Kpohọ eme nọ e riẹ eva

Eme Họ Ẹkparomatha?

Eme Họ Ẹkparomatha?

Uyo nọ Ebaibol na ọ kẹ

Ẹme nọ a jọ Ebaibol fa “ẹkparomatha” na o no ẹme Griki na a·naʹsta·sis ze. Otofa riẹ họ “ẹkpare kpehru” hayo “ẹwariẹ kpama dikihẹ.” A tẹ ta nọ a kpare ohwo ze, u dhesẹ nọ ohwo na o whu no vẹre. Kẹsena ohwo na dẹẹ ọ tẹ wariẹ zihe ziọ uzuazọ.​—1 Ahwo Kọrint 15:12, 13.

Dede nọ ẹme na “ẹkparomatha” ọ rrọ abọ Ebaibol nọ a re se Ikereakere Hibru hayo Ọvọ Anwae na ha, a jariẹ ta kpahe ẹkparomatha. Wọhọ oriruo, Ọghẹnẹ ọ ya eyaa jọ nọ Hosia ọruẹaro riẹ o kere fihotọ, inọ: “Me ti siwi ai no ogaga Uki; me ti si ai no uwhu ze.”​—Hosia 13:14; Job 14:13-15; Aizaya 26:19; Daniẹl 12:2, 13.

Bovẹ a te kpare ahwo kpohọ? A te kpare ahwo jọ kpobọ odhiwu re a jọ ivie nọ i ti lele Jesu su evaọ obei. (2 Ahwo Kọrint 5:1; Eviavia 5:9, 10) Ebaibol o se ọnana “ẹkparomatha ọsosuọ.” Onana u dhesẹ nọ ẹkparomatha ọfa o ti lele iei. (Eviavia 20:6; Ahwo Filipai 3:11) Orọ uwhremu na, obọ otọakpọ obonẹ a te kpare ahwo ze. Yọ ahwo nọ a te kpare ze re a rria otọakpọ a bu vi enọ a te kpare kpobọ odhiwu kpekufiẹ.​—Olezi 37:29.

Oghẹrẹ vẹ a te rọ kpare ahwo ze? Ọghẹnẹ ọ kẹ Jesu ogaga nọ ọ te rọ kpare enọ i whu no ze. (Jọn 11:25) Jesu ọ te kpare “enọ e rrọ iki ekareghẹhọ kpobi” ziọ uzuazọ. Yọ ọ te kpare ae ze avọ ọvuọ ovao riẹ, uruemu riẹ, gbe ọvuọ iroro riẹ wọhọ epanọ a jọ taure a te ti whu. (Jọn 5:28, 29) Oma ẹzi a te rọ kpare enọ i bi kpobọ odhiwu. Enọ e te rria otọakpọ kọ oma iwo nọ o rrọ sasasa ziezi.​—Aizaya 33:24; 35:5, 6; 1 Ahwo Kọrint 15:42-44, 50.

Ono a te kpare ze? Ebaibol ọ ta nọ “ẹkparomatha enọ i kiẹrẹe gbe enọ i kiẹrẹe he ọ te jọ.” (Iruẹru Ikọ 24:15) Ahwo okiẹrẹe jọ nọ a te kpare ze họ, Noa, Sera, gbe Abraham. (Emuhọ 6:9; Ahwo Hibru 11:11; Jemis 2:21) Ahwo jọ nọ i kiẹrẹe he nọ a te kpare ze họ, enọ i koko izi Ọghẹnẹ hẹ evaọ oke nọ a jọ uzuazọ fikinọ ohwo ọvo o wuhrẹ i rai ẹme Ọghẹnẹ hẹ. U te ru nọ a gbe ro yeri oghẹrẹ uzuazọ nọ Ọghẹnẹ ọ gwọlọ nọ a yeri hi.

Rekọ ahwo nọ a yoma gaga, nọ a te rọwo nwene he, Ọghẹnẹ ọ te kpare ae ze he. Nọ ahwo otiọye na a te whu, a re gbe zihe ziọ uzuazọ ofa ha.​—Matiu 23:33; Ahwo Hibru 10:26, 27.

Oke vẹ ẹkparomatha na ọ te jọ? Eruẹaruẹ Ebaibol i dhesẹ nọ ahwo nọ a te kpare kpobọ odhiwu, etoke ọzino Kristi a te rọ kpare ae, onọ u muhọ evaọ 1914. (1 Ahwo Kọrint 15:21-23) Enọ a te kpare ziọ otọakpọ na kọ etoke Esuo Odu-Ikpe Jesu Kristi. Evaọ oke yena, a ti zihe otọakpọ na ruọ aparadase.​—Luk 23:43; Eviavia 20:6, 12, 13.

