Eware nọ E Riẹ

 

Edhe

Ẹme Emuhọ

 2

Eware Aghae nọ E Rrọ Ebaibol Na

 3

Wo Onaa Ziezi Evaọ Usi Uwoma Ota Na

 4

Uzuazọ Oleleikristi

 5

Ẹme Ekuhọ

 6

Romakẹ Isase Ẹgbede avọ Ewuhrẹ

 7

Ohrẹ

 8

Oke

 9

Iweze Ọsẹro Okogho

 10

Oka Okokohọ Okogho Hayo ọrọ Ubrotọ

 11

Oka Ekareghẹhọ

 12

Ọsẹro Ewuhrẹ Uzuazọ gbe Usi Uwoma Ota

 13

Ohwo-Agbara Ewuhrẹ Uzuazọ gbe Usi Uwoma Ota

 14

Ọnọ O re Koko Iruẹru Ugboma Ekpako na Họ

 15

Ọkohrẹ Obufihọ

 16

Eklase Avivẹ

 17

Ividio

 18

1. A re ru Ewuhrẹ Uzuazọ gbe Usi Uwoma Ota mai na lele Obe Ewuhrẹ Uzuazọ gbe Usi Uwoma Ota Mai na gbe ekpọvio nọ e rrọ obotọ na. A rẹ ta kẹ iwhowho-uvie kpobi re a kere odẹ fihotọ kẹ ẹme-oruo. Amọfa nọ a be ziọ ewuhrẹ ziezi a rẹ sai kere odẹ fihotọ otẹrọnọ a rọwo kugbe iwuhrẹ Ebaibol na yọ uzuazọ rai o rọwo kugbe ehri-izi Ileleikristi.—be ẹwẹ. 282.

 2. Ẹme Emuhọ: Iminiti 3 hayo kpẹre viere. Koka koka, nọ a tẹ rọ ole gbe olẹ mu ewuhrẹ na họ no, kẹsena ohwo-agbara Ewuhrẹ Uzuazọ gbe Usi Uwoma Ota na ọ vẹ ta ẹme emuhọ nọ ọ rẹ rọ kpare isiuru inievo na kẹ eme nọ a ti ru evaọ ewuhrẹ na soso, jẹ nọ onọ nọ o rrọ evaọ Obe Iyo Ewuhrẹ Uzuazọ Oleleikristi gbe Usi Uwoma Ota na.

 3. Eware Aghae nọ E Rrọ Ebaibol Na:

  • Ẹme: Iminiti 10. Uzoẹme gbe igogo eme ivẹ hayo esa nọ a rẹ ta kpahe e te jọ Obe Ewuhrẹ Uzuazọ gbe Usi Uwoma Ota na. Ọkpako ukoko hayo odibo oruiruo nọ o te ziezi a rẹ rehọ ẹme nana kẹ. Nọ a te bi mu obe Ebaibol okpokpọ họ evaọ isase Ebaibol ẹkpoka na, a rẹ kaki kporo ividio obe Ebaibol yena. Ohwo nọ o bi ru ẹme na ọ rẹ sae ta kpahe epanọ ividio na i ro kiekpahe uzoẹme na. Rekọ ọ rẹ ruẹ nọ ọ ta kpahe igogo eme efa nọ e rrọ obe ewuhrẹ na. Epọvo na re, jọ ọ rehọ ifoto nọ e rrọ obe ewuhrẹ na ruiruo ziezi, keme i bi ru eme nọ a be ta kpahe na vẹ.

