Kpohọ eme nọ e riẹ eva

Eme Họ Ame-Ọhọ?

Eme Họ Ame-Ọhọ?

Uyo nọ Ebaibol na ọ kẹ

Ame-ọhọ họ, epanọ a re du ohwo họ ame le no jẹ kpare iẹe no ame na ze. * Fikiere evaọ okenọ Jesu ọ rọ họ-ame, ethẹ a jọ họe ame. (Matiu 3:13, 16) Yọ ohwo Ẹtiopia jọ ọ ta nọ a họe ame evaọ okenọ a dhẹ te oria nọ “ẹtẹre-ame” o jọ.​—Iruẹru Ikọ 8:36-40.

Oware nọ ame-ọhọ u dhesẹ

Ebaibol na ọ rehọ ame-ọhọ dhesẹ epanọ a re ki ohwo. (Ahwo Rom 6:4; Ahwo Kọlọsi 2:12) Ame-ọhọ u dhesẹ epanọ ohwo o re whu no rọkẹ oghẹrẹ uzuazọ nọ o je yeri evaọ okenọ u kpemu wọhọ odẹme, je mu uzuazọ Oleleikristi họ eyeri keme ọ rọ uzuazọ riẹ mudhe kẹ Ọghẹnẹ no. Ame-ọhọ gbe eware nọ ohwo o re ru taure ọ tẹ te họ-ame yọ eware nọ Ọghẹnẹ ọ ta nọ ma re ru. Eware nana i re ru nọ ohwo ọ sai ro wo obroziẹ-iroro ọfuafo fiki ẹrọwọ nọ o fihọ idhe ẹtanigbo Jesu. (1 Pita 3:21) Fikiere Jesu o wuhrẹ nọ ilele riẹ a rẹ họ-ame hrọ.​—Matiu 28:19, 20.

Kọ ame-ọhọ o re ru ohwo fo no izieraha riẹ?

Ijo. Ebaibol na o wuhrẹ nọ azẹ Jesu ọvo o rẹ sai ru omai fo no izieraha mai. (Ahwo Rom 5:8, 9; 1 Jọn 1:7) Dede na, taure ohwo o te ti wo erere no idhe ẹtanigbo Jesu ze, o re fi ẹrọwọ họ Jesu, nwene uruemu riẹ je ru lele eware nọ Jesu o wuhrẹ, ọ vẹ jẹ họ-ame.​—Iruẹru Ikọ 2:38; 3:19.

Kọ Ebaibol na o wuhrẹ nọ a rẹ họ emọfofa ame?

Ijo, o wuhrẹ ere vievie he. Whọ rẹ jọ Ebaibol na ruẹ oria ọvo nọ a jọ ta kpahe ame-ọhọ emọfofa ha. Evaọ egagọ buobu, a re ru ehaa nọ a rẹ rọ ‘họ ọmọfofa ame’ (ẹkwoma ame nọ a rẹ frẹ hayo ku fihọ iẹe uzou), je mu odẹ kẹe. Ahwo nọ u fo nọ a rẹ họ-ame họ, Ileleikristi nọ e kpako te epanọ a sai ro wo otoriẹ oware ziezi no, jẹ sai fi ẹrọwọ họ “usi uwoma kpahe Uvie Ọghẹnẹ.” (Iruẹru Ikọ 8:12) Taure ohwo ọ tẹ te họ-ame, o re wuhrẹ Ẹme Ọghẹnẹ, ru lele oware nọ o bi wuhrẹ na, je kurẹriẹ. Ọmọfofa ọ rẹ sai ru eware nana ha.​—Iruẹru Ikọ 2:22, 38, 41.

Ofariẹ, Ebaibol na o dhesẹ nọ Ọghẹnẹ o re rri emọ nọ esẹgbini rai a be gọe inọ a rrọ fuafo hayo ọrẹri evaọ aro riẹ. (1 Ahwo Kọrint 7:14) Otẹrọnọ u gine fo nọ emọfofa a rẹ họ-ame, ae ọvo a hae ti ru oware nọ a rẹ rọ fo evaọ aro Ọghẹnẹ orọnikọ fiki esẹgbini rai hi. *

Eriwo ọthọthọ nọ ahwo a wo kpahe ame-ọhọ Oleleikristi

Eriwo ọthọthọ: Ame nọ a rẹ frẹ ku ohwo hayo kuhọ ohwo oma yọ edhere ọfa nọ a sai rọ họ ohwo ame viukpenọ a re du ohwo họ ame le no.

