Uyo nọ Ebaibol na ọ kẹ

Ijo, Ebaibol ọ ta nọ Meri yọ oni Ọghẹnẹ hẹ, yọ oria ovo o riẹ hẹ evaọ Ebaibol na nọ u dhesẹ nọ Ileleikristi a rẹ gọ hayo rọ ọghọ kẹ Meri. * Roro kpahe eware nana:

  • Meri ọ ta oke ovo ho inọ ọye yọ oni Ọghẹnẹ. Ebaibol na o dhesẹ nọ Meri họ ọnọ o yẹ “Ọmọ Ọghẹnẹ,” orọnikọ Ọghẹnẹ omariẹ hẹ.—Mak 1:1; Luk 1:32.

  • Jesu Kristi ọ ta oke ovo ho inọ Meri yọ oni Ọghẹnẹ hayo inọ a rẹ kẹe obọdẹ ọghọ. Jesu ọ kpọ eriwo aye jọ vi evaọ okenọ aye na ọ jẹ kẹ Meri ọghọ fikinọ ọye o yẹ Jesu. Ọ ta kẹe nọ: “Ijo, ukpoye, eva e were enọ i bi yo ẹme Ọghẹnẹ je bi koko iei!”—Luk 11:27, 28.

  • A rẹ jọ oria ovo evaọ Ebaibol na ruẹ, “Oni Ọghẹnẹ” gbe “Theotokos” (Ọnọ ọ wọ Ọghẹnẹ) vievie he.

  • Orọnikọ Meri a rehọ “Ovie-aye Odhiwu” nọ o rrọ Ebaibol na ta kpahe he, rekọ a rehọ e riẹ ta kpahe ọghẹnẹ-aye nọ ahwo Izrẹl nọ a siọ Jihova a jẹ gọ. (Jerimaya 44:15-19) O sae jọ nọ “Ovie-aye Odhiwu” na họ Ishtar (Astarte), ọghẹnẹ-aye ahwo Babilọn.

  • Ileleikristi ọsosuọ a gọ Meri hi, yọ a jẹ kẹe ọghọ evaọ oghẹrẹ ọvo gbe he. Ogbiku jọ ọ ta nọ Ileleikristi ikpe-udhusoi ọsosuọ “a hae whaha uruemu ẹgọ nọ a rẹ gọ Meri o hae rọnọ ọye a je ginẹ gọ, ẹsejọhọ fiki ozọ nọ ahwo a sai roro nọ ọghẹnẹ-aye a be gọ.”—In Quest of the Jewish Mary.

  • Ebaibol na ọ ta nọ Ọghẹnẹ ọ rrọ no ebẹdẹ bẹdẹ rite ebẹdẹ bẹdẹ. (Olezi 90:1, 2; Aizaya 40:28) Nọ orọnọ Ọghẹnẹ o wo emuhọ họ na, ọ sai wo oni gbe he. Ofariẹ, Ọghẹnẹ ọ sae jọ eva edhede Meri hi; Ebaibol na ọ ta vevẹ inọ makọ idhiwu na dede e rẹ sae gba Ọghẹnẹ hẹ.—1 Ivie 8:27.

Meri yọ Oni Jesu Orọnikọ “Oni Ọghẹnẹ” Hẹ

Meri yọ ọmotọ Ju, ọ tẹ jẹ rrọ ohwo uyẹ Devidi ovie na. (Luk 3:23-31) Fikinọ ọ jọ ohwo nọ o wo ẹrọwọ jẹ romakẹ egagọ Ọghẹnẹ, Ọghẹnẹ o te rri rie aro gaga. (Luk 1:28) Ọghẹnẹ ọ salọ e riẹ re ọ jọ oni Jesu. (Luk 1:31, 35) Meri avọ ọzae riẹ, Josẹf, a yẹ emọ efa.—Mak 6:3.

Dede nọ Ebaibol na ọ ta nọ Meri ọ jọ olele Jesu, a ta eme buobu kpahe iẹe he.—Iruẹru 1:14.

^ edhe-ẹme 3 Egagọ sa-sa a re wuhrẹ nọ Meri yọ oni Ọghẹnẹ. A re sei “Ovie-aye Odhiwu” hayo Theotokos, ẹme Griki nọ otofa riẹ o rrọ “Ọnọ ọ wọ Ọghẹnẹ.”