Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Uwou-Eroro Na  |  Ọvo 2015

 UZOẸME UKE NA | WHỌ SAI SI KẸLE ỌGHẸNẸ

Kọ Whọ Riẹ Odẹ Ọghẹnẹ je bi Ru re Amọfa A Riẹ Odẹ Na?

Kọ Whọ Riẹ Odẹ Ọghẹnẹ je bi Ru re Amọfa A Riẹ Odẹ Na?

Kọ who wo ogbẹnyusu ọkpekpe jọ nọ whọ riẹ odẹ riẹ hẹ? Ma riẹ nọ oware utioye o sae via ha. Aye obọ Bulgaria jọ nọ a re se Irina ọ ta nọ: “Whọ gbẹ riẹ odẹ Ọghẹnẹ hẹ, whọ rẹ sai wo usu okpekpe kugbei hi.” Wọhọ epanọ ma ta evaọ uzoẹme nọ o vrẹ na, Ọghẹnẹ ọ gwọlọ nọ who si kẹle iẹe. Fikiere, ẹkwoma Ebaibol na Ọghẹnẹ o bi ro dhesẹ omariẹ kẹ owhẹ inọ: “Mẹ họ Jihova, oye họ odẹ mẹ.”—Aizaya 42:8NW.

Ẹkwoma Ebaibol na Ọghẹnẹ o bi ro dhesẹ omariẹ kẹ owhẹ inọ: “Mẹ họ Jihova, oye họ odẹ mẹ.” —Aizaya 42:8, NW

Kọ who roro nọ o r’oja kẹ Jihova re whọ riẹ odẹ riẹ je ru re amọfa a riẹ odẹ na? Roro kpahe onana: Odẹ Ọghẹnẹ nọ a rehọ ibiẹme ene Hibru YHWH nọ a re se Tetragrammaton kere na, o romavia unuẹse nọ o joma bu te idu ihrẹ (7,000) evaọ Ikereakere Hibru na. Unuẹse nọ odẹ nana o romavia evaọ Ebaibol na u bu vi unuẹse nọ odẹ ofa kpobi o romavia. Fikiere onana u dhesẹ nọ Jihova ọ gwọlọ nọ ma riẹ odẹ riẹ je ru re amọfa a riẹ odẹ na. *

Odẹ ohwohwo họ oware ọsosuọ nọ imava nọ e gwọlọ jọ egbẹnyusu a rẹ kake riẹ. Kọ whọ riẹ odẹ Ọghẹnẹ?

Fikinọ Ọghẹnẹ ọ ma eware kpobi yọ ọ rrọ fuafo, ahwo jọ a re roro nọ a te bi se odẹ riẹ yọ orivo. Uzẹme riẹ họ, o ginẹ thọ re a rọ odẹ Ọghẹnẹ zaharo hayo sei ugbese, nwane wọhọ epanọ o thọ re who se odẹ ogbẹnyusu ra raha na. Rekọ, Jihova ọ gwọlọ nọ ahwo nọ a you i rie a rọ adhẹẹ kẹ odẹ riẹ je ru re amọfa a riẹ odẹ na. (Olezi 69:30, 31; 96:2, 8) Kareghẹhọ nọ Jesu o wuhrẹ ilele riẹ re a lẹ nọ: “Ọsẹ mai nọ ọ rrọ obọ odhiwu, jọ odẹ ra o jọ fuafo.” Nọ ma te bi ru re amọfa a riẹ odẹ na, yọ ma ginẹ gwọlọ nọ a ru odẹ Ọghẹnẹ fuafo. Onana u re si omai kẹle Ọghẹnẹ.—Matiu 6:9.

Ebaibol na ọ ta nọ Ọghẹnẹ ọ rẹ sẹro enọ i bi ‘roro kpahe odẹ riẹ.’ (Malakae 3:16) Rọ kpahe ahwo otiọye na, Jihova ọ ya eyaa nọ: “Me re ti siwi ei, mẹ rẹ te thọ othọ riẹ, keme ọ riẹ odẹ mẹ. Okenọ o se omẹ, me re ti yo kẹ e; mẹ avọ iẹe a gbẹ te jọ eva uye.” (Olezi 91:14, 15) Otẹrọnọ ma gwọlọ wo usu okpekpe kugbe Ọghẹnẹ, o r’oja gaga re ma riẹ odẹ riẹ je ru re amọfa a riẹ odẹ na.

^ edhe-ẹme 4 Rekọ, efefafa Ebaibol buobu a si odẹ Ọghẹnẹ no efafa Ebaibol rai, dede nọ odẹ na o romavia evaọ Ikereakere Hibru na nọ a re se Ọvọ Anwae na unuẹse buobu. Ukpoye a tẹ rehọ edẹ-ova wọhọ “Olori” hayo “Ọghẹnẹ” ro nwene odẹ Ọghẹnẹ. Re whọ gbẹ riẹ kpahe onana, se ẹwẹ-obe avọ 195-197 orọ obe na Eme Ebaibol na O Gine Wuhrẹ? onọ Isẹri Jihova a kere.