Kpohọ eme nọ e riẹ eva

Kpohọ oria eware nọ e riẹe eva

Ọghẹnẹ Ọ Gwọlọ nọ Who Si Kẹle iẹe

Ọghẹnẹ Ọ Gwọlọ nọ Who Si Kẹle iẹe

“Ohwo ọvo ọ sai bru omẹ tha ha ajokpa nọ Ọsẹ nọ o vi omẹ ze o si rie.”—JỌN 6:44.

OWARE NỌ U GBE BI RO MU AHWO JỌ ẸRO HO: Ahwo jọ nọ a ta nọ a rọwo Ọghẹnẹ, a be sai si kẹle iẹe he. Aye obọ Ireland jọ nọ a re se Christina, nọ ọ jẹ hai kpohọ ichọche koka koka, ọ ta nọ: “Mẹ riẹ nọ Ọghẹnẹ ọ ma eware kpobi, rekọ mẹ riẹ oghẹrẹ ohwo nọ ọ rrọ họ, fikiere me roro nọ mẹ rẹ sai si kẹle iẹe he.”

OWARE NỌ EBAIBOL NA O WUHRẸ: Ma tẹ maki roro nọ ma rẹ sai si kẹle Ọghẹnẹ hẹ, Jihova ọ rẹ nyasiọ omai ba ha. Nọ Jesu o je dhesẹ oghẹrẹ nọ Ọghẹnẹ ọ be rọ sẹro mai, ọ ta nọ: “Ohwo o te wo udhe ogodẹ usoi, re ọvo jọ o te vru, kọ ọ gbẹ se udhe-one gbe ikpegbizi na ba obọ ugbehru re ọ nya e guọlọ ọ nọ o vru na?” Eme onana u wuhrẹ omai? Jesu ọ ta nọ: “Whaọ ere Ọsẹ mẹ nọ ọ rọ obọ odhiwu ọ guọlọ nọ ọvo eva emaha enana o vru hu.”—Matiu 18:12-14.

Ẹme na “ọvo eva emaha enana,” u dhesẹ nọ mai omomọvo ma rrọ ghaghae evaọ aro Ọghẹnẹ. Kọ ẹvẹ Ọghẹnẹ ọ rẹ rọ “guọlọ ọ nọ o vru na”? Wọhọ epanọ oria Ebaibol nọ ma fodẹ evaọ obehru na u dhesẹ, Jihova o re si ohwo na gboma riẹ.

Amono a bi kpohọ iwou ahwo gbe eria efa nyae ta usiuwoma Uvie Ọghẹnẹ kẹ amọfa nẹnẹ?

Joma ta kpahe oghẹrẹ nọ Jihova o re ro si ahwo evezi gboma. Evaọ ikpe-udhusoi ọsosuọ, Ọghẹnẹ o vi Filip olele na re ọ dhẹ bru ọwharọ obọ Ẹtiopia jọ re o fiobọhọ kẹe wo otoriẹ eruẹaruẹ Ebaibol nọ o je se. (Iruẹru Ikọ 8:26-39) Evaọ oke ofa jọ, Ọghẹnẹ ọ kpọ Pita re o weze bru ọgbaẹmo Rom jọ nọ a re se Kọniliọs, ọnọ ọ jẹ lẹ re ọ riẹ emamọ edhere nọ ọ rẹ rọ gọ Ọghẹnẹ. (Iruẹru Ikọ 10:1-48) Ọghẹnẹ ọ tẹ jẹ kpọ Pọl ukọ na avọ ahwo nọ a gbẹ jẹ ta usiuwoma re a kpohọ unueri jọ nọ o jọ okpẹwho Filipai. Evaọ etẹe a jọ ruẹ aye jọ a re se Lidia, “nọ ọjọ ọ gọ Ọghẹnẹ. Ọnowo o te rovie eva riẹ re o yo ẹme nọ Pọl ọ rẹ ta.”—Iruẹru Ikọ 16:9-15.

Evaọ iriruo nọ ma ta kpahe na, Jihova o ru nọ ahwo nọ a wo evezi a ro wuhrẹ kpahe iẹe. Amono a bi kpohọ iwou ahwo gbe eria efa nyae ta usiuwoma Uvie Ọghẹnẹ kẹ amọfa nẹnẹ? Ahwo buobu a rẹ ta nọ, “Isẹri Jihova.” Nọ omara nọ, ‘Kọ o sae jọnọ Ọghẹnẹ ọ be rehọ Isẹri Jihova fiobọhọ kẹ omẹ re mẹ sai si kẹle iẹe?’ Ma be tuduhọ owhẹ awọ nọ whọ lẹ se Ọghẹnẹ re whọ sai j’owọ lele obufihọ riẹ re who si kẹle iẹe. *

^ edhe-ẹme 7 Re whọ gbẹ riẹ kpahe ẹme nana, jọ www.jw.org/iso rri ividio na, Fikieme Who re ro Wuhrẹ Ebaibol Na?