Kpohọ eme nọ e riẹ eva

Kpohọ oria eware nọ e riẹe eva

Eklase Giliad evaọ ukpe 2017

OWARE NỌ A BE RỌ OKẸ UNEVAZE RA RU

Isukulu Giliad U bi Fiobọhọ kẹ Isẹri Jihova nọ E Rrọ Akpọ na Soso

Isukulu Giliad U bi Fiobọhọ kẹ Isẹri Jihova nọ E Rrọ Akpọ na Soso

AKPEGBIVẸ 1, 2020

 Kukpe kukpe a re zizie inievo mai buobu nọ e rrọ iruo odibọgba oke-kpobi ọrọ obọdẹ evaọ eria sa-sa akpọ na ziọ isukulu Giliad. A re ru isukulu nana evaọ Watchtower Educational Center evaọ obọ Patterson, New York. a A rẹ jọ isukulu nana wuhrẹ inievo na epanọ a re ru iruo nọ a kẹ rai ziezi evaọ ukoko Jihova. A rẹ jẹ jọ isukulu nana wuhrẹ inievo na epanọ a sai ro fiobọhọ kẹ inievo nọ e rrọ ikoko sa-sa gbe enọ e rrọ iwou ogha nọ a bi jo ru iruo.

 Ma sae ta nọ isukulu Giliad yọ isukulu akpọ-soso, keme inievo nọ e rẹ ziọ isukulu na erẹwho sa-sa evaọ akpọ na a no ze. Wọhọ oriruo, eklase avọ 147 nọ a ru evaọ 2019, inievo nọ e ziọ isukulu na a bu te 56, yọ erẹwho 29 a no ze. Inievo nọ e rrọ iruo odibọgba oke-kpobi ọrọ obọdẹ no vẹre, ae a rẹ ziọ isukulu nana. Ejọ i bi ru iruo evaọ Ebẹtẹle, ejọ esẹro okogho, efa imishọnare hayo ekobaro obọdẹ.

 U wo eware buobu nọ a rẹ ruẹrẹ kpahe oke lelehie taure isukulu na o te ti muhọ. Wọhọ oriruo, inievo nọ e rẹ ma omaa erẹ nọ u wobọ kugbe iruo ukoko na (WHQ Travel) a rẹ dẹ itikẹte nọ inievo nọ e be ziọ isukulu na a rẹ rọ ruọ arupre ze. Evaọ eklase avọ 147, a tẹ ghale ugho nọ emọ isukulu na nọ i no erẹwho efa ze a rọ fa ziọ Patterson jẹ fa kpo, ofa omomọvo u bu vi ₦400,000 ($1,075). Inievo nọ i no Solomon Islands ziọ isukulu na, isiane soso a ruọ arupre taure a te ti te Patterson, yọ a je kpo, isiasa a ruọ arupre. Te ẹnyaze te ekpo, u thabọ te ikilomita 35,400 (emaele 22,000)! Unuigho nọ a hwa fihọ erẹ rai omomọvo u bu vi ₦870,000 ($2,300). Re inievo nọ i bi ru iruo evaọ WHQ Travel a sae ruẹ itikẹte arupre nọ ugho rai u kpotọ omojọ, a rẹ jọ itanẹte gwọlọ enọ e dina ku. A tẹ make dẹ itikẹte no, a rẹ gbẹ jọ itanẹte gwọlọ eka buobu, ẹsejọ dede emerae buobu, sọ a te ruẹ enọ a si ugho no. Inievo nọ e rrọ eria sa-sa nọ i wo itikẹte ọvọvẹ a sae jẹ rehọ ae ru unevaze, re WHQ Travel o ku ai gbe rọ dẹ itikẹte kẹ inievo nọ e be ziọ isukulu na.

 Inievo buobu nọ e be ziọ isukulu nana evaọ obọ United States a wo ivisa ha. Fikiere, Ẹko-Iruo Eriẹ-Izi nọ o rrọ obọ ehri ukoko u re fiobọhọ kẹ inievo na wo ivisa nọ egọmeti America ọ rẹ kẹ emọ isukulu. Ugho nọ a re ro ru ivisa kẹ omomọvo je fi odẹ họ otọ u bu vi ₦190,000 ($510).

 Erere vẹ mai kpobi ma bi wo no isukulu nana ze? U wo oniọvo jọ nọ a re se Hendra Gunawan nọ ọ rrọ ọkpako ukoko evaọ obọ Asia. A vi oniọvo jọ avọ aye riẹ nọ a nwrotọ no isukulu Giliad no ziọ ukoko riẹ. Brọda Gunawan ọ ta nọ: “Vẹre vẹre, ma jọ ukoko mai wo ọkobaro oke-kpobi ọvuọvo ho. Rekọ nọ inievo nana nọ i nwrotọ no isukulu Giliad na a nyaze, ajọwha nọ a wo gbe ẹzi obufihọ rai u fiobọhọ kẹ omai ahwo buobu evaọ ukoko na, inievo jọ dede a mu ọkobaro họ. Uwhremu na, oniọvo-ọmọtẹ jọ evaọ ukoko mai o tube kpohọ Isukulu Rọkẹ Etausiuwoma Uvie Na. U woma kẹhẹ!”

 U wo oniọvo ọfa nọ a re se Sergio Panjaitan nọ o bi ru iruo evaọ uwou ogha jọ evaọ obọ Asia. Inievo nọ i nwrotọ no isukulu Giliad no a rrọ uwou ogha na re. Brọda Panjaitan ọ ta nọ: “Orọnikọ inievo nana ọvo isukulu Giliad u fiobọhọ kẹ hẹ, u fiobọhọ kẹ omai kpobi. Eware nọ a wuhrẹ evaọ isukulu na i bu wo umuo ho! Ghele na, a be wọ oma kpehru hu, rekọ a bi wuhrẹ omai eware nọ a wuhrẹ i rai evaọ isukulu na. Nọ a bi fiobọhọ kẹ omai na, yọ ma bi fiobọhọ kẹ amọfa re. Ere ere eware i bi ro woma vrẹ.”

 Ẹvẹ ukoko na u bi ro wo ugho nọ a bi ro ru eware isukulu na kpobi? Okẹ unevaze rọkẹ iruo akpọ-soso na a bi ro ru onana. Ahwo buobu a be rehọ idhere sa-sa nọ a ta kpahe evaọ donate.jw.org kẹ okẹ. Ma yere owhai kpobi kẹ ọghoruo rai nọ a be sai ro ru isukulu nana nọ u bi fiobọhọ kẹ Isẹri Jihova nọ e rrọ akpọ-soso na.

a Inievo nọ i bi ru iruo evaọ Ẹko-Iruo Isukulu Ukoko Na ae a rẹ ma omaa eware nọ a re wuhrẹ evaọ isukulu nana. Yọ Ogbẹgwae Ewuhrẹ orọ Utu Ẹruorote Iruẹru Isẹri Jihova ae a rẹ vuẹ ae oghẹrẹ nọ a re ru onana. Inievo nọ e rrọ Ẹko-Iruo Isukulu Ukoko Na ae a re wuhrẹ inievo nọ e rrọ isukulu Giliad na. A re je zizie inievo nọ e rrọ Utu Ẹruorote na gbe inievo efa ze ti wuhrẹ emọ isukulu na re.