Kpohọ eme nọ e riẹ eva

Kọ Iku Noa gbe Owhe Ologbo na Yọ Iku-Esia Gheghe?

Kọ Iku Noa gbe Owhe Ologbo na Yọ Iku-Esia Gheghe?

Uyo nọ Ebaibol na ọ kẹ

 Owhe nọ o ku na yọ oware nọ o ginẹ via dẹẹ. Ọghẹnẹ ọ rehọ owhe na raha ahwo omuomu, rekọ ọ ta kẹ Noa nọ o ku okọ re ọ sai siwi ahwo owoma gbe erao na. (Emuhọ 6:11-20) Ma sae rọwo nọ Owhe na o gine ku keme a kere iku na fihọ Ebaibol na, onọ a rọ “ẹkwoma ẹzi Ọghẹnẹ” kere.—2 Timoti 3:16.

 Uzẹme manikọ iku-esia gheghe?

 Ebaibol na ọ ta nọ Noa yọ ohwo dẹẹ, ọ tẹ jẹ ta nọ Owhe na yọ oware nọ o ginẹ via, orọnikọ iku-esia jọ gheghe he.

  •   Ahwo nọ a kere Ebaibol na a rọwo nọ Noa yọ ohwo dẹẹ. Wọhọ oriruo, Ẹzra gbe Luk nọ a rrọ usu ahwo nọ a kere Ebaibol na a jọ ikuigbe rai kere nọ Noa ọ jọ uyẹ orẹwho Izrẹl. (1 Iruẹru-Ivie 1:4; Luk 3:36) Matiu gbe Luk nọ a kere ebe Usi Uwoma na a kere eme nọ Jesu ọ ta kpahe Noa gbe Owhe na fihotọ.—Matiu 24:37-39; Luk 17:26, 27.

     U te no ere no, Izikiẹl ọruẹaro na gbe Pọl ukọ na a ta nọ Noa yọ emamọ oriruo ohwo nọ o wo ẹrọwọ je kiẹrẹe nọ a rẹ raro kele. (Izikiẹl 14:14, 20; Ahwo Hibru 11:7) Kọ o rrọ oware areghẹ re ikere-ebe nana a rehọ ohwo nọ ọ re rria ẹdẹvo ho rọ kẹ oriruo nọ u fo nọ a rẹ raro kele? O rrọ vevẹ nọ Noa avọ ezae gbe eyae efa nọ i wo ẹrọwọ nọ a fodẹ evaọ Ebaibol na a rrọ emamọ oriruo nọ u fo nọ a rẹ raro kele, keme ahwo nana yọ ahwo dẹẹ.—Ahwo Hibru 12:1; Jemis 5:17.

  •   Ebaibol na ọ ta kpahe uzedhe oghẹrẹ nọ Owhe na o ro ku. Orọnikọ eme wọhọ “Egberiyo, ẹdẹjọ riẹ,” Ebaibol na o ro mu iku Owhe na họ họ, wọhọ ẹsenọ ọ rrọ iku-esia jọ gheghe. Ukpoye, Ebaibol na ọ fodẹ ukpe, amara, gbe ẹdẹ nọ Owhe na o ro ku gbe oke nọ ọ rọ kpọ. (Emuhọ 7:11; 8:4, 13, 14) Ebaibol na ọ tẹ jẹ vuẹ omai kpahe epanọ okọ nọ Noa o ku na o rro te. (Emuhọ 6:15) Eware nana kpobi nọ Ebaibol na ọ ta kpahe na i dhesẹ nọ Owhe na o gine ku dẹẹ orọnikọ iku-esia jọ gheghe he.

 Fikieme Owhe na o ro ku?

 Wọhọ epanọ Ebaibol na ọ ta, taure Owhe na o te ti ku “umuomu ohwo-akpọ o [jọ] ruaro.” (Emuhọ 6:5) Ọ tẹ jẹ ta nọ “otọakpọ na o raha no evaọ aro Ọghẹnẹ uzẹme na” keme ozighi gbe ọfariẹ-ogbe o da oria kpobi fia.—Emuhọ 6:11; Jud 6, 7.

