Kpohọ eme nọ e riẹ eva

Kpohọ oria izoẹme

Oware nọ Ma rọ Gwọlọ Esiwo

Oware nọ Ma rọ Gwọlọ Esiwo

“Ohwo nọ aye o yẹ uzuazọ okpẹkpẹe o wo; o tẹ jẹ vọ avọ uye. Ọ rẹ ro ze wọhọ ododo, o ve lo no; o re vughẹ wọhọ uwoho, ọ rẹ dọmu ẹta ọvo ho.”—Job 14:1, 2.

No anwọ emuhọ ze, ahwo-akpọ kpobi a gwọlọ nọ a rẹ who ho, a gwọlọ wo omokpokpọ jẹ rria bẹdẹ bẹdẹ. Rekọ uyoma kẹhẹ inọ mai yọ ahwo-akpọ nọ a rẹ seba ewhu hu. Eme Job nọ ọ ta anwọ ikpe idu esa (3,000) nọ i kpemu na e gbẹ rrọ uzẹme makọ rite inẹnẹ.

Ohwo kpobi ọ gwọlọ nọ ọ rẹ rria bẹdẹ bẹdẹ. Ebaibol ọ vuẹ omai nọ Ọghẹnẹ ọ ma omai avọ isiuru nọ ma rẹ rọ rria bẹdẹ bẹdẹ. (Ọtausiuwoma Na 3:11) Nọ o rrọ ere na, kọ who roro nọ Ọghẹnẹ oyoyou o re fi isiuru oware nọ ma rẹ sai wo tobọ họ họ omai eva? Whọ tẹ ta nọ ijo, kiyọ whọ ta gba. Ebaibol na o se uwhu ọwegrẹ jẹ ya eyaa kẹ omai nọ a ti si ei notọ riẹriẹriẹ.—1 Ahwo Kọrint 15:26.

Avro ọ riẹ hẹ inọ uwhu yọ ọwegrẹ. Ohwo ọvo nọ ọ ginẹ gwọlọ whu ọ riẹ hẹ. Nọ oware enwoma o tẹ be tha, ma rẹ kẹnoma kẹe, dhẹ dhere, hayo dhẹ siẹe ba. Ma tẹ be mọ, ma rẹ gwọlọ edhere kpobi nọ oma mai o rẹ rọ ga. Ma rẹ dawo utho ẹgba mai kpobi re ma whaha eware nọ e rẹ sae wha uwhu se omai.

Kọ u wo oware jọ nọ o kẹ omai imuẹro inọ a ti gine si uwhu nọ o rrọ ọwegrẹ na notọ ẹdẹjọ? Ee. Orọnikọ Jihova ọ ma ahwo-akpọ re a rria umutho ikpe jọ ọvo no a ve whu hu. Uwhu o jọ ẹjiroro Ọghẹnẹ no emuhọ ze he. Ọghẹnẹ ọ gwọlọ nọ ahwo a rria otọakpọ na bẹdẹ bẹdẹ, yọ o re ru oware kpobi nọ ọ ya eyaa riẹ gba.—Aizaya 55:11.

Kọ ẹvẹ a ti ro si uwhu notọ? U kri no nọ ahwo-akpọ a be rọ gwọlọ si uwhu notọ, rekọ a be sai si ei no ho. Makọ evaọ oke mai nana, ahwo-akpọ a gbẹ be daoma sọ a sai si uwhu notọ. Egba-eriariẹ a bi ru imu buobu nọ e be ginẹ lẹliẹ eyao buobu kpotọ. A tube wuhrẹ eware sa-sa no kpahe oghẹrẹ nọ a ruẹrẹ ugboma ohwo-akpọ họ. Evaọ eria buobu, ahwo a be rria tọ vi epanọ o jọ evaọ okenọ u kpemu. Rekọ uwhu o re sai notọ ghele he. Ẹme Ebaibol na ginọ uzẹme inọ, “ai kpobi ovu a nọ ze, ovu na a re ti zihe rua.”—Ọtausiuwoma Na 3:20.

Rekọ orọnọ ahwo-akpọ ma rẹroso ho inọ ae a ti si ẹbẹbẹ nana nọ o kri otọ no na no kẹ omai. Jihova ọ gbẹ edhere esiwo kẹ omai no, yọ ohwo nọ o ti ro ru onana họ Jesu Kristi.