Ẹsibuobu nọ whọ tẹ ruẹ ubusu hayo ologbo, yọ ọ be lalọ oma riẹ. A tẹ ghale oke nọ ubusu o ro kparo fihọ kpohọ abane, abọvo oke yena soso ọ rẹ rọ lalọ oma na. Enẹ ologbo o re ro ru oma riẹ fihọ tẹtẹtẹ, yọ oghẹrẹ ẹrọo nọ o wo ọ be sai ro ru onana.

 Roro kpahe onana: Ẹrọo ubusu ọ rrọ krase krase keme u wo egọle nọ i bu te egba ivẹ gbe udhone-gbikpe (290) nọ e gẹle rri emu. Egọle nana e rrọ kakao gaga yọ e joma ga te ekpe-utuobọ ohwo. Yọ egọle nana ọvuọvo o wo omoria jọ nọ eya e rẹ ro ẹsiẹsiẹe nọ ologbo o te vi ẹrọo rehọ. Nọ ologbo ọ tẹ be lalọ oma riẹ, egọle na i re no eto riẹ te obọ ohọroma na, eya na i ve wholo ohọrọ na.

 Kẹdẹ kẹdẹ, eya nọ ubusu o re ro wholo oma riẹ nọ ọ be lalọ oma na e rẹ vọ ugẹji nọ a rẹ rọ re emu na esa. Yọ eware jọ e rrọ eya na nọ i re si iluhu gbe eware iyoma efa no eto gbe ohọroma na. U te no ere no, eya nọ ubusu o re ro wholo na yọ edhere jọ nọ o re ro ru oma riẹ dhẹ keme ọ rẹ royẹ tere he, yọ ẹroyẹ ọ rẹ lẹliẹ oma dhẹ.

 Nọ ubusu ọ tẹ lalọ ku oria nọ eto e jọ thahe ku, o ve ru egọle na ga ziezi re e ruẹse fere eto na no. Ubusu ọ rẹ jẹ rọ ẹroro egọle na wọrọ ohọroma na nọ ọ tẹ be lalọ oma na. Ahwo nọ a rẹ kiẹ kpahe eware sa-sa a rri ẹrọo ubusu ro ru oghẹrẹ afetọ jọ. Afetọ nana ọ rẹ j’ohwo fẹ eto ziezi vi afetọ gheghe, yọ o rẹ bẹ eririe he. U te no ere no, o rẹ ra eto nọ e thahe ku lọlọhọ. Ahwo nọ a rẹ kiẹ kpahe eware a ta nọ ẹrọo ologbo o ti fiobọhọ kẹ ahwo riẹ oghẹrẹ nọ a sai ro ru eware nọ e rrọ etueto hayo nọ e nwa ku fihọ fuafo. O sai je fiobọhọ kẹ ahwo riẹ oghẹrẹ nọ a rẹ rọ rehọ udẹ hayo umu nọ a re mi ro wholo oma nọ o rrọ etueto.

 Ẹvẹ who roro? Kọ ẹma a ma ẹrọo ubusu? Manikọ u mu romavia?