  • Romatotọ Kiẹ Eware Aghae Via: Iminiti 8. Ẹme nana yọ ẹme enọ gbe iyo nọ a re ru ovavo ababọ ẹme emuhọ hayo ẹme ekuhọ nọ ohwo nọ o bi ru ẹme na ọ rẹ ta. Ọkpako  hayo odibo oruiruo nọ o te ziezi o re ru ei. Ọ rẹ ghale oke na lele enọ ene na, ọ rẹ sae raha oke fihọ ọnọ ọ mai kiekpahe ẹgwọlọ ukoko na. Ghele na, ọ rẹ nọ enọ na kpobi. Ofariẹ, ọye ọ rẹ salọ sọ a re se eria Ebaibol nọ e rrọ enọ ivẹ ọsosuọ na kpobi. Iyo ahwo nọ a te kpahe fihọ e rẹ jọ emaharo 30 hayo kpẹre viere.

  • Isase Ebaibol: Iminiti 4 hayo kpẹre viere. Oniọvo-ọmọzae a rẹ rọ ẹme nana kẹ. Ọmọ-ewuhrẹ na o re se oria Ebaibol na ovavo ababọ ẹme emuhọ hayo ẹme ekuhọ nọ ọ rẹ ta. Ohwo-agbara ewuhrẹ na ọ rẹ ruẹ nọ o fiobọhọ kẹ emọ-ewuhrẹ na se eme na gbagba re a wo otoriẹ rai, se ai vevẹ, fi ẹgba họ ae ziezi, nwene edo uvo rai lele epanọ ẹme na ọ nya, dhizu evaọ oria nọ u fo, je se eme na lele ẹkoma ẹmeọta rai.

  4. Wo Onaa Ziezi Evaọ Usi Uwoma Ota Na: Iminiti 15 hayo kpẹre viere. A ru abọ ewuhrẹ nana re u fiobọhọ kẹ inievo na ruẹrẹ oma kpahe kẹ usi uwoma ota, je wo onaa ziezi evaọ oghẹrẹ nọ a re wuhrẹ amọfa. Ọmọ-uwuhrẹ na ọ rẹ rọ iriruo usi uwoma ota nọ e rrọ ẹwẹ-obe ọsosuọ ọrọ Obe Ewuhrẹ Uzuazọ gbe Usi Uwoma Ota na ro ru ẹme ẹdẹ ọsosuọ gbe ozihebro na. Owhowho-uvie na ọ rẹ salọ sọ ọ rẹ ta kpahe obe hayo ividio jọ nọ o rrọ Ẹkpẹti Ekwakwa Ewuhrẹ mai na. A jọ Obe Ewuhrẹ Uzuazọ gbe Usi Uwoma Ota na dhesẹ oke nọ ọmọ-uwuhrẹ ọvuọvo o re ro ru ẹme riẹ, yọ evaọ ẹsejọ a te jariẹ kẹ ehrẹ efa re. Ọmọ-uwuhrẹ na o re ku eme obọriẹ kugbe ẹme na ha fikinọ oke o gbẹ riẹ. U du gwọlọ nọ ọnọ a kẹ ẹme na o re ku eme efa ba ẹme nọ a kẹ riẹ hẹ fikinọ ọ gwọlọ ru te oke nọ a kẹ riẹ. Ohwo nọ ọ ruẹrẹ oma kpahe ziezi ọ rẹ sae tubẹ rehọ iminiti ọvo hayo kpẹre viere ru ẹme riẹ. O tẹ lọhọ, a sae rọ ẹme ọmọ-uwuhrẹ kẹ ọkpako ukoko ru dede.

  • Ividio Oriruo Usi Uwoma Ota: A te jọ eka esa ọsosuọ evaọ k’amara k’amara kporo ividio oriruo usi uwoma ota na jẹ ta kpahe ae. Ividio na i ti dhesẹ epanọ a re ru usi uwoma ota ẹdẹ ọsosuọ, ozihebro ọsosuọ gbe ozihebro avọ ivẹ. Ohwo-Agbara Ewuhrẹ Uzuazọ gbe Usi Uwoma Ota na o re ru ẹme nana.

