Obe jọ nọ a kere kẹ eyae nọ i re yẹ eyae o ta nọ: “Emu ọvuọvo nọ a rẹ dẹ kẹ ọmọ nọ ọ wọhọ ame-ivie oniọmọ dẹẹ ọ rrọ họ.” Oware jọ nọ o wha riẹ ze nọ ame-ivie oniọmọ o rọ rrọ oware nọ o mai fo kẹ ọmọ na họ, oma oni na u re nwene ame-ivie na fihọ oghẹrẹ nọ o mai kiehọ ọmọ na oma.

 Roro kpahe onana: Nọ ọmọ o te bi vi evie, ame-ivie oni na o re nwene. Nọ oni ọ tẹ be kẹ ọmọ evie, eware nọ e rẹ mae jọ ame-ivie nọ ọ rẹ kake ruọ ọmọ na unu họ protein, vitamins, minerals, gbe ame. Rekọ re ọmọ o te ti vi evie re, eware nọ e rẹ mae jọ ame-ivie na kọ iwhri, onọ u re ru nọ eva e rẹ rọ vọ ọmọ na ziezi. Ame-ivie na o re tube nwene lele oghẹrẹ nọ ọmọ na ọ kpako te no, gbe ezi nọ a rrọ evaọ ẹgbukpe na.

 Eware jọ nọ a re se hormone nọ i re fiobọhọ kẹ ọmọ e rrọ eva ame-ivie oni na. Ejọ wọhọ melatonin eye e rẹ mae jọ ame-ivie na evaọ aso, efa e vẹ mae jariẹ evaọ oke uvo. Hormone nana nọ i bi nwene na i re fiobọhọ kẹ ọmọ na riẹ oke nọ ọ rẹ rọ wezẹ gbe oke nọ ọ rẹ rọ rọwo ze.

 Nọ oni o te yẹ ọmọ obọ, evaọ emedẹ jọ, ame-ivie oni na o rẹ jọ ekọlọ iyẹlo, yọ a re se ame-ivie nana colostrum. Ame-ivie nana ọ rẹ kake daruọ ọmọ na oma, yọ u wo emamọ eware buobu nọ e riẹe eva. Fikiere ọmọ na o te vi umutho riẹ ọvo dede, u re fiobọhọ kẹe gaga. Colostrum o wo emamọ eware buobu nọ o re ru nọ ọmọboba ọ gbẹ rọ mọ kuẹkuẹkuẹ hẹ. U te no ere no, colostrum ọ rẹ wozẹ ọmọ na eva, re o ne eware nọ i woma ha kufiẹ.

 U du gwọlọ nọ oniọmọ ọ rẹ ruawa ha sọ ame-ivie riẹ o te vọ ọmọ na eva, o tẹ make rọnọ ijime o yẹ, keme epanọ ọmọ na o vi ivie na ga te ere ame-ivie na ọ rẹ dhẹ te.

 Ẹvẹ who roro? Kọ ame-ivie oniọmọ avọ emamọ eware kpobi nọ e riẹe na u mu romavia? Manikọ ẹma a ma riẹ?