Didi okẹ a rẹ kẹ owhẹ nọ o rẹ mae lẹliẹ eva were owhẹ? Avro ọ riẹ hẹ inọ okẹ nọ u no eva ze oye o rẹ mae wha evawere se ohwo, viukpe onọ a gba ohwo họ ru. Oghẹrẹ eva nọ a rẹ rọ kẹ okẹ, u wo uzou gaga. Yọ Ọghẹnẹ o re muẹrohọ onana re. Joma ta kpahe eme Pọl ukọ na nọ e rrọ obe 2 Ahwo Kọrint 9:7.

Fikieme Pọl o ro kere eme yena? O kere eme yena rọ tuduhọ Ileleikristi obọ Kọrint awọ re a ru unevaze ro fi obọ họ kẹ ibe eg’Ọghẹnẹ rai nọ e jọ obọ Judia. Kọ Pọl ọ jẹ gwọlọ gba inievo obọ Kọrint họ re a ru unevaze? Vievie, ukpoye o kere nọ: “Ohwo o re ru wọhọ epanọ o roro evaọ eva riẹ, o jọ o rọ obọ okeke hẹ hayo ọgbahọ họ, keme Ọghẹnẹ o re you ohwo nọ ọ rẹ kẹ okẹ-evawere.” Joma dina ta kpahe ohrẹ yena ziezi.

‘Wọhọ epanọ o roro evaọ eva riẹ.’ Pọl ọ be ta nọ uvi Oleleikristi ọ rẹ kẹ okẹ nọ u no eva ze keme ọ jọ “eva riẹ” roro iei no. Kẹsena o ve ru oware jọ ro fi obọ họ kẹ ibe eg’Ọghẹnẹ riẹ. Ọgba-eriariẹ jọ ọ ta nọ, ẹme Griki nọ a fa nọ “epanọ o roro” na, “u dhesẹ epanọ ohwo ọ rẹ jọ udu riẹ gbaemu.” Fikiere nọ Oleleikristi ọ tẹ ruẹ nọ ibe eg’Ọghẹnẹ riẹ a be ruẹ uye, o rẹ gwọlọ edhere kpobi nọ o re ro fi obọ họ kẹ ae.—1 Jọn 3:17.

‘O jọ o rọ obọ okeke hẹ hayo ọgbahọ họ.’ Pọl ọ be jọ etenẹ ta kpahe eware ivẹ jọ nọ Ileleikristi a rẹ whaha nọ a tẹ be kẹ okẹ, koyehọ, obọ okeke gbe ọgbahọ. Ẹme Griki nọ a fa ‘obọ okeke’ na, u dhesẹ “epanọ ohwo ọ rẹ kẹ okẹ yọ o be dae.” Obe jọ o ta nọ, o rẹ da ohwo nọ ọ rẹ keke obọ kẹ oke, keme o re roro nọ o bi ku igho kufiẹ. Ohwo nọ ọ rẹ kẹ okẹ ọgbahọ yọ ohwo nọ a rẹ ta kẹ taure ọ tẹ te kẹ. Ono ọ rẹ gwọlọ nọ a kẹe okẹ nọ u no eva ze he?

‘Ọghẹnẹ o re you ohwo nọ ọ rẹ kẹ okẹ-evawere.’ Pọl ọ be ta nọ jọ Oleleikristi ọ rọ evawere kẹ okẹ. Uzẹme riẹ họ, eva e rẹ mae were omai nọ ma tẹ rọ emamọ eva kẹ okẹ. (Iruẹru Ikọ Na 20:35) Eva e rẹ were ohwo nọ ọ rẹ kẹ okẹ nọ u no eva ze ẹsikpobi. “Evawere” na i re no obọ eva ohwo na ze nọ ahwo kpobi a rẹ ruẹ. Okẹ nọ a kẹ no eva ze u re duobọte omai udu. Okẹ utioye na o rẹ lẹliẹ eva were Ọghẹnẹ re. A jọ Ebaibol ọ Contemporary English Version fa oria nana inọ: “Ọghẹnẹ o re you ahwo nọ o rẹ were re a kẹ.”

Eme nana nọ Pọl o kere na e rẹ kpọ Ileleikristi nọ a tẹ be kẹ okẹ. O tẹ make rọnọ oke mai, ẹgba mai, hayo ugho, ma be rọ kẹ okẹ, jọ u no omai eva ze. Nọ ma te ru ere ẹsiẹ eva e rẹ mae were omai, maero nọ ma te bi ru ọghọ kẹ ahwo nọ a gwọlọ obufihọ. Yọ oyena o rẹ lẹliẹ eva were omai je si omai kẹle Ọghẹnẹ, keme “o re you ohwo nọ ọ rẹ kẹ okẹ-evawere.”