Uzẹme ẹme na: Evaọ ame-ọhọ kpobi nọ a fodẹ evaọ Ebaibol na, a du ahwo họ ame le no. Wọhọ oriruo, evaọ okenọ Filip ọ rọ họ ohwo Ẹtiopia ame na, aimava a “ruọ eva ame na.” Nọ ọ họe ame no, aimava a te “no eva ame na ze.”​—Iruẹru Ikọ 8:36-39. *

Eriwo ọthọthọ: Ẹme nọ Ebaibol na ọ ta u dhesẹ nọ emọfofa e jọ usu ahwo nọ a họ-ame evaọ okenọ ahwo uviuwou jọ soso a rọ họ-ame. Wọhọ oriruo, Ebibol na ọ ta kpahe oriekarọ jọ evaọ Filipai inọ: “Tei te ahwo uwou riẹ kpobi a tẹ họ-ame.”​—Iruẹru Ikọ 16:31-34.

Uzẹme ẹme na: Iku Ebaibol nọ a jọ ta kpahe epanọ oriekarọ na o ro kureriẹ na i dhesẹ nọ, ahwo kpobi nọ a họ-ame na a wo otoriẹ “ẹme Jihova” yọ a “ghọghọ gaga.” (Iruẹru Ikọ 16:32, 34) Onana u dhesẹ nọ, o tẹ make rọnọ emọfofa e jọ uviuwou oriekarọ na, a jọ usu ahwo nọ a họ-ame na ha keme a ri te ahwo nọ a re wo otoriẹ ẹme Jihova ha.

Eriwo ọthọthọ: Jesu o wuhrẹ nọ a rẹ họ emọfofa ame keme ọ ta nọ, Uvie odhiwu o rrọ rọkẹ emaha na.​—Matiu 19:13-15; Mak 10:13-16.

Uzẹme ẹme na: Evaọ okenọ Jesu ọ rọ ta ẹme nana, ọrọnikọ ọ jẹ ta kpahe ame-ọhọ họ. Ukpoye, o je dhesẹ nọ re ohwo ọ sae ruọ Uvie Ọghẹnẹ, o gwọlọ nọ ọ rẹ jọ wọhọ ọmaha keme emaha a rẹ romakpotọ yọ a rẹ sai wuhrẹ ai lọlọhọ.​—Matiu 18:4; Luk 18:16, 17.

^ edhe-ẹme 1 A rehọ ẹme Griki nọ a fa “ame-ọhọ” na rono ẹme nọ otofa riẹ o rrọ “epanọ a re du oware họ eva oware” ze. Rri obe na Theological Dictionary of the New Testament, Volume I, ẹwẹ-obe avọ 529.

^ edhe-ẹme 5 Obe na The International Standard Bible Encyclopedia o ta nọ, ‘whọ rẹ jọ Ọvọ Ọkpokpọ na ruẹ oria ọvo nọ a jọ ta kpahe ame-ọhọ emọfofa ha.’ Obe na o tẹ jẹ ta nọ uruemu nana o vaha ruọ oria kpobi “fiki eriwo ọthọthọ nọ ahwo a wo kpahe ame-ọhọ,” inọ ame-ọhọ o rẹ sai ru ohwo fo no izieraha riẹ.​—Volume 1, ẹwẹ-obe avọ 416-417.

^ edhe-ẹme 7 Evaọ otọ uzoẹme na “Baptism (in the Bible)” koyehọ Ame-ọhọ (evaọ Ebaibol na), obe na New Catholic Encyclopedia o ta nọ: “O rrọ vevẹ nọ evaọ Ichọche oke ọsosuọ na, a jẹ hae du ohwo họ ame le no nọ a tẹ be họe ame.”​—Volume 2, ẹwẹ-obe avọ 59.