  • Ẹdẹ Ọsosuọ: A rẹ sae rehọ ẹme nana kẹ oniọvo-ọmọzae hayo oniọvo-ọmọtẹ. A tẹ rehọ iẹe kẹ oniọvo-ọmọzae, oniọvo-ọmọzae a re gbe ru ei hayo ohwo uviuwou riẹ, yọ a tẹ rehọ iẹe kẹ oniọvo-ọmọtẹ, oniọvo-ọmọtẹ a re gbe ru ei hayo ohwo uviuwou riẹ. Ọmọ-ewuhrẹ na avọ ohwo nọ a ti gbe ru ẹme na, a rẹ sae keria hayo dikihẹ ru ẹme na. Epanọ a re ro yere uyere evaọ ẹvẹrẹ na, oye ọmọ-ewuhrẹ na o re ro yere ohwo uwou na. Oriruo usi uwoma ota na a re rri ro ru ẹme na.

  • Ozihebro Ọsosuọ: A sae rehọ ẹme nana kẹ oniọvo-ọmọzae hayo oniọvo-ọmọtẹ. A tẹ rehọ iẹe kẹ oniọvo-ọmọzae avọ oniọvo-ọmọtẹ a re gbe ru ei vievie he hayo a tẹ rehọ iẹe kẹ oniọvo-ọmọtẹ avọ oniọvo-ọmọzae a re gbe ru ei vievie gbe he. (km 5/97 ẹwẹ. 2) Ọmọ-ewuhrẹ na avọ ohwo nọ a ti gbe ru ẹme na, a rẹ sae keria hayo dikihẹ ru ẹme na. Ọmọ-uwuhrẹ na o re ru ẹme na wọhọ nọ o zihe bru ohwo nọ ọ gaviezọ kẹe evaọ ẹdẹ ọsosuọ nọ ọ rọ ta usi uwoma kẹe. Oriruo usi uwoma ota nọ o rrọ Obe Ewuhrẹ Uzuazọ gbe Usi Uwoma Ota na a re rri ro ru ei.

  • Ozihebro avọ Ivẹ: A rẹ sae rehọ ẹme nana kẹ oniọvo-ọmọzae hayo oniọvo-ọmọtẹ. A tẹ rehọ iẹe kẹ oniọvo-ọmọzae avọ oniọvo-ọmọtẹ a re gbe ru ei vievie he hayo a tẹ rehọ iẹe kẹ oniọvo-ọmọtẹ avọ oniọvo-ọmọzae a re gbe ru ei vievie gbe he. (km 5/97 ẹwẹ. 2) Ọmọ-ewuhrẹ na avọ ohwo nọ a ti gbe ru ẹme na, a rẹ sae keria hayo dikihẹ ru ẹme na. Ọmọ-uwuhrẹ na o re ru ẹme na wọhọ nọ o zihe bru ohwo nọ ọ gaviezọ kẹe evaọ ozihebro ọsosuọ na. Oriruo usi uwoma ota na a re rri ro ru iei.

  •   Obe-Uwuhrẹ Ebaibol: A rẹ sae rehọ ẹme nana kẹ oniọvo-ọmọzae hayo oniọvo-ọmọtẹ. A tẹ rehọ iẹe kẹ oniọvo-ọmọzae avọ oniọvo-ọmọtẹ a re gbe ru ei vievie he hayo a tẹ rehọ iẹe kẹ oniọvo-ọmọtẹ avọ oniọvo-ọmọzae a re gbe ru ei vievie gbe he. (km 5/97 ẹwẹ. 2) Ọmọ-ewuhrẹ na avọ ohwo nọ a ti gbe ru ẹme na, a rẹ sae keria hayo dikihẹ ru ẹme na. A re ru onana wọhọ uwuhrẹ Ebaibol nọ a bi ru no anwẹdẹ. Otẹrọnọ a gbẹ kẹ ọmọ-uwuhrẹ na oria uthubro nọ u wo ẹme-emuhọ gbe ẹme-ekuhọ họ, ẹme na o re wo ẹme emuhọ gbe ekuhọ họ. Nọ o ti ru ẹme na, u du gwọlọ nọ o re se oria nọ a si ẹme na kpobi no ze do via ha, rekọ u te jei ọ sai ru ere. O re ru ewuhrẹ na ziezi.