 Ebaibol na ọ ta nọ ikọ-odhiwu nọ i no obọ odhiwu ze nọ e rehọ eyae kẹ omarai je lele ai wezẹ na họ ahwo nọ a mae wha ẹbẹbẹ nana ze. Ikọ-odhiwu nana a yẹ emọ nọ a re se Nẹfilim, enọ e wha uye gbe ozighi fihọ ahwo oma evaọ oke yena. (Emuhọ 6:1, 2, 4) Ọghẹnẹ ọ tẹ jiroro nọ ọ rẹ raha ahwo omuomu na no re ahwo owoma a sae rria dhedhẹ.—Emuhọ 6:6, 7, 17.

 Kọ ahwo a riẹ nọ Owhe na o ti ku?

 Ee. Ọghẹnẹ ọ vuẹ Noa kpahe oware nọ o te via, kẹsena ọ tẹ ta kẹe nọ o ku okọ re ọ sai siwi ahwo uviuwou riẹ gbe erao na. (Emuhọ 6:13, 14; 7:1-4) Fikiere Noa ọ tẹ jẹ vẹvẹ ahwo na unu kpahe Owhe na, rekọ ahwo na a kezọ kẹ unuovẹvẹ na ha. (2 Pita 2:5) Ebaibol na ọ ta nọ: “A muẹrohọ họ bẹsenọ Owhe na ọ rọ ze, o te kpe ai kpobi no.”—Matiu 24:37-39.

 Oghẹrẹ vẹ okọ Noa na o jọ?

 Okọ na o jọ wọhọ etehe nọ u wo ibienẹ ene nọ uthethei riẹ o jọ oware wọhọ imita 133 (437 ft), okẹkẹe riẹ imita 22 (73 ft), yọ u kpehru te imita 13 (44 ft). a Emamọ ure a ro ku okọ na, a tẹ rehọ ikota ralọ te obeva te otafe riẹ. U wo idhe esa gbe ibriwou sa-sa. Unuẹthẹ o jọ ofẹ uthethei okọ na, o te je wo unwido evaọ obehru riẹ. Yọ o wọhọ nọ a ru ẹroka fihọ obehru okọ na nọ ame o re ro su noi no.—Emuhọ 6:14-16.

 Bro ikpe Noa o ro ku okọ na?

 Ebaibol na ọ fodẹ unuikpe nọ Noa o ro ku okọ na ha, rekọ o wọhọ nọ o rehọ e riẹ ikpe buobu taure o te ti ku okọ na re. Noa ọ kpako vrẹ ikpe egba isoi (500) no nọ o yẹ ọmọzae ọsosuọ riẹ, yọ ikpe egba ezeza (600) ọ jọ nọ Owhe na o ku. bEmuhọ 5:32; 7:6.

 Okenọ Ọghẹnẹ ọ ta kẹ Noa nọ o ku okọ na, yọ emezae esa riẹ na a rro te ahwo no, a te je wo eyae no, onọ o rehọ oware wọhọ ikpe udhuvẹ-gbikpe hayo ikpe udhosa. (Emuhọ 6:14, 18) Otẹrọnọ ẹme nana uzẹme, ma sae ta nọ ikpe udhuvẹ hayo ikpe udhuvẹ-gbikpe Noa o ro ku okọ na re.

a Ikiubiti Ebaibol na o ro dhesẹ oghẹrẹ nọ okọ na o rro te. “Ikiubiti ahwo Hibru o theri te 17.5 inches (44.45 cm).”—The Illustrated Bible Dictionary, Revised Edition, Abọ 3, ẹwẹ 1635.

b Rọ kpahe oghẹrẹ nọ ahwo a jẹ rria kri te evaọ oke anwae, ahwo wọhọ Noa, rri uzoẹme na “Did People in Bible Times Really Live So Long?” evaọ Uwou-Eroro Akpegbivẹ 1, 2010.