Ahwo a rọ iwuhrẹ Jesu Kristi fa ichọche buobu no, enọ i bi se omarai “Ileleikristi.” Ghele na, Ebaibol o dhesẹ nọ egagọ ileleikristi ọvuọvo ọye họ ọrọ uzẹme. Joma kiẹ eware esa jọ riwi nọ i dhesẹ nọ ere o ginẹ rrọ.

1.   Jesu ọ ta nọ o wuhrẹ ahwo “uzẹme na,” yọ Ileleikristi ọsosuọ na omarai a se egagọ rai erọ “uzẹme na” re. (Jọn 8:32; 2 Pita 2:2; 2 Jọn 4; 3 Jọn 3) Onana u te dhesẹ nọ ohwo kpobi nọ o bi wuhrẹ iwuhrẹ nọ i wo ohẹriẹ no erọ Jesu, o bi ru oware nọ Ileleikristi uzẹme i re ru hu.

2.   Ebaibol ọ ta nọ Ileleikristi a rẹ “jọ ọvo evaọ eme rai.” (1 Ahwo Kọrint 1:10) Ghele na, ichọche buobu nọ i se omarai Ileleikristi a bi wuhrẹ oware ovona ha wọhọ epanọ u fo nọ Ileleikristi i re ru. A rẹ sae se egagọ itieye erọ uzẹme he.—1 Pita 2:21.

3.   Jesu ọ ta nọ oke o be tha nọ ibuobu i ti se omarai Ileleikristi rekiyọ a ti yoẹme kẹe he, yọ ọ ta nọ ọ te siọ oghẹrẹ ahwo otiọye na kpobi. (Matiu 7:21-23; Luk 6:46) Isu egagọ e be viẹ ahwo buobu họ keme a bi gbe egagọ uzẹme ku re eware e sae woma kẹ ai. (Matiu 7:15) U te no ere no, amọfa a rẹ dhẹ lele enọ e be ta eware nọ a gwọlọ yo, viukpọ uzẹme Ebaibol nọ a re wuhrẹ.—2 Timoti 4:3, 4.

 Nọ Jesu ọ jẹ kẹ ọtadhesẹ eka gbe ikpoko na, ọ ta nọ oke o be tha nọ ahwo buobu a te rọ wọso (enọ e siọ orọwọ na no) Ileleikristi uzẹme. (Matiu 13:24-30, 36-43) O te rehọ oke gaga, re a te ti vuhu Ileleikristi uzẹme gbe erọ ọrue. Wọhọ epanọ Jesu ọ ta nọ o te via, ahwo buobu a siọ orọwọ na evaọ okenọ ikọ na kpobi a whu no. (Iruẹru Ikọ 20:29, 30) Dede nọ iwuhrẹ rai jọ i wo ohẹriẹ no ohwohwo, aikpobi “a nyasiọ uzẹme na ba no.”—2 Timoti 2:18.

 Jesu ọ tẹ jẹ ta nọ oke o be tha nọ ahwo a te rọ ruẹ ohẹriẹ nọ o rrọ Ileleikristi uzẹme avọ erọ ọrue. Yọ onana u rugba no evaọ oke mai na, “oke urere uyero-akpọ na.”—Matiu 13:30, 39.