  • Ẹme nọ Ra re Ru Ovavo: Oniọvo ọmọzae o re ru ẹme na yọ ovavo o re ru ẹme na.

  5. Uzuazọ Oleleikristi: A rẹ rehọ ole mu abọ nana họ, kẹsena a ve ru ẹme iminiti 15 nọ ọ rẹ sai wo abọvo hayo abava, yọ a ru rie re o fiobọhọ kẹ omai riẹ epanọ ma sai ro fi Ẹme Ọghẹnẹ họ iruo. A gbẹ fodẹ ohwo nọ a rẹ rehọ ẹme nana kẹ hẹ, a rẹ sae rehọ iẹe kẹ ọkpako hayo odibo oruiruo nọ o te ziezi, rekọ ọkpako ukoko ọvo a rẹ rehọ abọ ẹgwọlọ ukoko na kẹ.

  • Uwuhrẹ Ebaibol Ukoko: Iminiti 30. Ọkpako ukoko nọ o te ziezi a rẹ rehọ iẹe kẹ. (Otẹrọnọ ekpako nọ e rrọ ukoko na a gbe bu tere he, idibo iruiruo nọ i te ziezi a rẹ sai ru ei.) Ugboma ekpako na a rẹ jiroro ohwo nọ o te nọ ọ rẹ sai ru Uwuhrẹ Ebaibol Ukoko na. Inievo nọ a salọ na a re ru ewuhrẹ na ziezi lele oke, a re ru igogo eria Ebaibol na vẹ, je fiobọhọ kẹ inievo na ruẹ epanọ eme nọ a ru evaọ ewuhrẹ na i wuzou te. A te se ekpọvio epanọ a re ru Uwuhrẹ Uwou-Eroro na, u ti fiobọhọ kẹ ae ru ewuhrẹ na ziezi. O tẹ lọhọ, jọ a hai nwene inievo nọ i ti ru ewuhrẹ na koka koka gbe enọ i ti se edhe-ẹme na. Otẹrọnọ ohwo-agbara Ewuhrẹ Uzuazọ gbe Usi Uwoma Ota na ọ ta nọ a ru ewuhrẹ na kpẹre, oniọvo nọ o bi ru ei na ọ rẹ jiroro kẹ omariẹ epanọ o re ro ru ei kpẹre. Ọ sae siọ idhe-eme jọ ba ese.

  6. Ẹme Ekuhọ: Iminiti 3 hayo kpẹre viere. Ohwo-agbara Ewuhrẹ Uzuazọ Oleleikristi gbe Usi Uwoma Ota na, o re ru ọkiẹkpemu eware jọ nọ a ta kpahe evaọ ewuhrẹ na nọ u kugbe onọ gbe uyo riẹ nọ o rrọ Obe Iyo Ewuhrẹ Uzuazọ Oleleikristi gbe Usi Uwoma Ota na. Ọ rẹ jẹ ta kpahe igogo eware jọ nọ a ti wuhrẹ evaọ oka notha, jẹ sae nọ onọ jọ nọ a te kuyo riẹ evaọ oka notha. Oke o tẹ riẹ, ọ rẹ sae fodẹ emọ-ewuhrẹ nọ i ti ru ẹme evaọ ewuhrẹ oka notha. A gbẹ kẹ ekpọvio efa ha, ohwo-agbara na o re ru owhowhovia kpobi je se ileta nọ ukoko na u wo evaọ etoke ẹme ekuhọ riẹ na. A re se iwhowhovia usi uwoma hayo orufuọ no eplatfọmo ze he, ukpoye a re fi ei họ ebọdo evuẹ na. Otẹrọnọ oke ẹme ekuhọ na u ti te ohwo-agbara na ru iwhowhovia ukoko na je se ileta ha, ọ rẹ ta kẹ inievo nọ i ti wobọ evaọ abọ Uzuazọ Oleleikristi na re a ru ẹme rai kpẹre. (Rri  edhe-ẹme avọ 5 gbe  9.) A rẹ rehọ ole gbe olẹ ku ewuhrẹ na họ.

