Nọ eri nọ a re se manta ray na ọ tẹ gwọlọ re emu, o ve rovie enu riẹ fihọ kẹkẹe re ame abade, imiyei gbe emeware jọ nọ e rrọ kakao gaga i kporo ruọ unu riẹ. A re se imiyei gbe emeware ekakao nana plankton. Nọ ame na avọ imiyei ekakao na e tẹ ruọ unu riẹ no, oware jọ nọ o wọhọ oyẹyẹ evaọ unu riẹ na o vẹ yẹyẹ imiyei na lahwe, i ve kpobọ edhuru riẹ re o si rai lọ. Ame na ọ vẹ nya oyẹyẹ na vrẹ kpobọ asọ riẹ re o su zihe fihọ abade na. Rekọ oware jọ nọ u gbunu gaga họ, makọ imiyei nọ e kawo te epanọ e hae sae rọ nya oyẹyẹ na vrẹ, oyẹyẹ manta ray na o sae tubẹ yẹyẹ ae lahwe. Ọzae jọ nọ a re se Ed Yong nọ ọ rẹ niyẹrẹ eware nọ egba-eriariẹ a kiẹ via ọ ta nọ oware nọ oyẹyẹ manta ray na o be sai ru na “yọ oware nọ ahwo a rri nọ o sae lọhọ vievie he.”

 Roro kpahe onana: Oyẹyẹ manta ray na o wọhọ afetọ nọ o dina rrọ gheghelie nọ u wo akọ-ava, yọ isoi eware enana eye e rrọ unu riẹ. Eware nana nọ e wọhọ afetọ na, akọ rai jọ i rri obemu, yọ ejọ i rri obaro. Akọ na ọ rẹ hẹriẹ ame abade nọ o kporo fihọ unu na re ame na jọ o kporo kpobọ ehru afetọ na, ame na jọ o ve je kporo kpohọ obotọ riẹ re, onọ u re ru nọ ẹmẹvohẹ ọ rẹ rọ jọ ame na.

 Nọ imiyei esese na hayo eware efa nọ eri na ọ rẹ re e tẹ kaoma te akọ afetọ na, e vẹ la zihe ziọ ame nọ ọ rrọ unu eri na, ẹvohẹ ame na ọ vẹ wọ ae kpobọ edhuru riẹ re o si rai lọ. Makọ imiyei gbe eware nọ e kawo gaga dede e rẹ la fihọ edhuru eri na fiki oghẹrẹ nọ ẹmẹvohẹ ame na ọ rẹ lẹliẹ ai vre ugolo kpobọ edhuru na. Fiki oghẹrẹ nọ oyẹyẹ na o rrọ, makọ eware nọ e hae sae nya afetọ na vrẹ zihe kpobọ abade dede e rẹ ruọ obọ edhuru manta ray na.

 U te no ere no, o tẹ make rọnọ manta ray na o be ya ame vẹrẹ gaga hayo emu nọ ọ rrọ ame na ọ rrọ buobu, oyẹyẹ riẹ na u re fi di hi, yọ oyẹyẹ na ọvo u re ru omariẹ fo.

 Ahwo nọ a rẹ kiẹ kpahe eware a bi roro kpahe epanọ a ti ro rri oyẹyẹ manta ray ro ku eware nọ a sai ro ru ame ogbegbe fo je si irọba nọ e rrọ yoyoyo gaga no ame, re e siọ ahwo ba ẹnua.

 Ẹvẹ who roro: Kọ oyẹyẹ manta ray na o mu romavia? Manikọ ẹma a ma riẹ?