Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Uwou-Eroro Na  |  Asoi 2015

 Ẹmeọta Kugbe Omọfa Kpahe Ebaibol

Fikieme Ma re ro Ru Ekareghẹhọ Uwhu Jesu?

Fikieme Ma re ro Ru Ekareghẹhọ Uwhu Jesu?

Eme nọ e rrọ obotọ na yọ eme nọ o sae jọnọ Osẹri Jihova jọ o lele ohwo jọ ta kpahe Ebaibol na. Ma rehọ iẹe nọ Osẹri Jihova jọ nọ a re se Megan ọ nyaze uwou aye nọ a re se Shirley te ta usiuwoma kẹe.

“WHA HAI RU ONANA RỌ KAREGHẸHỌ OMẸ”

Megan: Ẹvẹ obonẹ, Shirley? Eva e were omẹ gaga nọ mẹ rọ ruẹ owhẹ evaọ Ekareghẹhọ uwhu Jesu nọ ma ru evaọ oka nukpo. * Ẹvẹ who rri Ekareghẹhọ nọ ma ru na?

Shirley: Eva e were omẹ nọ mẹ nya, rekọ me wo otoriẹ eware kpobi nọ a ta ha. Mẹ riẹ nọ ahwo a rẹ kareghẹhọ ẹdẹ-eyẹ Jesu nọ a be hai se Kresimesi, gbe ẹdẹ nọ ọ rọ kparoma nọ a be hai se Isita, rekọ me ri yo nọ ohwo jọ o bi ru Ekareghẹhọ uwhu Jesu hu.

Megan: Ginọ uzẹme, Kresimesi avọ Isita yọ ehaa nọ a be hae jọ akpọ na soso ru. Rekọ Isẹri Jihova a ruẹ nọ u wuzou gaga re a ru Ekareghẹhọ uwhu Jesu. Otẹrọnọ who wo umuvẹ jọ, mẹ sae vuẹ owhẹ kpahe epanọ u ro wuzou tere.

Shirley: Ee, umuvẹ jọ o riẹ.

Megan: Uzẹme riẹ họ, Isẹri Jihova a be hai ru Ekareghẹhọ uwhu Jesu keme ọ ta kẹ ilele riẹ nọ a ru ere. Muẹrohọ oware nọ o via evaọ aso taure Jesu o te ti whu. Kọ whọ sae kareghẹhọ emu obọdẹ jọ nọ ọ re kugbe ilele riẹ?

Shirley: Emu Owọwọ na whọ be ta na?

Megan: Ọye dẹẹ. A re je sei Emu Owọwọ Olori na re. Nọ a jẹ re emu na, Jesu ọ tẹ vuẹ ilele riẹ oware nọ ọ gwọlọ nọ a hai ru. Joma rovie kpohọ obe Luk 22:19 re ma se eme nọ ọ ta na, iviena sei ze.

Shirley: U woma. “Ofariẹ, ọ tẹ rehọ ebrẹdi, ọ tẹ lẹ yere Ọghẹnẹ, o te bru rie, ọ tẹ rehọ iẹe kẹ ae, inọ: ‘Onana u dikihẹ kẹ ugboma mẹ, onọ me ti siobọno fiki rai. Wha hai ru onana rọ kareghẹhọ omẹ.’”

Megan: Whẹ kobiruo. Muẹrohọ oware nọ Jesu ọ vuẹ rai nọ a ru evaọ abọ urere owọ ikere nọ ma se na, inọ: “Wha hai ru onana rọ kareghẹhọ omẹ.” Taure Jesu ọ tẹ te ta ẹme ọnana kẹ ae, ọ vuẹ rai oware nọ a te kareghẹhọ kpahe iẹe. Ọ ta nọ o ti whu fiki ilele riẹ. Jesu ọ ta ọkpọ ẹme nana no vẹre evaọ obe Matiu 20:28. Etẹe na ọ ta nọ: “Ọmọ ohwo ọ nyaze, orọnikọ re a gbodibo kẹe he, rekọ re ọ gbodibo o ve je siobọno uzuazọ riẹ rọkẹ ẹtanigbo ọrọ ahwo buobu.” Re a tae kpẹkpẹe, oware nọ o soriẹ nọ Isẹri Jihova a bi ro kokohọ ru Ekareghẹhọ uwhu Jesu kukpe kukpe họ, re a kareghẹhọ ẹtanigbo na. Ahwo kpobi nọ a yoẹme a rẹ sai wo uzuazọ fiki uwhu riẹ.