 7. Romakẹ Isase Ẹgbede avọ Ewuhrẹ: Muhọ no oka Ọvo 7, 2019 vrẹ, ibroshọ uwuhrẹ na ohwo-agbara Ewuhrẹ Uzuazọ gbe Usi Uwoma Ota na o ti rri rọ kẹ ọmọ-uwuhrẹ uyere gbe ohrẹ. Ọmọ-uwuhrẹ kpobi ọ rẹ rọ oria uwuhrẹ nọ o rrọ eva oka () nana nọ a kere fihọ aro ẹme nọ ọ rrọ Obe Ewuhrẹ Uzuazọ gbe Usi Uwoma Ota na ru ẹme riẹ. Evaọ oka ọsosuọ k’amara k’amara, ohwo-agbara Ewuhrẹ Uzuazọ gbe Usi Uwoma Ota na ọ te rehọ oria uwuhrẹ ovo jọ evaọ ibroshọ uwuhrẹ na ro lele ogbotu na ta ẹme. Oria “Kere Ẹnyaharo Ra Fihotọ” nọ o rrọ ibroshọ na, ọ rrọ rọkẹ ọmọ isukulu na, yọ ohwo-agbara na o re kpoka fihọ iẹe vievie he.

  8. Ohrẹ: Nọ ọmọ-ewuhrẹ ọvuọvo o te ru ẹme riẹ no, ohwo-agbara Ewuhrẹ Uzuazọ gbe Usi Uwoma Ota na ọ vẹ rehọ iminiti 1 yere oniọvo na jẹ kẹe ohrẹ nọ u fo rono Ibroshọ Uwuhrẹ na ze. Nọ ohwo-agbara na o te bi zizie ọmọ-ewuhrẹ, ọ rẹ fodẹ oria uwuhrẹ nọ ọmọ-ewuhrẹ na o  ti ru hu. Rekọ nọ o te ru ẹme riẹ no je yere iei no, ohwo-agbara na ọ vẹ fodẹ oria uwuhrẹ nọ a kẹ ọmọ-ewuhrẹ na, je dhesẹ oghẹrẹ nọ o ro fi oria uwuhrẹ na họ iruo, hayo ọ vẹ rọ areghẹ dhesẹ vevẹ kẹe inọ o gbe muẹrohọ oria uwuhrẹ yena evaọ ẹme nọ a te kẹe oke ofa. Ohwo-agbara na ọ rẹ sae fodẹ eware efa jọ nọ a ru evaọ ẹme na otẹrọnọ i ti fiobọhọ kẹ ọmọ-uwuhrẹ na hayo ogbotu na. Ofariẹ, a sae jẹ kẹ ọmọ-uwuhrẹ na ohrẹ obufihọ no Ibroshọ Uwuhrẹ na hayo obe Isukulu Odibọgba na ze evaọ okenọ ewuhrẹ na ọ tẹ fa no, hayo evaọ oke ofa kpahe oria uwuhrẹ nọ a rrọ kẹe na hayo oria uwuhrẹ ofa jọ.​—Rri  edhe-ẹme avọ 13 gbe  16 kpahe evuẹ efa rọkẹ Ọsẹro Ewuhrẹ Uzuazọ gbe Usi Uwoma Ota na gbe iruo ọkohrẹ obufihọ.

