwhu no hayo ohwo nọ ọ nwoma gaga nọ a re keke aro fihọ kpe no re ọ siọ oja ba ẹre. Evaọ ẹsejọ, edọkita o re fiobọhọ kẹ oghẹrẹ ahwo itienana re a whu vẹrẹ.

b Umutho ahwo jọ nọ a thuru whu nọ Ebaibol na ọ ta kpahe yọ ahwo nọ a ru lele oreva Ọghẹnẹ hẹ.​—2 Samuẹle 17:23; 1 Ivie 16:18; Matiu 27:3-5.