Eme nọ e rrọ obotọ na yọ eme nọ o sae jọnọ Osẹri Jihova jọ o lele ohwo jọ ta kpahe Ebaibol na. Ma rehọ iẹe nọ Osẹri Jihova jọ nọ a re se Brian ọ nyaze uwou ọzae nọ a re se Eric, te ta usiuwoma kẹe.

EBAIBOL NA YỌ OBE IKUIGBE NỌ E RRỌ GBAGBA

Eric: Mẹ nwani wo isiuru kpahe egagọ tere he, fikiere mẹ riẹ oware ovo nọ ma te ta ẹme kpahe he.

Brian: O were omẹ nọ whọ rọ ta eva ra kẹ omẹ. Odẹ mẹ Brian. Diodẹ ra?

Eric: Odẹ mẹ Eric.

Brian: Eva were omẹ nọ mẹ rọ ruẹ owhẹ, Eric.

Eric: Ere omẹ re.

Brian: Mẹ nọ owhẹ onọ jọ. Okenọ whọ jọ ọmaha, whọ jẹ hai kpohọ ichọche?

Eric: Ee. Rekọ nọ me kpobọ isukulu no, mẹ gbẹ nya viere he.

Brian: Ẹhẹẹ? Kọ eme whọ jọ obọ isukulu wuhrẹ?

Eric: Ikuigbe gbe oghẹrẹ nọ ahwo a re ro yerikugbe ohwohwo me se kpahe. Ikuigbe e rẹ were omẹ gaga.

Brian: Ikuigbe e rẹ ginẹ were ese. Whaọ, iku buobu e vọ Ebaibol na. Kọ okenọ who je se ikuigbe evaọ obọ isukulu na, whọ sai ru ekiakiẹ jọ kpahe ikuigbe nọ e rrọ Ebaibol na?

Eric: Ijo. Mẹ riẹ nọ Ebaibol na yọ emamọ obe, rekọ mẹ nwane rri Ebaibol na fihọ obe ikuigbe he.

Brian: Whẹ ginọ ohwo nọ ọ rrọ eva vevẹ. Orọnọ whọ sae kẹ omẹ omoke jọ, mẹ gwọlọ dhesẹ ikuigbe jọ evaọ usu enọ e vọ Ebaibol na kẹ owhẹ.

Eric: U woma. Rekọ me wo Ebaibol ho.

Brian: Ẹme ọ riẹ hẹ. Mẹ rọ ọmẹ dhesẹ iẹe kẹ owhẹ. Ma kaki se obe 1 Iruẹru-Ivie 29:26, 27. Oria na o ta nọ: “Ere Devidi ọmọzae Jẹsi o ro su ahwo Izrẹl kpobi. Udhukpe-uvẹ o su ahwo Izrẹl; ikpe-ihrẹ o su evaọ Hibrọn, Jerusalem kọ ọgba-ikpe gbe ikpesa.”

Eric: Kọ oyena ginọ ikuigbe uzẹme?

Brian: Egba-avro a ta oke jọ nọ, Devidi yọ ohwo nọ ọ rria evaọ okejọ vievie he.

Eric: Uzẹme? Fikieme a rọ ta ere?

Brian: U te no Ebaibol na no, umutho ebe jọ ọvo e ta kpahe Devidi. Rekọ evaọ ukpe 1993, utu ahwo jọ nọ a rẹ kiẹ otọ eware anwae a tẹ ruẹ utho jọ nọ a kere fihọ nọ “Uwou Devidi.”

Eric: U woma kẹhẹ.

Brian: Omọfa jọ nọ Ebaibol na ọ fodẹ nọ ahwo a ta nọ ọ rria gbe he họ, Pọntiọs Pailet ọnọ ọ jọ ọba evaọ okenọ Jesu ọ jọ otọakpọ. Obe Luk 3:1 a jọ fodẹ iẹe. A jọ oria Ebaibol nana fodẹ edẹ amọfa jọ nọ e jọ isu evaọ oke yena.

Eric: Ginọ uzẹme, me muẹrohọ iẹe. O ta nọ “okenọ Pọntiọs Pailet ọ jọ ọba Judia, Herọd ọ jọ osu ubrotọ Galili.”

Brian: Whẹ kobiruo. Evaọ ikpe buobu egba-eriariẹ a rọwo nọ Pọntiọs Pailet yọ ohwo nọ ọ rria no evaọ oke jọ họ. Rekọ evaọ oware wọhọ ikpe 50 nọ i kpemu, a ruẹ utho jọ evaọ obọ Ovatha-Ọre nọ a kare odẹ Pailet fihọ gbalọ.

 Eric: Uzẹme? Me ri yo kpahe oware nana nọ whọ ta na ẹdẹvo ho.

Brian: O were omẹ nọ obọnana whọ riẹ kpahe iẹe no.

Eric: Uzẹme riẹ họ, me rri Ebaibol na ghaghae wọhọ emamọ obe nọ a riẹ kere, rekọ me roro nọ o nwani wo iruo kẹ omai nẹnẹ hẹ. O sai wo ikuigbe nọ e rrọ gbagba, rekọ me roro nọ u wo erere ọvo kẹ omai hi.

