Kpohọ eme nọ e riẹ eva

Ẹvẹ Mẹ Sai ro Wo Ẹruore?

Ẹvẹ Mẹ Sai ro Wo Ẹruore?

Uyo nọ Ebaibol na ọ kẹ

 Ebaibol ọ ta nọ Ọghẹnẹ o ti “ru eware woma” kẹ omai evaọ obaro, fikiere ọ gwọlọ nọ ma “wo ẹruore.” a (Jerimaya 29:11) Oware jọ nọ o tubẹ lẹliẹ Ọghẹnẹ kẹ omai Ebaibol na họ, re ma sai wo ‘omosasọ gbe ẹruore.’ (Ahwo Rom 15:4) Ma te jọ uzoẹme nana ruẹ nọ emamọ ehrẹ buobu e rrọ Ebaibol na nọ e rẹ sae lẹliẹ omai wo evawere kẹdẹ kẹdẹ. Yọ eyaa nọ e rrọ Ebaibol na e rẹ sae lẹliẹ omai wo ẹruore inọ eware i ti woma evaọ obaro.

Ma te jọ uzoẹme nana ta kpahe eware nana

 Ẹvẹ Ebaibol na ọ sai ro fiobọhọ kẹ omai wo evawere?

 Ebaibol na ọ fodẹ eware jọ nọ ma re ru nọ ma te wo ẹbẹbẹ. Nọ ma te ru ai, u re fiobọhọ kẹ omai ku ebẹbẹ buobu họ, je wo evawere. Joma kẹ iriruo jọ.

  •   Lele ehrẹ nọ e rrọ Ebaibol na. Olezi 119:105 ọ ta nọ: “Ẹme ra yọ ukpẹ rọkẹ owọ mẹ, gbe elo kẹ edhere mẹ.” Eware ivẹ ukpẹ nọ u bi lo ziezi o rẹ sai ru kẹ omai. O sai fiobọhọ kẹ omai ruẹ oria nọ ma bi ti fi owọ họ, o vẹ jẹ lẹliẹ omai ruẹ thabọ. Epọvo na re, ehrẹ nọ e rrọ Ebaibol na i re fiobọhọ kẹ omai ru oware areghẹ nọ ma te wo ẹbẹbẹ, yọ onana o rẹ lẹliẹ eva were omai kẹdẹ kẹdẹ. Ehrẹ Ebaibol i re fiobọhọ kẹ omai kru udu ga, je “ru udu na ghọghọ.” (Olezi 19:7, 8) U te no ere no, Ebaibol ọ ta kpahe eware iwoma nọ Ọghẹnẹ o ti ru kẹ ohwo-akpọ evaọ obaro gbe oghẹrẹ nọ otọakpọ na o ti woma te. Ẹruore nana ọ sai ru eva were omai kẹdẹ kẹdẹ.

  •   Jọ amọfa a fiobọhọ kẹ owhẹ. Ma te roro nọ omai u re no, ẹsejọhọ ma te gbẹ gwọlọ kẹle ahwo uviuwou mai gbe egbẹnyusu mai hi. Rekọ Ebaibol ọ vuẹ omai nọ ma ru ere he, keme o rẹ sae lẹliẹ omai jiroro thọ hayo ru oware ugheghẹ. (Itẹ 18:1) Ahwo uviuwou mai gbe egbẹnyusu mai a sai fiobọhọ kẹ omai jẹ emamọ iroro. A sai fiobọhọ kẹ omai riẹ oware nọ ma re ru kpahe ẹbẹbẹ na. (Itẹ 11:14) A gbẹ make sai fiobọhọ kẹ omai ku ẹbẹbẹ na họ họ, a sae ta omai udu ga jẹ sasa omai oma, onọ o sai ru nọ ma re ro thihakọ ebẹbẹ na bẹsenọ eware i re woma.​—Itẹ 12:25.

