Muhọ no enukpe nana vrẹ, ma ti wo oke vi epaọ anwẹdẹ nọ ma te rọ ruẹrẹ oma kpahe kẹ Ekareghẹhọ uwhu Jesu Kristi. Nọ ẹdẹ Ekareghẹhọ na o te kie fihọ ẹdẹ jọ evaọ no Ẹdẹvo-Oka rite Edisoi-Oka, a ti ru ewuhrẹ udevie oka na ha. Nọ ekareghẹhọ na o te kie fihọ Ẹdẹ-Ọmaha hayo Ẹdoka, a ti ru ewuhrẹ Ẹdoka ha evaọ oka yena. Kọ eme whọ te rehọ oke yena kpobi ru? Wọhọ epanọ o jọ evaọ ikpe-udhusoi ọsosuọ, o gwọlọ nọ a rẹ ruẹrẹ eware kpahe kẹ obọdẹ ehaa nana. (Luk 22:7-13; km 3/15 1) Rekọ eware efa buobu e riẹ nọ ma re ru rọ ruẹrẹ oma kpahe kẹ Ekareghẹhọ na. Eme họ eware jọ nọ ma re ru?

Inievo jọ a re se je roro didi kpahe isase Ebaibol Ekareghẹhọ nọ e rẹ jọ Ẹkiẹriwo Ikereakere na Kẹdẹ Kẹdẹ. Amọfa a re se eria Ebaibol nọ e rrọ ẹkpẹti nọ ọ rrọ obotọ na. Yọ inievo efa a re se izoẹme Uwou-Eroro nọ e ta kpahe Ekareghẹhọ na gbe uyoyou nọ Jihova avọ Jesu a dhesẹ kẹ omai. Oware kpobi nọ whọ te salọ se evaọ oke yena, jọ u si owhẹ kẹle Jihova avọ Ọmọ riẹ viere.