Kpohọ eme nọ e riẹ eva

Kpohọ oria eware nọ e riẹe eva

UZOẸME UKE NA | FIKIEME EWARE IYOMA E BE RỌ VIA KẸ AHWO OWOMA?

Fikieme Eware Iyoma E Be Rọ Via Kẹ Ahwo Owoma?

Fikieme Eware Iyoma E Be Rọ Via Kẹ Ahwo Owoma?

Fikinọ Jihova Ọghẹnẹ * họ ọnọ ọ ma eware kpobi jẹ rrọ ọnọ ọ mai kpehru, ahwo buobu a rẹ fo ẹe kẹ oware kpobi nọ o via evaọ akpọ na, makọ eware iyoma dede. Rekọ, roro kpahe oware nọ Ebaibol na ọ ta kpahe Ọghẹnẹ uzẹme na:

  • “ỌNOWO na o kiẹrẹe eva idhere riẹ kpobi.”—Olezi 145:17.

  • “Idhere riẹ [Ọghẹnẹ] kpobi i re wowoma. Ọghẹnẹ ọtẹruo nọ ọ kare eyoma, nọ o re wowoma je kiete.”—Iziewariẹ 32:4.

  • “[Jihova] o wo ohrọ avọ uwero.”—Jemis 5:11.

Ọghẹnẹ họ ohwo nọ ọ be wha eware iyoma ze he. Kọ ọ rẹ lẹliẹ ahwo ru eware iyoma? Dazigbe. Ebaibol na ọ ta nọ: “Wha jọ ohwo ọvo nọ o kie ruọ odawọ, ọ ta nọ, ‘Ọghẹnẹ ọ dawo omẹ hẹ.’” Fikieme? “Keme a sae rehọ eyoma dawo Ọghẹnẹ hẹ, yọ ọyomariẹ ọrẹ dawo ohwo ọvo ho.” (Jemis 1:13) Ọghẹnẹ ọ rẹ rehọ eware iyoma dawo ahwo ho, yọ ọ rẹ lẹliẹ ahwo ru eware iyoma gbe he. Ọghẹnẹ ọ rẹ wha eware iyoma ze vievie he. Kọ ono hayo eme ọ be wha eware iyoma nọ e be via na ze?

NỌ OWARE UYOMA O TẸ VIA DI OWHẸ HỌ ORIA NỌ WHỌ RRỌ

Ebaibol na o ta kpahe oware jọ nọ o be wha uye-oruẹ ohwo-akpọ ze, inọ: ‘Oke gbe eware idudhe e rẹ via kẹ ae kpobi.’ (Ọtausiuwoma Na 9:11) Oware idudhe hayo asidẹnte ọ sai via kẹ ohwo otẹrọnọ ohwo na ọ rrọ oria nọ oware na o jẹ via. Oware wọhọ ikpe idu ivẹ (2,000) nọ i kpemu, Jesu Kristi ọ ta kpahe ahwo 18 nọ a whu fiki uwou ukpehru nọ u kie ruru ai. (Luk 13:1-5) Orọnikọ emuemu nọ a ru oye o wha uwhu se ai hi, rekọ oware na o via di ai họ oria nọ a jọ na. Evaọ ukpe 2012, owhe ologbo nọ o ku evaọ Nigeria, ọ raha eware buobu je kpe ahwo. Ohwo kpobi owhe na o kpomahọ, te ezae te eyae, te ekpako te emaha, te edafe te iyogbere. Ere ọvona ẹyao ọ rrọ re, ọ rẹ sai kie ohwo kpobi evaọ oke kpobi.

Fikieme Ọghẹnẹ ọ gbẹ rọ thọ ahwo owoma no okpẹtu hu?