FIKIEME MA RỌ GWỌLỌ ẸTANIGBO?

Shirley: Me yo no nọ ahwo a ta nọ Jesu o whu re ma sai wo uzuazọ. Rekọ re a ta uzẹme, mẹ riẹ oghẹrẹ nọ oyena o sae rọ lọhọ họ.

Megan: Whẹ ọvo o rrọ ere kẹ hẹ, Shirley. Ẹme ẹtanigbo Jesu na yọ ẹme nọ ahwo a rẹ kaki wo otoriẹ riẹ hẹ. O make rrọ ere na, oyena yọ ugogo  uzẹme jọ nọ u wuzou gaga evaọ Ebaibol na. Hẹrẹ tao, who gbe wo umuvẹ re ma gbẹ ta ẹme na haro?

Shirley: Ee, umuvẹ o gbẹ riẹ.

Megan: U woma. O re nwani kri nọ me ro se kpahe ẹtanigbo na ha, yọ mẹ te daoma rọ edhere ọlọlọhọ ru ei vẹ kẹ owhẹ.

Shirley: O te were omẹ ere.

Megan: Re ma sai wo otoriẹ ẹtanigbo na ziezi, ma rẹ kaki wo otoriẹ oware nọ Adamu avọ Ivi a wha ze evaọ okenọ a raha uzi evaọ ọgbọ Idẹn. Re ma sae riẹ epanọ oware na o gbẹdẹ te, joma se obe Ahwo Rom 6:23. Iviena fiobọhọ sei ze.

Shirley: U woma. O ta nọ: “Uwhu họ osohwa uzioraha, rekọ okẹ nọ Ọghẹnẹ ọ rẹ kẹ họ uzuazọ ebẹdẹ bẹdẹ ẹkwoma Kristi Jesu Olori mai.”

Megan: Whẹ kobiruo. Joma romatotọ kiẹ ẹme na rri. Orọ ọsosuọ, muẹrohọ oghẹrẹ nọ oria ikere yena u ro muhọ: “Uwhu họ osohwa uzioraha.” No anwọ emuhọ ze, osohwa nọ Ọghẹnẹ ọ ta nọ u re no uzioraha ze họ uwhu. Rekọ ohwo ọvo ọ jọ ọrahauzi hi evaọ emuhọ. Ọghẹnẹ ọ ma Adamu avọ Ivi gbagba, yọ a hai ti yẹ emọ nọ e rrọ gbagba re. Fikiere oware ovo o hae wha uwhu ze he. Adamu avọ Ivi gbe emọ rai kpobi a hae rria bẹdẹ bẹdẹ avọ evawere. Rekọ eware e gbẹ nya ere he, manikọ ere he?

Shirley: Ere. Adamu avọ Ivi a re ubi ure nọ Ọghẹnẹ ọ ta kẹ ae nọ a re he na.

Megan: Ginọ ere. A tẹ rọ enẹ salọ nọ a rẹ ghẹmeeyo kẹ Ọghẹnẹ, a tẹ raha uzi. Koyehọ a salọ nọ a rẹ jọ erahaizi nọ e gba ha. Onana o tẹ wha okpẹtu se ai gbe emọ rai kpobi.

Shirley: Ẹvẹ u ro te emọ rai?

Megan: Mẹ kẹ owhẹ oriruo jọ. Mẹ nọ owhẹ onọ jọ, kọ who re there ebrẹdi hayo ikeki?

Shirley: Ẹhẹ! Me re there gaga.

Megan: Ma rehọ iẹe nọ who wo omodhe ọkpokpọ nọ a re ro there ebrẹdi. Rekọ re whọ tẹ te rehọ iẹe there ebrẹdi evaọ orọ ọsosuọ, ọ tẹ va owhẹ abọ kie, oria jọ riẹ o tẹ nwẹhẹ. Kọ eme ọ rẹ via kẹ ebrẹdi kpobi nọ whọ rehọ omodhe na there? Kọ a gbẹ jọ oma ebrẹdi na kpobi ruẹ oka oria omodhe na nọ ọ nwẹhẹ na?

Shirley: Ẹhẹ, a rẹ ruẹ e riẹ.

