Uyo nọ Ebaibol na ọ kẹ

Evaọ Ebaibol na, ẹsiẹvo ọvo a ta ẹme te eware nọ a rẹ drọ fihọ oma evaọ Iruo-Izerẹ 19:28, nọ o ta nọ: “Wha ka eka fihọ oma rai hi.” Ọghẹnẹ o je uzi nana kẹ emọ Izrẹl, nọ u ru rai wo ohẹriẹ no ewho efa kpobi nọ e wariẹ e rai họ enọ e jẹ hai kere edẹ hayo drọ eka eghẹnẹ rai fihọ omarai. (Iziewariẹ 14:2) Dede nọ uzi nọ a je kẹ emọ Izrẹl na o gba Ileleikristi hi, u fo nọ ma roro ziezi kpahe oware nọ o soriẹ ze nọ a ro je uzi nana.

Kọ u fo re Oleleikristi ọ drọ eware fihọ oma?

Eria Ebaibol nọ e rrọ obotọ na e sai fiobọhọ kẹ owhẹ roro kpahe ẹme nana:

  • “Ere ọvona re, jọ eyae na a gọ ẹgọ nọ . . . ọ rrọ owowa.” (1 Timoti 2:9) Te ezae te eyae ohrẹ nana u kie kpahe. U fo re ma roro kpahe epanọ eware nọ ma bi ru e te jọ amọfa oma vi ukpenọ ma re ru eware nọ e rẹ lẹliẹ ahwo kpobi tẹrovi omai.

  • Ahwo jọ a rẹ drọ eware fihọ oma ro dhesẹ oria nọ a no ze hayo ro dhesẹ nọ a rrọ orọ obọrai, yọ amọfa a re ru ei ro dhesẹ nọ ae a wo omarai. O make rrọ ere na, Ebaibol na ọ ta kẹ Ileleikristi nọ: “wha rehọ oma rai dhe idhe nọ e rrọ uzuazọ, ọrẹri, onọ Ọghẹnẹ ọ rẹ jẹrehọ, re wha rọ enẹ rehọ ẹgba iroro rai gọe.” (Ahwo Rom 12:1) Rehọ “ẹgba iroro” ra rọ kiẹ oware nọ whọ rọ gwọlọ drọ eware fihọ oma ra. Otẹrọnọ who bi kie lele onọ u kie ze u kie kpo hayo fikinọ whọ gwọlọ rehọ iẹe dhesẹ utu nọ whọ rrọ, kareghẹhọ nọ oke o be nyaharo na iroro ra e sai nwene rekiyọ eware nọ whọ drọ fihọ oma no na e gbẹ riẹ. Nọ whọ tẹ kiẹ oware nọ o be wọ owhẹ gwọlọ drọ eware fihọ oma, whọ te jẹ emamọ iroro.—Itẹ 4:7.

  • “Oma omamọ ohwo o rẹ rehọ ọruẹriọ tha, rekọ ohwo kpobi nọ o re bru okpakpa ọ rẹ te jọ ababọ eware.” (Itẹ 21:5) Ẹsejọ, okpakpa ahwo nọ a rẹ drọ eware fihọ oma na a re ro ru ei, rekọ o sae whae ze nọ ahwo jọ a gbẹ rọ gwọlọ kẹle omai hayo rehọ omai iruo ho. Nọ a tẹ gwọlọ voro ai no e rẹ ghare gaga yọ edada riẹ e rẹ ga wo umuo ho. Ekiakiẹ gbe ahwo buobu nọ a re voro eware nọ a drọ fihọ oma no, a ta nọ ahwo buobu nọ a drọ eware fihọ oma no a rẹ vioja uwhremu na inọ a riẹ a hae drọ họ.