Limpet yọ usekpe ame nọ ekpe riẹ u kuwhrẹrẹ wọhọ ekpe-uke ogbe. O te je wo oghẹrẹ ibiakọ jọ nọ e rrọ gaga. Ohwo ọvo ọ sai roro nọ ubiakọ usekpe u re su te enẹ hẹ. Oware ogaga jọ nọ a re se goethite oye u ru ibiakọ na ga na. Yọ ibiakọ na i thuru jeghe jeghe fihọ igbi-akọ riẹ nọ e lọhọ omojọ.

 Roro kpahe onana: Limpet o wo oware jọ nọ o wọhọ ẹrọo nọ a re se radula, yọ ibiakọ na e wariẹ e riẹ họ. Ubiakọ ovuovo u there te imilimita ọvo ho. Ẹmẹbe nọ ọ wọhọ elọle nọ e rẹ tamu itho evaọ obotọ ame eye usekpe nana ọ rẹ re, fikiere o gwọlọ nọ ibiakọ nana ọvuọvo ọ rẹ ga hayo su ziezi re o sae fọrọ ẹmẹbe nana.

 Ahwo nọ a rẹ kiotọ eware a rehọ emaikroskopu nọ a rẹ rọ ruẹ eware nọ e kawo gaga rri ibiakọ usekpe nana re a ruẹ epanọ o ga hayo su te. A tẹ ruẹ nọ a re ruẹ oware ovuovo nọ u su te ubiakọ usekpe nana ha, makọ ifi aruẹ dede. Ọga ahwo nana nọ a rẹ kiotọ eware na ọ ta nọ: “U fo re ma rri ubiakọ usekpe nana ro ku eware, re e ruẹse ga ziezi.”

 Ahwo nọ a rẹ kiotọ eware a ta nọ a tẹ rọ eware nọ e rrọ suẹsu wọhọ ubiakọ usekpe nana ku eware wọhọ imoto, ekọ, irupre, gbe ibiakọ dede, e te ga ziezi.

 Ẹvẹ Who Roro? Kọ ubiakọ usekpe ame nana nọ u su gaga na u mu romavia? Manikọ ẹma a ma riẹ?