Uyo nọ Ebaibol na ọ kẹ

Ohwo ọvo ọ riẹ epanọ Jesu ọ jọ dẹẹ hẹ nọ orọnọ a jọ Ebaibol na dhesẹ oghẹrẹ oma nọ o wo ho na. Onana u dhesẹ nọ oghẹrẹ nọ Jesu ọ jọ u muẹme he. Rekọ eware jọ nọ Ebaibol ọ ta e sai fiobọhọ kẹ omai riẹ oghẹrẹ nọ Jesu ọ jọ.

  • Eware jọ: Ohwo Ju Jesu ọ jọ, yọ o sae jọnọ ọ rọ emeware jọ tho oni riẹ. (Ahwo Hibru 7:14) O sae jọnọ oma riẹ o nwani wo ohẹriẹ no orọ amọfa ha. Oke jọ o jariẹ nọ ọ rọ lẹlẹ no Galili kpobọ Jerusalẹm ababọ ohwo ọvo nọ o vuhu i rie. (Jọn 7:10, 11) Yọ u muẹro nọ o wo ohẹriẹ no ikọ riẹ hẹ. Kareghẹhọ nọ Judas Iskariọt họ ọnọ o dhesẹ i rie kẹ ogbotu nọ ọ nyaze ti mu ei na.—Matiu 26:47-49.

  • Epanọ eto riẹ i theri te: O wọhọ nọ Jesu o wo eto ithethei hi, keme Ebaibol ọ ta nọ “o rrọ oware omovuọ nọ ọzae o te wo eto ithethei.”—1 Ahwo Kọrint 11:14.

  • Etuagba: Jesu o wo etuagba. O je koko uzi ahwo Ju nọ o ta nọ ezae a re ‘bru akọ etuagba rai fihọ fariẹ fariẹ hẹ.’ (Iruo-Izerẹ 19:27; Ahwo Galesha 4:4) Yọ Ebaibol ọ ta ẹme te etuagba Jesu evaọ eruẹaruẹ nọ ọ jọ ta kpahe uye riẹ.—Aizaya 50:6.

  • Ugboma: Eware buobu e riẹ nọ i dhesẹ nọ Jesu ọ ga oma. Evaọ okenọ ọ jẹ ta usi uwoma, ọ rọ owotọ nya emaele buobu. (Matiu 9:35) Isiava soso o ru etẹmpol ahwo Ju na fo, gele emẹjẹ inwene-igho na kufiẹ, jẹ rọ oviaviẹ le erao rai ruọ otafe. (Luk 19:45, 46; Jọn 2:14, 15) Obe jọ nọ a re se McClintock and Strong’s Cyclopedia o ta nọ: “Iku iruo usi woma ota nọ o je ru [Jesu] i dhesẹ nọ ọ goma gaga je wo emamọ oma.”—Uko avọ IV, ẹwẹ 884.

  • Eriwo ovao: Jesu ọ jọ sasasa yọ o wo ororokẹ. Avro ọ riẹ hẹ, oghẹrẹ nọ ovao riẹ o jọ u dhesẹ onana via. (Matiu 11:28, 29) Oghẹrẹ ahwo kpobi a jẹ nyabru ei ze rọkẹ omosasọ gbe obufihọ. (Luk 5:12, 13; 7:37, 38) Makọ emaha dede a jẹ dhẹ wariẹ iẹe họ.— Matiu 19:13-15; Mak 9:35-37.

Eriwo ọthọthọ nọ a wo kpahe oghẹrẹ nọ Jesu ọ jọ

Eriwo ọthọthọ: Ahwo jọ a rẹ vravro nọ Jesu yọ ohwo Africa keme a jọ obe Eviavia rehọ eto riẹ dhesẹ uvovo ofuafo jẹ rehọ awọ riẹ dhesẹ “ẹroo owowoma nọ o bi lo nwranwranwra evaọ ebrerae.”—Eviavia 1:14, 15.

Uzẹme: Obe Eviavia o rehọ “eka dhesẹ” eware. (Eviavia 1:1) Eware eka nọ a ro dhesẹ eto gbe awọ Jesu i dikihẹ kẹ iruemu nọ Jesu o wo nọ a kpare iẹe no uwhu ze no, orọnikọ oghẹrẹ nọ ọ jọ nọ ọ gbẹ jọ otọakpọ họ. Nọ a ta nọ “eto uzou riẹ e jọ fuafo wọhọ uvovo ofuafo, wọhọ ekpalekpa-ame” na, ekọlọ obe Eviavia 1:14 o fodẹ rọ kẹ ọtadhesẹ orọnikọ epanọ eto Jesu e rrọ dẹẹ ọ jẹ ta kpahe he. Onana u dikihẹ kẹ oghẹrẹ nọ o wo areghẹ te fiki epanọ ọ kpako te. (Eviavia 3:14)

Awọ Jesu ọ “wọhọ ẹroo owowoma nọ o bi lo nwranwranwra evaọ ebrerae.” (Eviavia 1:15) Epọvo na re, ovao riẹ “u je lo wọhọ ọre nọ o bi lo nwranwranwra.” (Eviavia 1:16) Nọ orọnọ ohwo ọvo hayo ohwo uyẹ ọvo o wo oghẹrẹ ovioma nọ a jọ oria nana dhesẹ hẹ na, eruẹaruẹ nana i bi dhesẹ Jesu nọ a kpare ze no na wọhọ “ọnọ ọ rrọ oria elo nọ a rẹ sai te he.”—1 Timoti 6:16.

Eriwo ọthọthọ: Jesu yọ ọyẹlẹ yọ ọ goma ha.

Uzẹme: Jesu o wo udu ọ tẹ jẹ ga ẹro. Wọhọ oriruo, ọ gbaudu dhesẹ omariẹ kẹ otu ugbarugba nọ a nyaze ti mu ei. (Jọn 18:4-8) Jesu ọ goma gaga, oye o soriẹ ze nọ ọ sai je ro ru iruo ekapenta na dede nọ eware ọgbọna e jariẹ evaọ oke yena nọ a je ro ru iruo ekapenta ha.—Mak 6:3.

Otẹrọ ere, fikieme o rọ jọ bẹbẹ kẹ Jesu re ọ wọ ure-oja nọ a kare riẹ fihọ na? Kọ fikieme ọ rọ kake rọ enọ a kare kugbe ei na whu? (Luk 23:26; Jọn 19:31-33) O jọ ere keme taure a tẹ te kare Jesu yọ oma o lọhọ iẹe no. Jesu ọ rova gaga evaọ aso na soso taure a te ti kpe ei. (Luk 22:42-44) Evaọ aso yena ahwo Ju a lahiẹ e riẹ gaga, yọ okiokiọ riẹ isoja Rom a tẹ fae eviaviẹ re. (Matiu 26:67, 68; Jọn 19:1-3) O sae jọ nọ fiki eware yena nọ a ru rie na ọ rọ kaki whu na.

Eriwo ọthọthọ: Jesu ọ jọ ọkọkora gbe uwuweri.

Uzẹme: Jesu o wo ọkpọ uruemu Jihova Ọsẹ obọ odhiwu riẹ nọ Ebaibol o se “Ọghẹnẹ evawere na.” (1 Timoti 1:11; Jọn 14:9) Jesu dede o wuhrẹ ahwo eware nọ a re ru re a sai wo evawere. (Matiu 5:3-9; Luk 11:28) Onana u dhesẹ nọ Jesu ọ jọ sasasa orọnikọ ọ jọ ọkọkora ha.