    9. Oke: Ẹme ohwo ọvuọvo, makọ ọrọ ohwo-agbara Ewuhrẹ Uzuazọ gbe Usi Uwoma Ota na ọ rẹ vrẹ oke nọ a fihọ na ha. A rẹ rọ areghẹ da ẹme ọmọ-ewuhrẹ ji nọ oke riẹ u te re no. Otẹrọnọ inievo nọ i bi ru abọ sa-sa ewuhrẹ na a tẹ re oke, ọkohrẹ obufihọ na ọ rẹ kẹ ae ohrẹ nọ ewuhrẹ na ọ tẹ fa no hayo evaọ oke ofa. Oma ewuhrẹ na kpobi, te ile nọ a te so gbe olẹ o rẹ rehọ auwa 1 gbe iminiti 45.

 10. Iweze Ọsẹro Okogho: Otẹrọnọ ọsẹro okogho ọ kpahe ukoko, a re ru ewuhrẹ na wọhọ epanọ o rrọ Obe Ewuhrẹ Uzuazọ gbe Usi Uwoma Ota na, rekọ a rẹ rehọ ẹme iminiti 30 nọ ọsẹro okogho na o ti ru ro nwene Uwuhrẹ Ebaibol Ukoko nọ o rrọ abọ Uzuazọ Oleleikristi na. Taure ọsẹro okogho na o te ti ru ẹme ọsosuọ riẹ, ohwo-agbara Ewuhrẹ Uzuazọ gbe Usi Uwoma Ota na o re ru ọkiẹkpemu ewuhrẹ na jẹ ta kpahe igogo eme oka notha jọ, ru owhowhovia kpobi nọ ukoko na u wo je se ileta nọ e riẹ, kẹsena o ve zizie ọsẹro okogho na. Nọ ọsẹro okogho na o te ku ẹme riẹ họ no, ọ vẹ salọ ole nọ o je rie ro ku ewuhrẹ na họ. A rẹ rọ ẹvẹrẹ nọ ukoko na u bi ro ru ewuhrẹ ru eklase avivẹ evaọ oka ọsẹro okogho ho. O tẹ make rọnọ ọsẹro okogho o weze bru ukoko nọ o be rẹrote utu, utu na u re gbe ru ewuhrẹ obọrai ghele. Rekọ utu na u re kuomagbe ukoko na evaọ etoke ẹme ọsẹro okogho na.

 11. Oka Okokohọ Okogho Hayo ọrọ Ubrotọ: Evaọ oka okokohọ okogho hayo ọrọ ubrotọ, a re ru ewuhrẹ hẹ. Uviuwou kpobi hayo omomọvo o re se eme ewuhrẹ oka yena kẹ omariẹ.

 12. Oka Ekareghẹhọ: Nọ Ekareghẹhọ na o te kie fihọ ẹdẹ jọ evaọ no Ẹdẹvo-Oka rite Edisoi-Oka, a re ru Ewuhrẹ Uzuazọ gbe Usi Uwoma Ota na ha. Rekọ evaọ ẹdẹ ekareghẹhọ na a re ru ewuhrẹ omakugbe kẹ usi uwoma ota na.

  13. Ọsẹro Ewuhrẹ Uzuazọ gbe Usi Uwoma Ota:Ugboma ekpako na o rẹ salọ ọkpako nọ ọ rẹ jọ ọsẹro Ewuhrẹ Uzuazọ gbe Usi Uwoma Ota na. Ọsẹro ewuhrẹ na ọ rẹ ruẹ nọ a riẹ ewuhrẹ na ru ziezi lele ekpọvio nọ a kẹ evaọ obe nana. Ọkpako na avọ ọkohrẹ obufihọ na a rẹ nọ mi ohwohwo ziezi re a riẹ epanọ eware e be nya. Nọ Obe Ewuhrẹ Uzuazọ gbe Usi Uwoma Ota amara o tẹ nwani kpozi no, ọsẹro Ewuhrẹ Uzuazọ gbe Usi Uwoma Ota na ọ vẹ rehọ ẹme emọ-ewuhrẹ na kẹ ai. (Rri  edhe-ẹme avọ 4.) A rẹ rehọ efọmo Ewuhrẹ Uzuazọ Oleleikristi gbe Usi Uwoma Ota Mai (S-89) na kẹ emọ-ewuhrẹ ẹme, o tẹ kawo eka esa taure ẹdẹ nọ a ti ro ru ẹme rai o te ti te.

