Uyo nọ Ebaibol na ọ kẹ

Uvie Ọghẹnẹ yọ egọmeti nọ Jihova Ọghẹnẹ o ro mu. A jọ Ebaibol na se “Uvie Ọghẹnẹ” “Uvie odhiwu” re, keme obọ odhiwu u ti su no ze. (Mak 1:14, 15; Matiu 4:17) Dede nọ o wọhọ egọmeti ahwo-akpọ, u kpehru vi isuẹsu ahwo-akpọ evaọ oghẹrẹ kpobi.

  • Enọ I ti Su. Ọghẹnẹ ọ rọ Jesu Kristi mu Ovie Uvie na, ọ tẹ jẹ kẹe ogaga nọ o rro vi orọ isu akpọ na kpobi. (Matiu 28:18) Eware ezi ọvo Jesu ọ te rehọ ogaga nọ a kẹ riẹ na ru, keme oke nọ ọ jọ otọakpọ ọ jọ yoyou jẹ jọ ohwo nọ a rẹ sai fievahọ. (Matiu 4:23; Mak 1:40, 41; 6:31-34; Luk 7:11-17) Ọghẹnẹ ọ kẹ Jesu udu nọ ọ rọ salọ umutho ahwo jọ no erẹwho kpobi ze re a “te re uvie” kugbe Jesu evaọ obọ odhiwu.—Eviavia 5:9, 10.

  • Epanọ U ti Kri Te. Uvie Ọghẹnẹ u wo ohẹriẹ no egọmeti ahwo-akpọ enọ a re nwene ẹsikpobi. Uvie Ọghẹnẹ o te “raha ha.”—Daniẹl 2:44.

  • Ahwo nọ Uvie na U ti Su. Ohwo kpobi nọ o ru oreva Ọghẹnẹ ọ sae jọ otọ Uvie Ọghẹnẹ, makọ uyẹ hayo orẹwho kpobi nọ o no ze.—Iruẹru 10:34, 35.

  • Izi. Uvie Ọghẹnẹ u fi izi họ nọ e rẹ whaha iruemu iyoma. U te no ere no, izi nọ Uvie Ọghẹnẹ u fihọ i re fi obọ họ kẹ ahwo wo emamọ uruemu. Wọhọ oriruo, Ebaibol na ọ ta nọ: “Whọ rẹ rehọ eva ra kpobi, gbe ẹzi ra kpobi, gbe iroro ra kpobi, you Ọnowo na Ọghẹnẹ ra. Onana họ ujaje ulogbo gbe o nọ o rọ aro. O rọ avivẹ o wọhiẹ e re nọ, You omọfa epanọ who you oma ra.” (Matiu 22:37-39) Fiki uyoyou nọ enọ e te jọ otọ Uvie Ọghẹnẹ a wo kẹ Ọghẹnẹ gbe erivẹ rai, a ti ru eware ezi kẹ amọfa.

  • Eware nọ A ti Wuhrẹ. Uvie Ọghẹnẹ u ti wuhrẹ ahwo nọ a te jọ otọ esuo na re a sai ru lele izi nọ o fihọ na.—Aizaya 48:17, 18.

  • Eware nọ U ti Ru. Uvie Ọghẹnẹ o te kuvẹ hẹ re enọ e rrọ otọ riẹ a reoja yọ isu na a bi fe. Ukpoye, u ti ru oreva Ọghẹnẹ gba, onọ u kugbe eyaa Ọghẹnẹ inọ ahwo nọ a yoẹme kẹe a te rria bẹdẹ bẹdẹ evaọ aparadase otọakpọ.—Aizaya 35:1, 5, 6; Matiu 6:10; Eviavia 21:1-4.