Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ewuhrẹ Uzuazọ Oleleikristi gbe Usiuwoma Ota Mai  |  Azeza 2017

 UZUAZỌ OLELEIKRISTI

Lele Izi Ọghẹnẹ Evaọ Eware Kpobi

Lele Izi Ọghẹnẹ Evaọ Eware Kpobi

Jihova Ọghẹnẹ ọ kẹ ahwo-akpọ izi nọ e rẹ kpọ ai evaọ uzuazọ. Wọhọ oriruo, ọ ta nọ ọzae-avọ-aye a rẹ jọ kugbe ohwohwo bẹdẹ bẹdẹ. (Mt 19:​4-6, 9) O mukpahe oghẹrẹ ọfariẹ-ogbe kpobi. (1Kọ 6:​9, 10) Ọ tubẹ kẹ ahwo riẹ ekpọvio kpahe ẹgọ gbe osẹ nọ o rẹ hẹriẹ ai no orọ akpọ na.​—Izi 22:5; 1Ti 2:​9, 10..

Evaọ akpọ na, ahwo buobu nẹnẹ a be siọ ekpọvio Ọghẹnẹ. (Rom 1:​18-32) A be kuvẹ re eriwo ahwo-akpọ ọ kpọ ẹgọ gbe osẹ, gbe uruemu rai. Ahwo buobu nẹnẹ a be rọ ekpehre iruemu rai ro seha, a vẹ jẹ poviẹ enọ i bi koko izi Ebaibol.​—1Pi 4:​3, 4.

O gwọlọ nọ mai Isẹri Jihova ma re koko izi Ọghẹnẹ eva eware kpobi. (Rom 12:9) Evaọ oghẹrẹ vẹ? Ma rẹ rọ areghẹ dhesẹ oware nọ o rẹ were Ọghẹnẹ via. Ma rẹ jẹ daoma se izi Ọghẹnẹ gboja evaọ uzuazọ mai. Wọhọ oriruo, nọ ma tẹ be salọ oghẹrẹ iwu nọ ma re kuhọ, ma sae nọ oma mai nọ: ‘Kọ nọ oghẹrẹ ewu nọ ahwo Ọghẹnẹ a rẹ wha manikọ ahwo akpọ na? Kọ ẹgọ gbe osẹ mẹ o bi gine dhesẹ omẹ fihọ ohwo nọ ọ be dhozọ Ọghẹnẹ?’ Hayo nọ ma tẹ be salọ oghẹrẹ ighe etẹlẹvisiọno gbe ifimu nọ ma re riwi, ma rẹ sae nọ oma mai nọ: ‘Kọ ighe nana e te were Jihova? Eriwo ono ifimu nana ọ be wha haro? Kọ oghẹrẹ ighe nọ mẹ te salọ e te lẹliẹ ekpehre eware daruọ omẹ oma ẹmẹrera? (Ol 101:3) Kọ o ti ru ahwo uviuwou mẹ gbe amọfa zoruẹ?’​—1Kọ 10:​31-33.

Fikieme u ro wuzou re ma lele izi Jihova? Kẹle na, Jesu Kristi ọ te raha erẹwho na gbe eyoma kpobi no. (Iz 9:​4-7) Ahwo nọ a bi ru oreva Ọghẹnẹ ọvo a ti kiọkọ. (1Jọ 2:​15-17) Fikiere, joma hai lele izi Ọghẹnẹ evaọ eware kpobi re ahwo a jẹ ruẹ uruemu uwoma mai, a vẹ rọ oruaro kẹ Ọghẹnẹ.​—1Pi 2:​11, 12.

Ẹvẹ ẹgọ gbe osẹ mẹ ọ be ta kpahe oghẹrẹ nọ me rri izi Ọghẹnẹ?

WHA RRI IVIDIO JỌ OGBẸNYUSU JIHOVA​—ỌZAE ỌVO, AYE ỌVO, KẸSENA WHA KIYO ENỌ NANA:

  • Fikieme u ro woma re ma lele izi Jihova evaọ uzuazọ mai?

  • Fikieme u je fo re esẹgbini a wuhrẹ emọ rai re a lele izi Jihova nọ a gbẹ rọ emaha na?

  • Ẹvẹ te emaha te ekpako a sai ro fiobọhọ kẹ amọfa wo erere no emamọ eware nọ Ọghẹnẹ ọ kẹ omai?