Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Uwou-Eroro Na  |  Ọvo 2015

 UZOẸME UKE NA | WHỌ SAI SI KẸLE ỌGHẸNẸ

Kọ Who Wo Usu Okpekpe Kugbe Ọghẹnẹ?

Kọ Who Wo Usu Okpekpe Kugbe Ọghẹnẹ?

“Who te wo usu okpekpe kugbe Ọghẹnẹ, o rẹ lẹliẹ udu te owhẹ otọ. O rẹ jọ owhẹ oma wọhọ nọ oware nọ Ọghẹnẹ ọ gwọlọ kpobi họ re u woma kẹ owhẹ.”—CHRISTOPHER, UZOGE ỌMỌZAE JỌ EVAỌ OBỌ GHANA.

“Ọghẹnẹ ọ riẹ oware kpobi nọ o be kẹ owhẹ uye, yọ o re fiobọhọ kẹ owhẹ vi epanọ whọ tubẹ gwọlọ dede.” —HANNAH, ỌMỌTẸ NỌ Ọ RRỌ IKPE 13 EVAỌ OBỌ ALASKA, AMERICA.

“Oware nọ u woma tei o rrọ họ nọ whọ tẹ riẹ nọ who wo emamọ usu kugbe Ọghẹnẹ!”—GINA, AYE OBỌ JAMAICA NỌ Ọ RRỌ OWARE WỌHỌ IKPE 45.

Orọnikọ Christopher, Hannah, gbe Gina ọvo o rrọ ere kẹ hẹ. U mu ahwo buobu evaọ akpọ na soso ẹro inọ a wo emamọ usu kugbe Ọghẹnẹ. Kọ owhẹ omara? Kọ who roro nọ who wo usu okpekpe kugbe Ọghẹnẹ? Kọ whọ gwọlọ nọ who re wo usu okpekpe kugbei? Ẹsejọhọ whọ sai roro nọ: ‘Kọ o ginẹ lọhọ re ohwo-akpọ gheghe o wo usu okpekpe kugbe Ọghẹnẹ Erumeru na? Otẹrọnọ o lọhọ, kọ ẹvẹ whọ sai ro ru ei?’

O LỌHỌ RE A SI KẸLE ỌGHẸNẸ

Wọhọ epanọ Ebaibol na o dhesẹ, ma rẹ sai wo usu okpekpe kugbe Ọghẹnẹ. Ebaibol na ọ ta nọ Ọghẹnẹ o se Abraham ọsẹ-ode emọ Izrẹl na “ogbẹnyusu mẹ.” (Aizaya 41:8) Muẹrohọ oware ofa nọ Ebaibol na ọ ta kẹ omai evaọ obe Jemis 4:8: “Wha si kẹle Ọghẹnẹ, o re ti si kẹle owhai.” Fikiere ma sae ta nọ, o ginẹ lọhọ re a wo usu okpekpe kugbe Ọghẹnẹ. Nọ orọnọ ma rẹ sae ruẹ Ọghẹnẹ hẹ na, kọ ẹvẹ ma sai ro si kẹle iẹe je wo usu okpekpe kugbei?

Re ma sae k’uyo onọ yena, joma ta kpahe oghẹrẹ nọ imava a sai ro zihe ruọ egbẹnyusu. Odẹ ohwohwo họ oware ọsosuọ nọ a rẹ kake riẹ. Nọ oke o be nyaharo na, usu na o rẹ kpekpe viere nọ a te bi lele ohwohwo ta ẹme ẹsikpobi jẹ be ta eva kẹ ohwohwo. Yọ nọ a tẹ be daoma fiobọhọ kẹ ohwohwo, usu na o vẹ ga viere. Ere ọvona o rẹ jọ nọ ohwo o te bi mu usu kugbe Ọghẹnẹ. Joma ta kpahe epanọ onana o sae rọ via.