  •   Lẹ se Ọghẹnẹ. Ebaibol ọ ta nọ: “Gbolo owha ra kẹ Jihova, ọ te rẹrote owhẹ. Ọ rẹ kuvẹ vievie he re ohwo okiẹrẹe o kie.” b (Olezi 55:22) Oyejabọ nọ a ro se Jihova “Ọghẹnẹ nọ ọ rẹ kẹ ẹruore na.” (Ahwo Rom 15:13) Vuẹe ‘ebẹbẹ ra kpobi.’ Riẹ nọ ọ gwọlọ nọ eware i woma kẹ owhẹ. (1 Pita 5:7, ẹme-obotọ) Ebaibol ọ tubẹ ta nọ: “O ti ru [owhẹ] ga, o ti ru [owhẹ] dikihẹ ga, o ti ru [owhẹ] dowọ muotọ ziezi.”​—1 Pita 5:10.

  •   Jọ ebẹbẹ e lẹliẹ owhẹ fi ẹruore ra họ Ọghẹnẹ. Ọghẹnẹ ọ ya eyaa kẹ omai evaọ Ebaibol na nọ: “Ọnọ ọ be gaviezọ kẹ omẹ o ti wo omofọwẹ yọ ọ te dhozọ okpẹtu hu.” (Itẹ 1:33) Nọ ofou ọwhibo o fou evaọ obọ Australia, ọ raha uwou aye jọ nọ a re se Margaret gbe eware riẹ buobu. Rekọ ọ whabọ họ uzou hu inọ oriẹ u re no. Ukpoye o wuhrẹ emamọ oware jọ no oware nọ o via na ze. Ọ ruẹ nọ eware akpọ na ifofe, e sae raha no asohẹrioke. No umuo oke yena vrẹ, ọ tẹ jẹ daoma vi epaọ ọsosuọ re ọ hae jọ kugbe ahwo uviuwou riẹ gbe egbẹnyusu riẹ, je ru re usu riẹ avọ Ọghẹnẹ, gbe ẹruore riẹ ọ ga ziezi. Ọ ruẹ nọ eware nana e mai wuzou.​—Olezi 37:34; Jemis 4:8.

 Emamọ eware vẹ Ebaibol ọ ta nọ e rrọ obaro tha?

 Ọghẹnẹ ọ jọ Ebaibol na ya eyaa nọ o ti ru emamọ eware buobu kẹ ahwo-akpọ evaọ obaro. Akpọ na o ve ti je zihe ruọ aparadase. Yọ onana o te via kẹle. Uzẹme riẹ họ, ebẹbẹ nọ e da akpọ fia nẹnẹ na u dhesẹ nọ “edẹ urere” akpọ oyoma nana ma rrọ na. (2 Timoti 3:1-5) Kẹle na Ọghẹnẹ ọvo o ti su akpọ na, o ve ti si okiẹnyẹ gbe uye kpobi no. Egọmeti riẹ ọvo o ti su akpọ na soso. A jọ Ebaibol se egọmeti nana Uvie Ọghẹnẹ. (Daniẹl 2:44; Eviavia 11:15) Egọmeti nana nọ o ti su no obọ odhiwu ze na oye Jesu ọ jẹ ta kpahe nọ o wuhrẹ ilele riẹ nọ a lẹ, inọ: “Jọ Uvie ra o ze. Jọ oreva ra u rugba evaọ otọakpọ na.”​—Matiu 6:9, 10.

 Ma rẹ jọ Ebaibol na ruẹ epanọ oreva Ọghẹnẹ u ti ro rugba evaọ otọakpọ na. Joma fodẹ ebẹbẹ jọ nọ Uvie Ọghẹnẹ u ti si no:

  •   Ohọo. “Otọakpọ na u ti wou eware.”​—Olezi 67:6.

  •   Ẹyao. “Ohwo ọvo nọ ọ be rria ẹkwotọ na nọ ọ te ta nọ, ‘Mẹ be mọ’ ọ te jariẹ hẹ.”​—Aizaya 33:24.

  •   Uwhu. Ọghẹnẹ “o ti ririe irui-oviẹ kpobi no aro [mai], uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha. Eware anwae na e vrẹ no.”​—Eviavia 21:3, 4.

a Ohwo o te wo ẹruore, u dhesẹ nọ o bi rẹro oware jọ, yọ ọ riẹ nọ oware na o te siọ iẹe obọ ba ete he.

b Ebaibol na o dhesẹ nọ Jihova họ odẹ Ọghẹnẹ.​—Olezi 83:18.