Uyo nọ Ebaibol na ọ kẹ

Ebaibol ọ ta kpahe Jesu nọ “a kpe rie evaọ oma uwo rekọ a kpare riẹ ziọ uzuazọ evaọ oma ẹzi.”—1 Pita 3:18; Iruẹru Ikọ 13:34; 1 Ahwo Kọrint 15:45; 2 Ahwo Kọrint 5:16.

Eme nọ Jesu ọvo ọ rọ unu riẹ ta i dhesẹ nọ a te kpare iẹe ziọ uzuazọ wọhọ ohwo akpọ họ. Ọ ta nọ ọ te rọ ẹkwoma ‘uwo riẹ kẹ akpọ na uzuazọ,’ re o jọ ẹtanigbo kẹ ahwo akpọ. (Jọn 6:51; Matiu 20:28) O hae jọnọ oma ohwo akpọ ọ rọ kparoma no uwhu ze, ẹtanigbo na ọ gbẹ hae wo iruo ho. Yọ o wọhọ nọ ọ rọ oma ohwo akpọ kparoma ha, keme Ebaibol ọ ta nọ ọ rọ uwo gbe azẹ riẹ dheidhe “ẹsiẹvo rọkẹ oke kpobi.”—Ahwo Hibru 9:11, 12.

Kọ otẹrọnọ oma ẹzi Jesu ọ rọ kparoma, kẹvẹ ilele riẹ a sae rọ ruẹ riẹ?

  • Omama ẹzi o sae nwene oma kpohọ ohwo akpọ. Wọhọ oriruo, ikọ odhiwu nọ i nwene oma kpohọ ahwo a tubẹ re jẹ da kugbe ahwo akpọ dede. (Emuhọ 18:1-8; 19:1-3) O make rrọ ere ghele na, a gbẹ rọ emama ẹzi yọ a sae nwene oma rai kpohọ emama ẹzi.—Ibruoziẹ 13:15-21.

  • Nọ Jesu ọ kparoma no, ọ jẹ hae nwene zihe ruọ ohwo ẹsejọ, wọhọ epanọ ikọ odhiwu e jẹ hae ru vẹre na. Fikinọ omama ẹzi ọ rrọ, ọ sae romavia jẹ sae rayẹ. (Luk 24:31; Jọn 20:19, 26) Orọnọ ovao ovona o je wo oke kpobi hi nọ ọ tẹ romavia kẹ ahwo. Oye o soriẹ ze nọ makọ egbẹnyusu ekpekpe Jesu dede a jẹ sae ro vuhu ei hi na bẹsenọ ọ rẹ ta ẹme hayo ru oware jọ.—Luk 24:30, 31, 35; Jọn 20:14-16; 21:6, 7.

  • Nọ Jesu ọ romavia kẹ ukọ nọ a re se Tọmọs, oma nọ eka emela nọ i kpo no e rrọ o nwene kpohọ. Keme ọ gwọlọ ru ẹrọwọ Tọmọs ga, fikinọ Tọmọs ọ jẹ rọwo nọ a kpare Jesu ze no ho.—Jọn 20:24-29.