Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ewuhrẹ Uzuazọ Oleleikristi gbe Usiuwoma Ota Mai  |  Azeza 2017

 UZUAZỌ OLELEIKRISTI

Wo Evawere Evaọ Usiuwoma Ota

Wo Evawere Evaọ Usiuwoma Ota

Kọ usiuwoma o be hae bẹ owhẹ ẹta? Ibuobu mai a re yo Ee kẹ onọ yena. Fikieme? Ẹsejọhọ fikinọ ahwo a be gaviezọ họ hayo ozọ nọ ma rẹ rọ ta ẹme kẹ ahwo u bi mu omai. Uzẹme riẹ họ, eware nana e rẹ sae lẹliẹ oma lọhọ ohwo. Ghele na, Ọghẹnẹ nọ ma be gọ na yọ Ọghẹnẹ evawere nọ ọ gwọlọ nọ ma rọ evawere gọe. (Ol 100:2; 1Ti 1:11) Eware esa vẹ e rẹ lẹliẹ omai rọ evawere ta usiuwoma na?

Orọ ọsosuọ, ma bi whowho ovuẹ nọ o rẹ kẹ ẹruore. Dede nọ ẹruore ọ gbẹ rọ akpọ na nẹnẹ hẹ, ma sae “rehọ emamọ usi uwoma” se ahwo. (Aiz 52:7) Usiuwoma Uvie Ọghẹnẹ na o rẹ jẹ lẹliẹ evawere vọ udu mai. Taure who te ti kpohọ usiuwoma, roro kpahe eghale nọ Uvie Ọghẹnẹ o te wha ze otọakpọ na.

Orọ avivẹ, usiuwoma nọ ma be ta na u re ru uzuazọ ahwo woma je fiobọhọ kẹ ai si kẹle Ọghẹnẹ. O rẹ lẹliẹ ae siobọno ekpehre uruemu je fiobọhọ kẹ ai wo uzuazọ ebẹdẹ bẹdẹ. (Aiz 48:​17, 18; Rom 1:16) Kọ whọ be ruẹ omara evaọ usu ahwo nọ a bi si ahwo no akpọ Setan ze ti wo uzuazọ na? Dede nọ ahwo jọ a gwọlọ nọ a siwi ai hi, ma rẹ gbẹ nya bru enọ e gwọlọ ghele.​—Mt 10:​11-14.

Orọ avesa na o mai wuzou kpobi. Usiuwoma mai o be wha orro se Jihova. O rri iruo usiuwoma na ghaghae. (Aiz 43:10; Hib 6:10) U te no ere no, ọ tẹ be jẹ kẹ omai ẹzi ofuafo riẹ re u fiobọhọ kẹ omai ru iruo na. Fikiere, lẹ se Jihova re o fiobọhọ kẹ owhẹ wo oghọghọ nọ o rrọ abọjọ ubi ẹzi na. (Gal 5:22) O ti fiobọhọ kẹ omai fi awaọruọ mai kparobọ je wo udu nọ ma rẹ rọ ta usiuwoma. (Iru 4:31) Fikiere nọ ẹkwotọ mai ọ tẹ make rrọ oghẹrẹ jọ dede, ma ti wo evawere evaọ iruo usiuwoma ota na.​—Iz 3:3.

Ẹvẹ whọ gwọlọ nọ oma o rẹ jọ owhẹ nọ whọ tẹ rrọ usiuwoma? Ẹvẹ whọ sai ro dhesẹ oghọghọ na via?

WHA RRI IVIDIO NA WARIẸ WO EVAWERE NO EWUHRẸ GBE ERORO DIDI ZE, KẸSENA WHA VẸ KẸ IYO ENỌ NANA:

  • Fikieme u ro woma re ma se ewuhrẹ omobọ mai gboja ziezi o tẹ make rọnọ ma rẹ rọ euwa buobu ta usiuwoma kamara kamara?

  • Ẹvẹ ma sae rọ rehọ aro kele Meri?

  • Oke vẹ who fihọ nọ who re ro roro kpahe Ẹme Ọghẹnẹ?

  • Eme ọ rẹ kẹ owhẹ evawere nọ whọ tẹ be ta usiuwoma?