EBAIBOL NA O KRI NO REKỌ U GBE WO IRUO KẸ OMAI NẸNẸ

Brian: Ahwo buobu a rọwo nọ ere o rrọ, rekọ mẹ rọwo ere he. Oware nọ mẹ rọ ta ere họ: No anwọ emuhọ ze, eware nọ mai ahwo-akpọ ma ginẹ gwọlọ i ri nwene he. Wọhọ oriruo, ma gwọlọ emu nọ ma rẹ re, iwu nọ ma re ku họ gbe uwou nọ ma rẹ rria. O rrọ ẹkoma mai ahwo-akpọ re ma lele ohwohwo ta ẹme je wo uviuwou nọ u wo evawere. Mai kpobi ma gwọlọ eware nana, ogbẹrọ ere?

Eric: Ere.

Brian: Ma rẹ sae jọ Ebaibol na ruẹ ehrẹ nọ i re fiobọhọ kẹ omai evaọ abọ nana. Fikiere, dede nọ Ebaibol na o kri no, u gbe wo iruo kẹ omai nẹnẹ.

Eric: Eme họ otọ ẹme ra na?

Brian: Oware nọ mẹ be ta na họ: Ebaibol na o wo ehrẹ buobu nọ i re fiobọhọ kẹ omai nẹnẹ wọhọ epanọ o jọ evaọ okenọ a ro kere iei anwọ ikpe buobu nọ i kpemu.

Ebaibol na o wo ehrẹ buobu nọ i re fiobọhọ kẹ omai nẹnẹ wọhọ epanọ o jọ evaọ okenọ a ro kere iei anwọ ikpe buobu nọ i kpemu

Eric: Uzẹme? Evaọ abọ vẹ?

Brian: Ehrẹ Ebaibol i re fiobọhọ kẹ omai evaọ oghẹrẹ nọ ma re rri ugho, epanọ ma sai ro wo evawere evaọ uviuwou mai, gbe oghẹrẹ nọ ma sae rọ jọ emamọ egbẹnyusu. Ebaibol na ọ wọhọ emapo nọ u re dhesẹ edhere kẹ ohwo. Re a ginẹ ta uzẹme, o lọhọ re ohwo ọ sae jọ emamọ ọzae uwou orọo hayo ọsẹ nẹnẹ?

Eric: Evaọ uzẹme, o ginẹ lọhọ họ. Enwenọ ẹgbukpe soso ọna nọ mẹ avọ aye mẹ ma rọ rọo na, rekọ ẹsibuobu ma rẹ rọwokugbe he nọ ma te bi ru eware.

Brian: Ere o ginẹ rrọ. Rekọ Ebaibol na o wo ehrẹ nọ e rẹ sai fiobọhọ. Wọhọ oriruo, ma se obe Ahwo Ẹfisọs 5:22, 23, gbe 28. Iviena sei ze.

Eric: U woma. O ta nọ: “Jọ eyae e romakpotọ kẹ ezae rai wọhọ epanọ a bi ru kẹ Olori na, keme ọzae họ ọnọ o wuzou aye riẹ wọhọ epanọ Kristi o wuzou ukoko na, ugboma riẹ, onọ ọ rrọ osiwi riẹ na.” Owọ avọ 28 o ta nọ: “Epọvo na u fo nọ ezae i re you eyae rai wọhọ ugboma obọrai. Ọzae nọ o you aye riẹ, yọ omobọ riẹ o you na.”

Brian: Whẹ kobiruo isase. Kọ evawere e gbẹ jọ uviuwou na nọ ọzae-avọ-aye a te fi ohrẹ Ebaibol nana họ iruo?

Eric: Ee, ere o rrọ. Rekọ o rẹ lọhọ ẹta vi eruo.

Brian: Ginọ uzẹme, ohwo ọvo nọ ọ gba ọ riẹ hẹ. U te no ere no, a jọ uzou Ebaibol yena tuduhọ omai awọ nọ ma hai rorote ziezi. * U fo nọ ọzae-avọ-aye nọ a rrọ uwou a hai kie kẹ ohwohwo. Ehrẹ Ebaibol i fiobọhọ kẹ omẹ avọ aye mẹ gaga no.

Eric: Areghẹ ọ rrọ ẹme ra na.

Brian: Mai Isẹri Jihova ma wo Oria Evuẹ Itanẹte jọ nọ u wo emamọ ehrẹ kpahe orọo gbe epanọ uviuwou o sai ro wo evawere. Otẹrọnọ whọ rẹ gbẹ kẹ omẹ omoke jọ, mẹ sai dhesẹ eware jọ nọ e rrọ eva riẹ kẹ owhẹ.

Eric: Ẹhẹ, dhesẹ iẹe kẹ omẹ.

Brian: U woma. Adrẹse oria evuẹ itanẹte na họ www.jw.org/iso. Oria ọsosuọ na ona.

