Kpohọ eme nọ e riẹ eva

Kpohọ oria eware nọ e riẹe eva

Eware nọ A kare Fihọ Ugbẹhẹ Evaọ Ijipti I Dhesẹ nọ Iku Ebaibol Uzẹme

Eware nọ A kare Fihọ Ugbẹhẹ Evaọ Ijipti I Dhesẹ nọ Iku Ebaibol Uzẹme

 Who te te oria nọ a rẹ rọ ruọ etẹmpol anwae ahwo Ijipti nọ a bọ kẹ ọghẹnẹ rai nọ a re se Amun evaọ Karnak, whọ rẹ ruẹ ugbẹhẹ nọ u kpehru te irula udhegbezeza nọ a kare iwoho eware sasa fihọ. Iwoho nana i bi dhesẹ oghẹrẹ nọ ahwo Ijipti a jẹ hai kere eme rai evaọ oke anwae. Ahwo nọ a wuhrẹ kokodo kpahe eware nana a ta nọ iwoho nana e be ta kpahe oke nọ Fẹro nọ a re se Shaeshak o ro fi ekwotọ sa-sa nọ e rrọ obọze ẹkpẹlobọ ovatha-ọre Ijipti kparobọ. Juda avọ uvie Izrẹl nọ o jọ ẹkpẹlobọ ovatha-ọre e jọ usu rai.

Eware nọ a kare fihọ ugbẹhẹ evaọ Karnak; onọ a si usi wariẹ họ na u bi dhesẹ ahwo nọ a mu

 A jọ uwoho na dhesẹ ọghẹnẹ nọ a je se Amun nọ ọ be rehọ ahwo udhuhrẹ-gbikpe (150) nọ a mu rọkẹ Shaeshak nọ a re je se Sheshonk. a Omomọvo ahwo nana nọ a mu na o dikihẹ kẹ ẹwho kpobi nọ a fi kparobọ. A kare odẹ ẹwho ahwo nana fihọ iwoho rai omomọvo. Edẹ ewho nana buobu i gbe mu ziezi, yọ a rẹ jọ Ebaibol ruẹ ejọ rai. Ejọ họ, Bẹt-shian, Gibiọn, Mẹgido, gbe Shunẹm.

 A jọ Ebaibol na ta kpahe ẹmo nọ ahwo Ijipti a wọ ruọ Juda. (1 Ivie 14:25, 26) Ebaibol na ọ tubẹ ta eware buobu kpahe oghẹrẹ nọ Shaeshak ọ rọ vẹruọ Juda. O ta nọ: “Evaọ ukpe avọ isoi Rehoboam ovie na, Shaeshak ovie Ijipti ọ tẹ wọ ohọre ziọ Jerusalẹm. . . . O wo ekẹkẹ odu ọvo gbe egba ivẹ (1,200), edhẹ-enyenya idu udhosa (60,000), gbe egbaẹmo buobu nọ i wo unu hu nọ i lele i rie no obọ Ijipti ze. . . . O fi ikpewho Juda nọ a di ogba wariẹ họ kparobọ, ukuhọ riẹ o te te Jerusalẹm.”—2 Iruẹru-Ivie 12:2-4.

 Orọnikọ eware nọ a kare fihọ ugbẹhẹ evaọ Karnak na ọvo họ eware nọ a kiẹ via nọ i dhesẹ nọ Shaeshak ọ wọ ẹmo ruọ ẹkwotọ Izrẹl he. A jọ ẹwẹ-utho jọ nọ a tọ ku evaọ Mẹgido nọ a fodẹ evaọ Ebaibol na ruẹ odẹ na “Sheshonk.”

 Oghẹrẹ nọ Shaeshak o ro fi Juda kparobọ nọ a jọ Ebaibol na ta kpahe gbagba na yọ oware jọ nọ u dhesẹ nọ ahwo nọ a kere Ebaibol na a kere iku uzẹme. Orọnikọ epanọ orẹwho rai u ro fi amọfa kparobọ ọvo a kere he, a tube kere kpahe erẹwho nọ i fi orẹwho rai kparobọ. Nọ ahwo buobu evaọ oke anwae a te bi kere iku orẹwho rai, a re kere kpahe abọ nọ a jọ fi ai kparobọ họ.

a Oghẹrẹ nọ a kere “Shaeshak” evaọ Ebaibol na, ere a rẹ rọ ẹvẹrẹ Hibru se odẹ na.