Megan: Epọvo na re, nọ Adamu avọ Ivi a salọ nọ a rẹ ghẹmeeyo kẹ Ọghẹnẹ, “oka” uzioraha gbe sebaẹgba o tẹ ruọ ae oma. Yọ fikinọ a raha uzi no taure a te ti yẹ emọ, emọ rai kpobi a re wo “oka” ovona re. Otọ uzioraha a re yẹ emọ rai kpobi fihọ. Evaọ Ebaibol na, orọnikọ a rehọ ẹme na “uzioraha” dhesẹ oware uyoma nọ ohwo o ru ọvo ho, rekọ oware nọ ma reuku riẹ re. Dede nọ mai họ ahwo nọ a raha uzi na ha, yọ evaọ okenọ a raha uzi na yọ a ri yẹ omai hi, Adamu avọ Ivi a zẹ omai emọ rai gbe emọ nọ ma ti yẹ kpobi fihọ igbo uzioraha gbe sebaẹgba nọ u re su kpohọ uwhu. Wọhọ epanọ ma se evaọ obe Ahwo Rom 6:23 na, osohwa uzioraha họ uwhu.

Shirley: Rekọ oware oyena u woma ha. Fikieme ahwo-akpọ kpobi a rẹ rọ ruẹ uye bẹdẹ bẹdẹ fiki uzi nọ Adamu avọ Ivi a raha?

Megan: Whọ ta gba, u gine woma ha. Rekọ o nwane rrọ epanọ who bi roro iei na ha. Ọghẹnẹ nọ ẹdhoguo riẹ o kiẹrẹe na, o bruoziẹ uwhu kpe Adamu avọ Ivi fiki uzioraha rai, rekọ ọ tẹ kẹ omai emọ rai ẹruore. Ọghẹnẹ ọ tẹ gbẹ edhere kẹ omai nọ ma re ro no igbo nana. Fikioye Jesu o ro whu kẹ omai na. Ma wariẹ rri obe Ahwo Rom 6:23 nọ ma se ẹsiẹe na. Nọ abọ ọsosuọ na ọ ta nọ “uwhu họ osohwa uzioraha” no, abọ avọ ivẹ riẹ ọ tẹ ta nọ, “rekọ okẹ nọ Ọghẹnẹ ọ rẹ kẹ họ uzuazọ ebẹdẹ bẹdẹ ẹkwoma Kristi Jesu Olori mai.” Fikiere ẹkwoma uwhu Jesu ma ti ro no igbo uzioraha gbe uwhu. *

 ẸTANIGBO NA HỌ OKẸ ỌGHẸNẸ NỌ O MAE RRO

Megan: U wo oware jọ evaọ oria ikere nana nọ mẹ gwọlọ nọ who gbe muẹrohọ.

Shirley: Eme ọye?

Megan: Muẹrohọ nọ oria na o ta nọ: “Okẹ nọ Ọghẹnẹ ọ rẹ kẹ họ uzuazọ ebẹdẹ bẹdẹ ẹkwoma Kristi Jesu Olori mai.” Nọ orọnọ Jesu họ ọnọ ọ reoja je whu kẹ omai na, fikieme oria ikere na o rọ ta nọ ẹtanigbo na yọ “okẹ nọ Ọghẹnẹ ọ rẹ kẹ”? Kọ ẹvẹ o gbẹ ta nọ, “okẹ nọ Jesu ọ rẹ kẹ” hẹ? *

Shirley: Mẹ nwane riẹ hẹ.

Megan: Ọghẹnẹ họ ọnọ ọ ma Adamu avọ Ivi, yọ uzi riẹ a thọ nọ a ghẹmeeyo evaọ ọgbọ Idẹn. Ma riẹ nọ o kẹ riẹ uye gaga evaọ okenọ emọ ọsosuọ riẹ nọ ọ ma fihọ akpọ a raha uzi na. Rekọ Jihova ọ tẹ nwane ru ọruẹrẹfihotọ re eware e kpọvi. * Ọ tẹ ma omaa re omama ẹzi jọ u no obọ odhiwu ze obọ otọakpọ obonẹ wọhọ ohwo ọgbagba re ọ rọ uzuazọ riẹ ta ahwo no igbo. Fikiere ẹtanigbo na yọ okẹ nọ Ọghẹnẹ ọ kẹ omai. U wo oware ofa nọ o soriẹ nọ ma rọ ta nọ ẹtanigbo na yọ okẹ nọ Ọghẹnẹ ọ kẹ omai. Kọ whọ sai roro kpahe epanọ o jọ Ọghẹnẹ oma evaọ okenọ a kpe Jesu?