Eric: Iwoho nọ e riẹ e were omẹ.

Brian: Enana yọ iwoho oghẹrẹ nọ ma be rọ ta usiuwoma evaọ akpọ na soso. Ẹhẹẹ, oria nọ mẹ be gwọlọ na ona. Uzoẹme oria nana họ, “Obufihọ Rọkẹ Ezae-avọ-Eyae gbe Esẹgbini.” Whọ rẹ jọ otọ uzoẹme na ruẹ izoẹme buobu nọ e ta kpahe ebẹbẹ sasa nọ iviuwou i bi wo. Kọ ojọ o were owhẹ evaọ usu enana?

Eric: Ee. Onọ o mae were omẹ họ: “Epanọ Whọ Sai ro Ku Ebẹbẹ Họ Evaọ Orọo Ra.” Mẹ te daoma se oyena!

 Brian: A jọ uzoẹme nana ta kpahe eware ene jọ nọ i re fiobọhọ ku ebẹbẹ họ evaọ orọo. Muẹrohọ oware nọ edhe-ẹme nana ọ ta. Iviena fiobọhọ sei ze.

Eric: U woma. O ta nọ: “Ẹme nọ a rẹ ta kugbe ohwohwo evaọ orọo ọ wọhọ azẹ nọ ọ rrọ ugboma na, yọ uyoyou avọ adhẹẹ nọ ọzae-avọ-aye a re wo kẹ ohwohwo e wọhọ ubiudu gbe irue na.” Hmm, oriruo nọ a kẹ evaọ etenẹ na ọ were omẹ kẹhẹ.

Brian: Whẹ kobiruo isase. A jọ edhe-ẹme na fodẹ oria Ebaibol jọ. Whọ tẹ rọ obọ tei, u re rovie kẹ owhẹ.

Eric: Ee, mẹ be ruẹ e riẹ. Obe Ahwo Ẹfisọs 5:33. O ta nọ: “Whai omomọvo o re you aye riẹ hrọ wọhọ epanọ o you omobọ riẹ; evaọ abọdekọ riẹ, jọ aye o wo adhẹẹ odidi kẹ ọzae riẹ.”

Brian: Kọ whọ gbẹ ruẹ nọ etenẹ na ọ be ta nọ who re ru oware nọ who bi rẹro riẹ mi ọrivẹ ra na kẹe re?

Eric: Ẹme na ọ re nwani vẹ omẹ ẹro tere he.

Brian: Ọzae kpobi ọ gwọlọ nọ aye riẹ ọ rẹ rọ adhẹẹ kẹe, yọ aye kpobi ọ gwọlọ nọ ọzae riẹ ọ hai dhesẹ kẹe ẹsikpobi nọ o gine you rie, uzẹme manikọ ọrue?

Eric: Uzẹme dẹẹ. Ọrue ọ riẹ hẹ.

Brian: Nọ ọzae ọ tẹ be hae gwọlọ idhere nọ o re ro dhesẹ uyoyou kẹ aye riẹ, kọ o gbẹ lọhọ kẹ aye na re ọ rọ adhẹẹ kẹ ọzae na?

Eric: O wọhọ nọ eware e rẹ riẹ nya.

Brian: Dede nọ a kere oria Ebaibol nana enwenọ ikpe idu ivẹ (2,000) nọ i kpemu, o ta kpahe oware nọ ọzae-avọ-aye a re ru re orọo rai o sai wo evawere nọ a te fi ohrẹ nana họ iruo. Yọ wọhọ oriruo ubiudu gbe irue nọ ma ta ẹsiẹ na, orọo na o rẹ jọ orọ evawere.

Eric: Uzẹme riẹ họ, mẹ riẹ nọ Ebaibol na o wo ehrẹ nọ i woma te enẹ vẹre he.

Brian: Ẹme nọ whọ ta na ọ were omẹ gaga. Mẹ gwọlọ nọ me re zihe ze ẹdẹfa re ma ta kpahe uzoẹme nana nọ o ta nọ: “Eware Ene Nọ I re Fiobọhọ Ku Ebẹbẹ Họ Evaọ Orọo” nọ o rrọ oria ovona nana nọ ma jọ ruẹ uzoẹme nọ whọ salọ na evaọ Oria Evuẹ Itanẹte mai na. *

Eric: U woma. Mẹ avọ aye mẹ ma ti sei kugbe.

Kọ u wo oware jọ evaọ Ebaibol na nọ who wo otoriẹ riẹ hẹ, rekiyọ whọ gwọlọ riẹ kpahe iẹe? Kọ whọ gwọlọ riẹ kpahe eware nọ Isẹri Jihova a rọwo? O tẹ rrọ ere, ta kẹ Osẹri Jihova kpobi nọ whọ nyaku. O te were iẹe re o lele owhẹ ta ẹme na.

^ edhe-ẹme 63 Re whọ gbẹ riẹ kpahe ẹme nana, se uzou avọ 14 orọ obe na Eme Ebaibol na O Gine Wuhrẹ? onọ Isẹri Jihova a kere.