Ahwo jọ a sae nọ inọ: ‘Kọ fikieme Ọghẹnẹ ọ gbẹ whaha eware itieye na re e seba ẹ via ha? Kọ ọ gbẹ sae thọ ahwo owoma no okpẹtu otiọye na?’ Ọghẹnẹ ọ sae thọ ahwo evaọ edhere otiọye otẹrọnọ ọ riẹ nọ eware itieye e te via taure e tẹ te via. Nọ orọnọ Ọghẹnẹ ọ rẹ riẹ oware nọ o te via evaọ obaro taure o tẹ te via na, onọ na họ: Kọ u wo eware jọ nọ e te via evaọ obaro nọ Ọghẹnẹ ọ rẹ gwọlọ riẹ kpahe he?—Aizaya 42:9.

Ebaibol na ọ ta nọ: “Ọghẹnẹ mai ọ rọ obọ odhiwu; oware nọ u je rie ei o re ruẹ.” (Olezi 115:3) Dede nọ Jihova ọ rẹ sai ru oware kpobi, oware nọ o rri nọ u kiehọ ọvo o re ru. Ere ọvona kpahe oware nọ ọ gwọlọ nọ ọ rẹ ruẹ evaọ obaro. Wọhọ oriruo, fiki emuemu nọ ọ da okpẹwho Sọdọm avọ Gomora fia, Ọghẹnẹ ọ ta kẹ Abraham nọ: “Mẹ rẹ nya re mẹ ruẹ sọ unubo kpahọ ae nọ u bru omẹ ze na, ghinọ uzẹme; o gbẹrọ erei hi, mẹ rẹ te riẹ.” (Emuhọ 18:20, 21) Evaọ oke jọ, Jihova ọ salọ nọ ọ rẹ riẹ kpahe oghẹrẹ nọ emuemu ikpẹwho yena o bu te he. Ere ọvona re, Jihova ọ sae jiroro nọ ọ rẹ riẹ kpahe oware nọ o te via evaọ obaro hayo ọ be riẹ kpahe iẹe he. (Emuhọ 22:12) Orọnikọ onana u dhesẹ nọ Jihova ọ be mọ oyẹlẹ hẹ, hayo kọ inọ ọ wọhọ ohwo-akpọ nọ ọ gba ha. Fikinọ “iruo riẹ i kiete,” Ọghẹnẹ ọ rẹ riẹ oware nọ o te via evaọ obaro otẹrọnọ o rọwo kugbe ẹjiroro riẹ; yọ ọ rẹ gba ahwo họ họ re a ru oware nọ a gwọlọ ru hu. * (Iziewariẹ 32:4) Kọ eme onana u dhesẹ? Onana u dhesẹ nọ: Ọghẹnẹ ọ rẹ salọ oware nọ ọ rẹ rọ ẹgba riẹ ruẹ evaọ obaro.

Fikieme Ọghẹnẹ ọ gbẹ rọ thọ ahwo owoma no ozighi hi?

KỌ AHWO-AKPỌ A BE WHA EWARE IYOMA NỌ E BE VIA NA ZE?

Ahwo-akpọ a be ginẹ rọ obọ so eware iyoma jọ nọ e be via evaọ akpọ na. Muẹrohọ epanọ Ebaibol na o dhesẹ oghẹrẹ nọ iroro iyoma i re ro muhọ. O ta nọ: “Kohwo kohwo o re kie ruọ odawọ okenọ urusio avọ eguọlọ-aguọlọ riẹ e gba riẹ họ. Kẹsena, nọ urusio u te dihọ, u ve yẹ umuomu, nọ umuomu o jẹ ro thẹtawa no o vẹ wha uwhu ze.” (Jemis 1:14, 15) Ohwo ọ rẹ sae ruẹ uye nọ o te bi ru lele ekpehre isiuru e riẹe eva. (Ahwo Rom 7:21-23) Wọhọ epanọ ikuigbe i dhesẹ, ahwo-akpọ a duomahọ eware iyoma buobu no nọ e be wha uye-oruẹ ze. U te no ere no, ahwo oyoma a be bẹbẹ amọfa họ re a rọ aro kele ai ru eyoma.—Itẹ 1:10-16.

