Taure ẹwowo ọ tẹ te sae rra, ọ rẹ rriẹ ibekpe riẹ fihọ uvo re ọre na o ru iriẹ nọ e rrọ ibekpe riẹ na ruọruọ. Rekọ evaọ ẹdẹ nọ uvo o rro ho, ẹwowo ọfuafo nọ a re se Cabbage White Butterfly ọ rẹ kake rọ oghẹrẹ ẹwowo efa kpobi rra. Eme ọ be hai fiobọhọ kẹe?

 Roro kpahe onana: Nọ oghẹrẹ ẹwowo efa buobu a tẹ be rria uvo taure a tẹ te rra, a rẹ ta ibekpe rai na kugbe hayo rovie ai kpobi totọ. Rekọ ẹwowo ọfuafo na o re rovie ibekpe riẹ omojọ ọvo. Egba-eriariẹ a kiẹ via inọ u wo umuo nọ ẹwowo nana o re rovie ibekpe riẹ te dẹẹ re ẹrrorro ọre na ọ ruẹsi te iriẹ ibekpe na ziezi. Onana u re ru nọ ẹrrorro ọre na ọ rẹ rọ nya ruọ iriẹ nọ e rrọ ikrama riẹ nọ i re fiobọhọ kẹe rra na ababọ oke oraha.

 Egba-eriariẹ University of Exeter, obọ England a ru ekiakiẹ sọ a sai rri ẹwowo nana nọ o re rovie ibekpe riẹ re he nọ o te kiemu na, ro ru onaa fihọ ekwakwa nọ e rẹ rehọ ẹgba ẹlẹtriki no elo ọre ze re i woma viere. Nọ a gine ru ere, a tẹ ruẹ nọ a tẹ ghale ẹgba nọ ekwakwa nana e jẹ hae rehọ no ọre na ze kpohọ abava, enwenọ abọ ọvo ẹgba yena ọ kpahe riẹ.

 Egba-eriariẹ na a te je muẹrohọ nọ ibekpe ẹwowo nana i re lo gaga. Onana u ru nọ a ro rri elo ibekpe na gbe umuo nọ o re rovie ai te na ro ku ekwakwa nọ e rrọ vovori, nọ e rẹ jẹ rehọ ẹgba ẹlẹtriki no elo ọre ze ziezi. Onana o wha riẹ ze nọ omọvo egba-eriariẹ na nọ a re se Profẹsọ Richard ffrench-Constant ọ rọ ta nọ, ẹwowo ọfuafo nana yọ “ọwena ologbo nọ ọ riẹ oghẹrẹ nọ o re ro wo ẹgba no elo ọre na ze.”

 Ẹvẹ who roro? Kọ onaa nọ ẹwowo ọfuafo nana o re ro rovie ibekpe riẹ omojọ ọvo nọ o te kiemu na, u mu romavia? Manikọ ema a ma riẹ?