Ebaibol na ọ fodẹ iwhrori buobu nọ a je kienyẹ. Nọ a tẹ fodẹ iwhrori, Nebọt ọ rẹ ziọ omai iroro. Ehab nọ o je su Izrẹl evaọ ikpe udhusoi avọ ikpe taure Kristi ọ tẹ te ze, ọ kuvẹ re aye riẹ Jezibẹl o kpe Nebọt avọ emọ riẹ kpobi no re ọ sae rehọ ọgbọ evaene riẹ. (1 Ivie 21:1-16; 2 Ivie 9:26) Fikieme Ọghẹnẹ ọ rọ kuvẹ kẹ oghẹrẹ okienyẹ otiọye?

Joma ta kpahe oware jọ nọ o soriẹ ze: Ọghẹnẹ ọ rẹ ta ọrue he. (Taitọs 1:2) Kọ ẹvẹ ẹme nana o ro kie kpahe eware iyoma hayo okienyẹ? No anwọ emuhọ ze Ọghẹnẹ ọ rọ ta nọ ahwo-akpọ a ti whu otẹrọnọ a yoẹme kẹe he. Nwanọ wọhọ epanọ Ọghẹnẹ ọ ta, anwọ okenọ Adamu avọ Ivi a rọ ghẹmeeyo kẹ Ọghẹnẹ evaọ ogba Idẹn, ahwo-akpọ a ro muhọ ewhu. Ohwo ọsosuọ nọ o whu evaọ akpọ na họ Ebẹle, ọnọ oniọvo riẹ Keni o kpe fiki okienyẹ.—Emuhọ 2:16, 17; 4:8.

Ebaibol na ọ ta kpahe ohwo-akpọ no anwọ oke yena ze inọ: “Ohwo ọ rẹ rehọ obọ ogaga su ọrivẹ riẹ nwa oma riẹ.” (Ọtausiuwoma Na 8:9) Kọ ẹme nana ginọ uzẹme? Jihova ọ ta kẹ emọ Izrẹl nọ ivie nọ i ti su ai, a ti kienyẹ ai, nọ o te lẹliẹ ai bo se Ọghẹnẹ kẹ obufihọ. (1 Samuẹle 8:11-18) Makọ Solomọn ovie owareghẹ na dede, ọ jẹ rọ obọ ogaga su ahwo na. (1 Ivie 11:43; 12:3, 4) Onọ Ehab ovie ọgeva na o je ru, o tubẹ ga vi orọ ivie efa kpobi. Dai roro kpahe onana: O hae jọnọ Ọghẹnẹ ọ whaha oghẹrẹ okienyẹ yena kpobi, kọ ọ gbẹ hae te jọ ọtọrue?

Kareghẹhọ nọ Setan ọ ta nọ okenọ eware i te woma kẹ omai ọvo ma rẹ rọ gọ Ọghẹnẹ orọnikọ fiki uyoyou nọ ma wo kẹe he. (Job 1:9, 10; 2:4) Kọ otẹrọnọ Ọghẹnẹ ọ rẹ thọ idibo riẹ no okienyẹ kpobi, kọ o gbẹ te jọnọ ẹme Setan na uzẹme? Otẹrọnọ Ọghẹnẹ ọ rẹ whaha okienyẹ kpobi nọ ọ be via evaọ akpọ na, kọ u gbe ti ru Ọghẹnẹ fihọ ọtọrue ologbo? Ọghẹnẹ ọ tẹ be thọ ahwo no okienyẹ kpobi, ahwo buobu a ve ti roro nọ ahwo-akpọ a rẹ sai su omobọrai ababọ obufihọ Ọghẹnẹ. Rekọ Ebaibol na ọ ta nọ, ohwo-akpọ ọ sai su omobọriẹ vievie he. (Jerimaya 10:23) Nọ Uvie Ọghẹnẹ u te muhọ esuo no, ẹsiẹe okienyẹ kpobi o ti ro n’otọ riẹriẹriẹ.

Kọ onana u dhesẹ nọ Ọghẹnẹ o bi ru oware ovo kpahe okienyẹ hẹ? Vievie. Joma ta kpahe eware ivẹ jọ nọ o bi ru: Orọ ọsosuọ, ọ be hae fere okienyẹ kpobi via re ahwo kpobi a ruẹ. Wọhọ oriruo, Ọghẹnẹ ọ jọ Ebaibol na fere oghẹrẹ nọ Jezibẹl o ro kienyẹ Nebọt via. Ebaibol na ọ tẹ jẹ ta nọ, osu akpọ na nọ ọ be ko omariẹ dhere, ọye ọ be wha okienyẹ kpobi haro. (Jọn 14:30; 2 Ahwo Kọrint 11:14) Ọye họ Setan Ẹdhọ na. Ọghẹnẹ ọ gwọlọ nọ ma siomano umuemu gbe okienyẹ kpobi, oyejabọ nọ ọ rọ fere eware iyoma nọ ahwo a ru via gbe ohwo nọ ọ be whae ze. Ọ tẹ be rọ ere ruẹrẹ omai kpahe kẹ uzuazọ ebẹdẹ bẹdẹ.

Orọ avivẹ, Ọghẹnẹ ọ ya eyaa nọ o ti ku okienyẹ kpobi họ. Oghẹrẹ nọ ọ rọ fere Ehab, Jezibẹl gbe amọfa nọ a je kienyẹ ahwo via je broziẹ uwhu kpe ai, o kẹ omai imuẹro nọ o ti ru eyaa nọ ọ ya inọ o ti kpe irumuomu kpobi no ẹdẹjọ. (Olezi 52:1-5) Ọghẹnẹ ọ tẹ jẹ ya nọ o ti si eware iyoma kpobi n’otọ kẹ ahwo nọ a be gọe. * Oke o be tha nọ Nebọt avọ emọ riẹ a te rọ rria bẹdẹ bẹdẹ evaọ aparadase otọakpọ nọ okienyẹ ọ te jọ họ.—Olezi 37:34.