Shirley: Ijo, me ri roro kpahe iẹe he.

Megan: Nọ mẹ ruọ uwou na, mẹ ruẹ emọ ibebi jọ, o wọhọ nọ who wo emọ.

Shirley: Ee, me wo emọ ivẹ, ọmọtẹ gbe ọmọzae.

Megan: Nọ whọ rrọ ọyewọ na, dai roro epanọ o jọ Jihova oma eva ẹdẹ nọ a ro kpe Jesu na. Ẹvẹ who roro nọ o jariẹ oma nọ o rri no obọ odhiwu ze jẹ ruẹ ọmọ riẹ nọ a mu, bi sei ẹkoko, yọ a be rọ abọ fae ovao? Kọ ẹvẹ who roro nọ o jọ Ọsẹ na oma nọ ọ ruẹ ọmọ riẹ nọ a rọ ibubẹ tehe fihọ ure, ọ tẹ rọ ere whu uwhu oja?

Shirley: O rẹ ginẹ kẹe uye gaga. Me ri roro kpahe iẹe ere vẹre he.

Megan: Uzẹme riẹ họ, ma sae ta epanọ o da Ọghẹnẹ te evaọ ẹdẹ yena ha. Rekọ ma riẹ nọ oware o rẹ da Ọghẹnẹ, ma tẹ jẹ riẹ oware nọ o soriẹ nọ ọ rọ kuvẹ re a kpe Jesu. Ebaibol ọ fodẹ oware na vevẹ kẹ omai evaọ obe Jọn 3:16. Iviena fiobọhọ sei ze.

Shirley: U woma. O ta nọ: “Ọghẹnẹ o you akpọ na gaga o te siobọno Ọmọ ọvo riẹ, re ohwo kpobi nọ o fi ẹrọwọ họ iẹe o gbe whu hu rekọ o ve wo uzuazọ ebẹdẹ bẹdẹ.”

Idhe ẹtanigbo na họ uyoyou nọ o mae rro nọ Jihova o dhesẹ kẹ omai

Megan: Whẹ kobiruo. Wariẹ rri emuhọ oria ikere nọ ma se na. O ta nọ: “Ọghẹnẹ o you akpọ na gaga.” Oware na oye, uyoyou. Uyoyou o wọ Ọghẹnẹ siobọno Ọmọ riẹ ze ti whu kẹ omai. Uzẹme na họ, idhe ẹtanigbo na họ uyoyou nọ o mae rro nọ Jihova o dhesẹ kẹ omai. Oye họ oware nọ Isẹri Jihova a be hai kokohọ ru kukpe kukpe na. Kọ ẹvẹ who rri ẹme nọ ma be ta anwọ ẹsiẹ na?

Shirley: Ọ were omẹ kẹhẹ. Whẹ kobiruo gaga nọ whọ rọ rehọ oke ra ru ẹme nana vẹ kẹ omẹ.

Kọ u wo oware jọ evaọ Ebaibol na nọ who wo otoriẹ riẹ hẹ, rekiyọ whọ gwọlọ riẹ kpahe iẹe? Kọ whọ gwọlọ riẹ kpahe eware nọ Isẹri Jihova a rọwo? O tẹ rrọ ere, ta kẹ Osẹri Jihova kpobi nọ whọ nyaku. O te were iẹe re o lele owhẹ ta ẹme na.

^ edhe-ẹme 5 Isẹri Jihova a re kokohọ ẹsiẹvo ẹgbukpe ru Ekareghẹhọ uwhu Jesu. Evaọ ukpe nana, ẹdẹ Ekareghẹhọ na o kie fihọ Edisoi-Oka, Ane 3.

^ edhe-ẹme 32 Ma te jọ uzoẹme ofa evaọ obaro ta kpahe oghẹrẹ nọ uwhu Jesu u ro si omai no igbo uzioraha gbe oware nọ ma re ru re ma sai wo erere no idhe ẹtanigbo na ze.

^ edhe-ẹme 36 Ebaibol na ọ ta nọ Ọghẹnẹ avọ Jesu yọ omọvo ho. Re whọ gbẹ riẹ kpahe ẹme nana, se uzou avọ 4 orọ obe nana Eme Ebaibol na O Gine Wuhrẹ? onọ Isẹri Jihova a kere.

^ edhe-ẹme 38 Se Emuhọ 3:15.