Ahwo-akpọ a duomahọ eware iyoma buobu no nọ e be wha uye-oruẹ ze

Kọ Ọghẹnẹ ọ rẹ whaha ahwo-akpọ re a siọ eware iyoma ba eruo? Roro kpahe oghẹrẹ nọ Ọghẹnẹ ọ ma ohwo akpọ. Ebaibol na ọ ta nọ Ọghẹnẹ ọ ma ohwo akpọ evaọ uwoho riẹ. Fikinọ ahwo-akpọ a tho Ọghẹnẹ, a sae rọ aro kele iruemu riẹ. (Emuhọ 1:26) Ọghẹnẹ ọ kẹ ahwo-akpọ uvẹ nọ a rẹ rọ jiroro kẹ omobọrai. Fikiere, a rẹ sae salọ sọ a rẹ gọ Ọghẹnẹ je yoẹme kẹe. (Iziewariẹ 30:19, 20) Otẹrọnọ Ọghẹnẹ ọ rẹ gba ahwo họ re a ru oware kpobi nọ ọ ta, koyehọ uvẹ nọ ọ kẹ rai re a salọ kẹ omobọrai na uvrẹvru gheghe. Ọghẹnẹ o te ru ere, koyehọ ahwo-akpọ a zihe ruọ ẹjini gheghe no nọ o re ru oware kpobi nọ a ta kẹe nọ o ru. O tẹ rọ ere, kiyọ ahwo-akpọ a wo otatha nọ u re dhesẹ oghẹrẹ nọ uzuazọ rai o te jọ gbe oware nọ o te via kẹ ae evaọ uzuazọ. Eva e rẹ were omai gaga inọ Ọghẹnẹ ọ ma omai ere he, rekọ o bru ọghọ họ omai oma jẹ kẹ omai uvẹ nọ ma rẹ rọ salọ onọ ma gwọlọ ru. O make rrọ ere na, ahwo-akpọ a te ruẹ uye bẹdẹ bẹdẹ fiki eyoma nọ a rọ obọrai so gbe ekpehre iroro nọ a jẹ hẹ.

KỌ KARMA HỌ OWARE NỌ O BE WHA UYE-ORUẸ SE AHWO-AKPỌ?

Otẹrọnọ whọ nọ ohwo egagọ Hindu hayo Buda onọ nọ o rrọ uke emagazini nana, uyo nọ a sae kẹ owhẹ họ: “Uzi Karma họ oware nọ o be lẹliẹ eware iyoma via kẹ ahwo owoma. A be ruẹ uye eware iyoma nọ a ru evaọ uzuazọ nọ a yeri vrẹ no taure a tẹ te wariẹ ai yẹ.” *

Re ma riẹ sọ uwuhrẹ Karma na ginọ uzẹme hayo ọrue, joma roro kpahe oware nọ Ebaibol na ọ ta kpahe uwhu. Nọ Ọghẹnẹ ọ ma ohwo akpọ no evaọ ọgbọ Idẹn, ọ tẹ ta kẹ Adamu nọ: “Whọ rẹ sae ria ibi ire nọ e rọ ogba na odode; rekọ whọ rẹ re ure ẹriẹ ewoma gbe eyoma na ha, keme eva ẹdẹ nọ whọ re riẹ, who re ti whuẹ.” (Emuhọ 2:16, 17) Adamu ọ gbẹ hae ghẹmeeyo kẹ Ọghẹnẹ hẹ, ọ hae te rria bẹdẹ bẹdẹ. Uwhu họ osa nọ u no aghẹmeeyo na ze. Fikiere nọ a yẹ emọ no, “uwhu u te zite ahwo kpobi.” (Ahwo Rom 5:12) Fiki oye a sae rọ ta nọ “uwhu họ osa eware uyoma.” (Ahwo Rom 6:23) Ebaibol na ọ tẹ jẹ ta nọ: “Ọnọ o whu no na o no abọ uzioraha no.” (Ahwo Rom 6:7) Otọ ẹme na họ, nọ ohwo o te whu no yọ izieraha riẹ kpobi i voro no.