Ẹvẹ ma rọ riẹ nọ ẹkparomatha ọ te ginẹ jọ? Ebaibol na ọ romatotọ gbiku imazii soso nọ e kparoma no uwhu ze, yọ ahwo a rọ ẹro ruẹ onana oke nọ o rọ via. (1 Ivie 17:17-24; 2 Ivie 4:32-37; 13:20, 21; Luk 7:11-17; 8:40-56; Jọn 11:38-44; Iruẹru Ikọ 9:36-42; 20:7-12; 1 Ahwo Kọrint 15:3-6) Ẹkparomatha jọ nọ o gbunu gaga họ, orọ Lazarọs. Lazarọs o whu te edẹ ene no taure Jesu ọ tẹ te kpare iẹe ze, yọ ogbotu ahwo a jọ etẹe. (Jọn 11:39, 42) Makọ ahwo nọ a jẹ wọso Jesu a sae vro ho inọ Jesu ọ kpare riẹ no uwhu ze he. Oyejabọ nọ a jẹ rọ gwọlọ kpe Jesu avọ Lazarọs no.​—Jọn 11:47, 53; 12:9-11.

Eware nọ e rrọ Ebaibol i dhesẹ nọ Ọghẹnẹ o wo ogaga nọ ọ rẹ rọ kpare ahwo no uwhu ze, yọ ọ ginẹ gwọlọ ru ere. Ọghẹnẹ o wo ogaga thesiwa yọ oware ovo o rẹ thọrọ iẹe ẹro ho. Fikiere ọ rẹ sae kareghẹhọ ohwo kpobi nọ ọ te kpare ze, gbe omoware kpobi kpahe ae omomọvo. (Job 37:23; Matiu 10:30; Luk 20:37, 38) Avro ọ riẹ hẹ, Ọghẹnẹ ọ rẹ sae kpare ahwo nọ i whu no ziọ uzuazọ, yọ onana o riẹe oja gaga. Ebaibol na ọ ta kpahe epanọ ẹkparomatha na o rrọ Ọghẹnẹ oja te, inọ: “Iruo abọ ra i ti si owhẹ urru.”​—Job 14:15.

Eware nọ ahwo a re rri thọ kpahe ẹkparomatha na

Orithọ: Evaọ oke ẹkparomatha, a ti zihe ẹzi ohwo na fihọ ugboma riẹ.

Uzẹme ẹme na: Ebaibol na ọ ta vievie he inọ oware jọ u re no ohwo oma nyae rria obọfa nọ o te whu. (Emuhọ 2:7, ẹme-obotọ; Izikiẹl 18:4) Orọnikọ ẹkparomatha o dhesẹ nọ a re zihe ẹzi ohwo nọ o whu no na fihọ ugboma riẹ hẹ, rekọ Ọghẹnẹ ọ rẹ wariẹ ohwo na ma.

Orithọ: U wo ahwo jọ nọ a te kpare ze, a vẹ nwane raha ae no.

Uzẹme ẹme na: Ebaibol na ọ ta nọ ẹkparomatha “enọ i ru eware iyoma,” o te jọ orọ “ẹdhoguo.” (Jọn 5:29) Rekọ eware nọ a ru nọ a kpare ae ze no a ti ro gu ai ẹdhọ orọnikọ enọ a ru taure a te ti whu hu. Jesu ọ ta nọ: “Enọ i whu no i ti . . . yo urru Ọmọ Ọghẹnẹ, enọ e kezọ kẹe e vẹ te ziọ uzuazọ.” (Jọn 5:25) Otẹrọnọ enọ a te kpare ze na a “kezọ” hayo ru eware nọ a ti wuhrẹ ai nọ a tẹ kparoma ze no, a ve ti kere edẹ rai fihọ “uko-obe uzuazọ” na.​—Eviavia 20:12, 13.

Orithọ: Uzedhe ugboma nọ ohwo o wo taure o te ti whu, oye a te rọ kpare iẹe ze.

Uzẹme ẹme na: Nọ ohwo o te whu, ugboma riẹ o rẹ sae raha hayo gbo no.​—Ọtausiuwoma Na 3:19, 20.