Kpohọ eme nọ e riẹ eva

Kpohọ eme nọ e kẹle obọ emuhọ

Isẹri Jihova

Isoko

A Mu Oware Okpokpọ Jọ Họ Evaọ Manhattan

A Mu Oware Okpokpọ Jọ Họ Evaọ Manhattan

Evaọ amara Akpegbọvo, 2011, Isẹri Jihova a mu ọruẹrẹfihotọ jọ họ evaọ Manhattan nọ a sae rọ wha ovuẹ Ebaibol na te ahwo oma ẹkwoma ebe mai nọ a re fihọ emẹjẹ gbe eware nọ a rẹ sai ghelie no oria ruọ oria. A bi ru onana evaọ ofẹ obọze ovatha-ọre Manhattan, oria nọ o rẹ mai zurie evaọ New York City.

Isẹri Jihova a ghale oria nana kpohọ abọ ane. Abọ ọvuọvo o wo eria sa-sa nọ a jọ ruẹrẹ ebe nọ a kere no Ebaibol ze fihọ ehru emẹjẹ gbe eware nọ a re ghelie no oria ruọ oria. Ahwo nọ a be nyavrẹ a sae ruẹ ebe nana jẹ rehọ ae, yọ Isẹri Jihova nọ e rẹ ta usiuwoma ẹsikpobi e rrọ etẹe nọ e rẹ rọ ebe na kẹ ahwo. Eria nọ imoto e rẹ jọ wọ ahwo, nọ i re zurie a rẹ mai fi ebe na họ.

A rẹ jọ eria nana rọ Ebaibol kẹ iyo enọ nọ ahwo a wo. Ahwo nọ owọ rai o rrọ onyonya, a rẹ sae rehọ obe nọ a re se oke ofa.

Ebe evẹrẹ sa-sa e riẹ. Otẹrọnọ obe ẹvẹrẹ nọ ohwo jọ ọ gwọlọ o riẹ hẹ, ohwo na ọ rẹ sai zihe ze te rehọ obe na nọ emedẹ jọ e tẹ vrẹ no.

Ọruẹrẹfihotọ nana o were ahwo gaga, makọ otu egọmeti dede. Iporisi jọ ọ ta nọ: “Eme wha gbe ri ro ru onana anwẹdẹ hẹ? Oware nọ ahwo a gwọlọ dẹẹ wha be kẹ ae na.

Nọ ọzae jọ nọ ọ jẹ nyavrẹ ọ ruẹ obe ọ Eme Ebaibol na O Gine Wuhrẹ? na, o te dikihẹ. Ọ tẹ ta nọ ọ ruẹ ahwo nọ a rrọ akotọ edhere se obe na, rekọ ọ riẹ oria nọ obe na u no ze he. Obọnana, ọ riẹ oria na no.

Evaọ eka ezeza soso, ọzae jọ ọ jẹ hae nya oria ebe na vrẹ kẹdẹ kẹdẹ kpohọ iruo. Ẹdẹjọ o te dikihẹ, ọ tẹ ta kẹ Isẹri Jihova nọ e rrọ oria ebe na nọ, “Wha fi obọ họ kẹ omẹ.” A tẹ kẹe Ebaibol je dhesẹ oghẹrẹ nọ ọ sai ro wo erere noi ze kẹe.

Ahwo buobu a rẹ wẹriẹ re a lele inievo na ta ẹme kpahe Ebaibol. Evaọ amara jọ kẹle na, ọruẹrẹfihotọ nana nọ ọ jọ Manhattan muhọ na u ru nọ inievo na a rọ rehọ emagazini nọ i bu te 3,797 gbe ebe nọ i bu te 7,986 kẹ ahwo no.