Ibi dandelion e rrọ usu eware nọ ofou ọ rẹ wọ rra gaga. Nọ ofou o te fou ku dandelion, ibi riẹ buobu i ve wolo no, i ve muhọ ẹrra wọhọ eparashutu ọsese. Dede nọ ẹbe nana o re di kpehru tere he, ofou ọ rẹ wọ ibi riẹ jọ thabọ te ikilomita ọvo hayo vrẹ ere. Eme o re fiobọhọ kẹ ibi na rra thabọ tere? Egba-eriariẹ a ruẹ nọ oghẹrẹ nọ ofou ọ rẹ rọ wọ ibi dandelion rra, u woma je kiehọ vi orọ eparashutu akuane.

 Roro kpahe onana: Ubi dandelion kpobi u wo ugbe nọ eware efuafo nọ e rrọ thethei wọhọ eto e rrọ obọ ẹroro riẹ, nọ a re se pappus. Pappus na e rẹ lẹliẹe rra wọhọ eparashutu evaọ ehru oke krẹkri, keme e rrọ vovovo.

 Eware efuafo ithethei nọ a re se pappus na i re ru oware ofa jọ nọ o rẹ lẹliẹe rra thethabọ. Ofou nọ o bi fou ruọ oma gbe udevie eware efuafo na o re kpobọ ehru riẹ, o ve bi fou thahe kurẹriẹ. Ofou nana nọ o bi fou thahe kurẹriẹ na o wo ẹgba nọ ọ rẹ rọ wọ pappus na kpehru, yọ onana u re je ru nọ ọ gbẹ rọ kaki kie ziọ otọ họ.

 Ma sae ta nọ, eware efuafo ithethei nọ a re se pappus nọ e nabe ruẹrẹhọ ziezi na, e wọhọ eparashutu nọ ofou o re fou ruọ eva, rekọ ubi na ọ rẹ rra woma vi eparashutu kpekufiẹ. Ofariẹ, ọ rrọ vovori gaga keme emamọ oware ovo o rrọ eva riẹ hẹ.

 Egba-eriariẹ a be gwọlọ oghẹrẹ nọ a sai ro ku eware nọ e rẹ sae rra wọhọ ibi dandelion na. Oware jọ nọ a rẹ sai ku re ọ rra wọhọ ibi dandelion họ, arupre ọsese nọ a re se drone, onọ o rẹ sae rra lọlọhọ ababọ eware buobu nọ e rẹ kẹe ẹgba. A sae rehọ oghẹrẹ drone nana ru eware buobu, te eware nọ a sai ro muẹrohọ epanọ ofou nọ ọ rrọ oria o woma te.

 Ẹvẹ who roro? Kọ ibi dandelion nọ ofou ọ rẹ wọ rra thethabọ na, u mu romavia? Manikọ ẹma a ma riẹ?