Nọ ohwo nọ ma you o te whu, ma rẹ nọ kpahe oware nọ o soriẹ nọ ahwo a bi ro whu. Ebaibol na ọ ta nọ: “Obi nọ ọ be wha uwhu ze họ uzioraha.”​—1 Ahwo Kọrint 15:56.

Fikieme ahwo kpobi a be rọ raha uzi, a ve je whu?

 Imava ọsosuọ nọ Ọghẹnẹ ọ ma, koyehọ Adamu avọ Ivi a whu fikinọ a raha uzi. (Emuhọ 3:17-19) Uwhu họ oware nọ u no uzi Ọghẹnẹ nọ a raha na ze, keme Ọghẹnẹ họ ọnọ ọ rẹ kẹ uzuazọ hayo ọnọ o “wo eyeri azọ.”​—Olezi 36:9; Emuhọ 2:17.

  Emọ Adamu kpobi a tẹ reuku uzioraha mi Adamu. Ebaibol na ọ ta nọ: “Fikiere, wọhọ epanọ uzioraha o rọ ẹkwoma omọvo ruọ akpọ na, uwhu u je no uzioraha ze na, ere uwhu u ro te ahwo kpobi oma keme aikpobi a raha uzi no.” (Ahwo Rom 5:12) Ahwo kpobi a bi whu nẹnẹ fikinọ a raha uzi no.​—Ahwo Rom 3:23.

Epanọ a ti ro si uwhu no otọ

 Ọghẹnẹ ọ ya eyaa okenọ ọ te rọ “lọ uwhu no ri bẹdẹ.” (Aizaya 25:8) Re uwhu u te no otọ, Ọghẹnẹ ọ rẹ kaki si oware nọ o be wha uwhu ze no, koyehọ uzioraha. Ọghẹnẹ o ti ru onana ẹkwoma Jesu Kristi, ọnọ ọ “wha izieraha akpọ na vrẹ.”​—Jọn 1:29; 1 Jọn 1:7.