 14. Ohwo-Agbara Ewuhrẹ Uzuazọ gbe Usi Uwoma Ota: Oka kpobi u re wo ọkpako nọ ọ rẹ jọ ohwo-agbara Ewuhrẹ Uzuazọ gbe Usi Uwoma Ota na. (Otẹrọnọ ekpako nọ e rrọ ukoko na a gbe bu tere he, idibo iruiruo nọ i te ziezi a rẹ sai ru ei.) Ọye họ ọnọ ọ rẹ ruẹrẹ ẹme emuhọ gbe ọrọ ekuhọ ewuhrẹ na họ, yọ ọye o re ru ẹme ividio usi uwoma ota na gbe ọrọ ividio nọ a re ro mu uwuhrẹ ibroshọ Ewuhrẹ na họ. Ọye o re zizie enọ i ti ru ẹme kpobi ziọ eplatfọmo, yọ otẹrọnọ ekpako ukoko na i bu tere he, ọ sae jọ ewuhrẹ na ru ẹme jọ re. Jọ eme nọ ọ rẹ ta evaọ  udevie ẹme ọvuọvo ọ jọ kpẹkpẹe gaga. Ugboma ekpako na ae a re kuomagbe salọ ekpako nọ i te nọ e rẹ sae jọ ohwo-agbara na. Ekpako nọ i te na a re nwene ohwohwo ẹsikpobi. Wọhọ epanọ ẹgwọlọ ukoko na ọ rrọ, Ọsẹro Ewuhrẹ Uzuazọ gbe Usi Uwoma Ota na họ ọnọ ọ rẹ mae jọ ohwo-agbara na vi ekpako efa nọ i te na. Otẹrọnọ ọkpako jọ o te nọ ọ rẹ sai ru Uwuhrẹ Ebaibol Ukoko na, kiyọ o te kẹ ohwo-agbara ewuhrẹ na re. Iviena muẹrohọ nọ ọkpako nọ ọ te jọ ohwo-agbara na, o re jiri emọ-ewuhrẹ nọ i ru ẹme, jẹ rọ edhere oyoyou kẹ ae ohrẹ. Ohwo-agbara na ọ rẹ jẹ ruẹ nọ ewuhrẹ na ọ rọ ẹruoke kuhọ. (Rri  edhe-ẹme avọ 6 gbe  9.) O tẹ were ohwo-agbara na, yọ oria jọ o riẹ, ọ sai fi emaekrofonu ọfa họ eplatfọmo na nọ o re dikihẹ, ọ vẹ jọ etẹe zizie oniọvo nọ o bi ti ru ẹme na, yọ oke yena oniọvo nọ o ti ru ẹme na o dikihẹ oria nọ o bi ti jo ru ẹme na no. Ere ọvona re, ohwo-agbara na ọ sae keria oria nọ a wọ emẹjẹ họ evaọ eplatfọmo na evaọ etoke isase Ebaibol na gbe okenọ a bi ro ru abọ Wo Onaa Ziezi Evaọ Usi Uwoma Ota Na. Onana u re ru nọ a gbẹ rọ raha oke kufiẹ hẹ.

 15. Ọnọ O re Koko Iruẹru Ugboma Ekpako na Họ: Oniọvo nana họ ọnọ ọ rẹ rọ eme kpobi nọ a te jọ ewuhrẹ na ru kẹ inievo na ajokpaọ eme emọ-ewuhrẹ na. Onana u kugbe inievo nọ e te jọ ohwo-agbara ewuhrẹ na koka koka evaọ usu inievo nọ ugboma ekpako na a whobọhọ. Ọnọ o re koko iruẹru ugboma ekpako na họ na avọ ọsẹro Ewuhrẹ Uzuazọ gbe Usi Uwoma Ota na, a re fi omaa nọ a rọ kẹ inievo ẹme fihọ ebọdo evuẹ na.