Ahwo buobu nẹnẹ a rẹ ta nọ uzi Karma họ oware nọ o be lẹliẹ ahwo-akpọ ruẹ uye. Ohwo nọ ọ rọwo uwuhrẹ nana, o re roro nọ uye nọ ọ be ruẹ gbe orọ amọfa yọ oware nọ ae ọvo a rọ obọ so. Rekọ ma tẹ make rọwo uwuhrẹ nana, eware iyoma e rẹ gbẹ via ghele. Ahwo nọ a rọwo uwuhrẹ Karma na a ta nọ, a gbẹ wariẹ ohwo yẹ hẹ yọ ọ vabọ no uye nọ ọ hae te ruẹ no. Enana kpobi e rọwokugbe oware nọ Ebaibol na o wuhrẹ vievie he. *

OHWO NỌ Ọ BE WHA EYOMA ZE!

Kọ whọ riẹ nọ Setan nọ ọ rrọ “okpohwo akpọ ọnana” koyehọ osu akpọ nana họ ọnọ ọ be wha uye-oruẹ ze?—Jọn 14:30

Orọnikọ ohwo akpọ jọ ọ be wha eware iyoma ze he. Setan Ẹdhọ na yọ ukọ-odhiwu Ọghẹnẹ vẹre, rekọ fikinọ o dikihẹ ga “evaọ uzẹme” na ha, ọ tẹ wha uzioraha ruọ akpọ na. (Jọn 8:44) Ọye ọ wha ọwọsuọ nọ ọ romavia evaọ obọ ọgbọ Idẹn na ze. (Emuhọ 3:1-5) Jesu Kristi o se rie ‘oyoma na’ gbe “okpohwo akpọ ọnana,” koyehọ osu akpọ na. (Matiu 6:13; Jọn 14:30) Ahwo-akpọ a bi yoẹme kẹ Setan je bi gbabọkẹ idhere Ọghẹnẹ. (1 Jọn 2:15, 16) Obe 1 Jọn 5:19 o ta nọ: “Akpọ na ọsoso ọ rọ obọ ogaga oyoma na.” Ikọ-odhiwu efa i kuomagbe Setan wọso Ọghẹnẹ. Ebaibol na ọ ta nọ Setan avọ ikọ imuemu riẹ a be “viẹ akpọ kpobi họ,” jẹ be wha uye ze akpọ na. (Eviavia 12:9, 12) Fikiere, Setan họ ọnọ ọ be wha eware iyoma nọ e rrọ akpọ na ze.

Uzẹme riẹ họ, Ọghẹnẹ họ ọnọ ọ be wha eware iyoma nọ e be via evaọ akpọ na ze he, yọ ọ rẹ lẹliẹ ahwo ruẹ uye gbe he. Rekọ, Ọghẹnẹ ọ ya eyaa nọ o ti si eyoma kpobi no otọ kẹle. Ma te jọ uzoẹme nọ o rrọ obaro na ta kpahe onana.

^ edhe-ẹme 3 Ebaibol na ọ ta nọ odẹ Ọghẹnẹ họ Jihova.

^ edhe-ẹme 11 Re whọ gbẹ riẹ kpahe oware nọ o soriẹ nọ Ọghẹnẹ ọ rọ kẹ emuemu uvẹ krite enẹ, se uzou avọ 11 orọ obe na Eme Ebaibol na O Gine Wuhrẹ? onọ Isẹri Jihova a kere.

^ edhe-ẹme 16 Re who gbe wuhrẹ kpahe oghẹrẹ nọ uzi Karma u ro muhọ, se ẹwẹ-obe avọ 8-12 orọ ibroshọ na Eme Ọ rẹ Via k’Omai Okenọ Ma te Whu? onọ Isẹri Jihova a kere.

^ edhe-ẹme 18 Re whọ gbẹ riẹ kpahe oware nọ Ebaibol na ọ ta nọ o rẹ via kẹ ahwo nọ a whu no gbe ẹruore nọ ọ rrọ kẹ ai, se uzou avọ 6 gbe 7 orọ obe na Eme Ebaibol na O Gine Wuhrẹ?