  16. Ọkohrẹ Obufihọ: Otẹrọnọ o rẹ lọhọ, o rẹ mai woma re a rehọ owha-iruo nana kẹ ọkpako nọ o wo onaa ẹmeọta ziezi. Ọye họ ọnọ ọ rẹ kẹ ekpako gbe idibo iruiruo ohrẹ nọ o tẹ gwọlọ ere. Ọ rẹ sae kẹ ohrẹ nana evaọ ẹme kpobi nọ a ru wọhọ, ẹme nọ a ru evaọ Ewuhrẹ Uzuazọ gbe Usi Uwoma Ota, ovuẹ ogbotu, ewuhrẹ Uwou-Eroro na, isase Uwou-Eroro na, hayo Uwuhrẹ Ebaibol Ukoko na. (Rri  edhe-ẹme avọ 9.) Otẹrọnọ ekpako nọ e riẹ ẹme eru ziezi a dina bu evaọ ukoko na, ọkpako ọfa ọ sae jọ ọkohrẹ obufihọ na evaọ ukpe ofa. Orọnikọ ẹsikpobi ọ rẹ nwane kẹ inievo na ohrẹ evaọ ẹme kpobi nọ a ru hu.

 17. Eklase Avivẹ: Nọ inievo nọ i re ru ẹme ọmọ-ewuhrẹ a te bu, ukoko na o sae jiroro sọ a re wo eklase avivẹ. Eklase avivẹ kpobi o re wo oniọvo nọ o te ziezi nọ ọ rẹ jọ ọkohrẹ, yọ o rẹ mai woma re oniọvo nana ọ jọ ọkpako ukoko. Rekọ nọ ọkpako otiọye ọ gbẹ riẹ hẹ, odibo oruiruo nọ o te ziezi ọ rẹ sai ru ei re. Ugboma ekpako na o rẹ salọ oniọvo nọ ọ te rẹrote owha-iruo nana, yọ ae a rẹ jiroro sọ a te hai nwene ohwo na n’oke t’oke. Ọkohrẹ na o re lele ekpọvio nọ e rrọ  edhe-ẹme avọ 8 na. Otẹrọnọ a ti wo eklase avivẹ na, nọ a te ku ẹme Romatotọ Kiẹ Eware Aghae Via họ no, a vẹ vuẹ enọ i bi ru eklase avivẹ na nọ a kpohọ obọ eklase rai. A rẹ wariẹ kuomagbe inievo na evaọ abọ Wo Onaa Ziezi Evaọ Usi Uwoma Ota Na. O tẹ lọhọ, nọ a te bi dhesẹ jẹ ta kpahe ividio, ahwo nọ a rrọ eklase avivẹ na a re rri hayo gaviezọ kẹ ividio na no obọ eklase avivẹ na ze. Orọnọ a gbẹ sai ru ere he, ọnọ ọ be rẹrote eklase avivẹ na ọ sae rọ ifonu hayo etablẹte riẹ kporo ividio na kẹ inievo na, kẹsena a vẹ kpahe fihọ iẹe.

 18. Ividio: A te hai dhesẹ ividio sa-sa evaọ ewuhrẹ na. Ividio nọ a ti ro ru ewuhrẹ udevie oka e te jọ JW Library nọ a rẹ sae rehọ ifonu gbe etablẹte kporo. Evaọ ẹsejọ, a sai dhesẹ ividio oriruo usi uwoma ota na evaọ omakugbe kẹ usi uwoma ota nọ a te dhesẹ ividio na no evaọ ewuhrẹ.